ಕಾವೇರಿ ಒಡಲು ಸೇರುತ್ತಿದೆ ‘ಹೇಮಾವತಿ’! : ವಿಪರೀತ ಮಳೆಯಿಂದ ಹೇಮಾವತಿ ನೀರಿನ ಅಗತ್ಯ ಪ್ರಸ್ತುತ ವರ್ಷಕ್ಕಿಲ್ಲ ಎನ್ನುವಂತಾಗಿದೆ, ಜಿಲ್ಲೆಗೆ ಬಂದ ಹೇಮಾವತಿ ನೀರು ಕೆರೆಗಳನ್ನೆಲ್ಲಾ ಸ್ಪರ್ಶಿಸಿ ಮತ್ತೆ ಹಿಂದಿರುಗಿ ಕಾವೇರಿ ಒಡಲು ಸೇರುತ್ತಿದ್ದು, ಜಿಲ್ಲೆಯ ಪಾಲಿನ ಹಂಚಿಕೆಯಾದ ನೀರನ್ನು ಸದ್ಬಳಕೆ ಮಾಡಿಕೊಳ್ಳುವ ಸಾಮರ್ಥ್ಯ ನಮಗಿಲ್ಲವೆ ಎಂಬ ಸಂಶಯ ಕಾಡಲಾರಂಭಿಸಿದೆ.
ಜಿಲ್ಲೆಯಲ್ಲಿ ಇನ್ನೂ ತುಂಬಬೇಕಾದ ಕೆರೆಗಳಿವೆ, ಎಲ್ಲ ಭಾಗದಲ್ಲೂ ಸಾಕಾಗುವಷ್ಟೇನು ಮಳೆ ಆಗಿಲ್ಲ, ತುಮಕೂರು, ಕುಣಿಗಲ್ ಭಾಗದಲ್ಲಿ ನೀರು ಬರುವ ಮಳೆ ಸುರಿದಿಲ್ಲ. ಅಧಿಕಾರಿಗಳು, ಜನಪ್ರತಿನಿಧಿಗಳ ಇಚ್ಛಾಶಕ್ತಿಯ ಕೊರತೆ, ದೂರದೃಷ್ಟಿಯ ಅಭಾವದಿಂದ ಹೇಮಾವತಿ ನೀರು ಮತ್ತೆ ಕಾವೇರಿ ನದಿ ಸೇರುತ್ತಿದೆ, ಮದಲೂರು ಮೂಲಕ ಸಮುದ್ರಕ್ಕೂ ಹೋಗಲಿದೆ. ವ್ಯರ್ಥವಾಗಿ ಹೋಗುವ ನೀರನ್ನು ನೀರಿಲ್ಲದೆ ಉಳಿದಿರು ಕೆರೆಗಳಿಗೆ ಹರಿಸುವ ಯೋಜನೆಗಳ ಅಗತ್ಯವಿದೆ, ಈ ನಿಟ್ಟಿನಲ್ಲಿ ಪ್ರಾಮಾಣಿಕ ಪ್ರಯತ್ನವಾಗಬೇಕಿದೆ.
