ಸೋಮವಾರದಿಂದ ರೈಲು ಸಂಚಾರ ಪುನಾರಂಭ ಸಾಧ್ಯತೆ

ಸುಬ್ರಹ್ಮಣ್ಯ: ಮಂಗಳೂರು-ಬೆಂಗಳೂರು ರೈಲು ಮಾರ್ಗದ ಹಾಸನ ಜಿಲ್ಲಾ ವ್ಯಾಪ್ತಿಯ ಎಡಕುಮೇರಿ-ಕಡಗರವಳ್ಳಿ ನಡುವಿನ ದೋಣಿಗಲ್ ಎಂಬಲ್ಲಿ ರೈಲು ಮಾರ್ಗದಲ್ಲಿ ಭೂಕುಸಿತ ಸಂಭವಿಸಿದ ಘಟನೆಗೆ ಸಂಬಂಧಿಸಿದಂತೆ ದುರಸ್ತಿ ಕಾರ್ಯ ಭರದಿಂದ ಸಾಗುತ್ತಿದೆ. ಶುಕ್ರವಾರ ರಾತ್ರಿಯಿಂದಲೇ ಕಾರ್ಯಾಚರಣೆ ಆರಂಭಿಸಲಾಗಿದ್ದು, ಶನಿವಾರವೂ ರೈಲ್ವೆ ಇಲಾಖೆ ಕುಸಿತಗೊಂಡ ಸ್ಥಳದಲ್ಲಿ ದುರಸ್ತಿ ಕಾರ್ಯ ಸಮರೋಪಾದಿಯಲ್ಲಿ ನಡೆಸಿದೆ. ಶನಿವಾರವೂ ಕೆಲರೈಲುಗಳು ಸ್ಥಗಿತಗೊಂಡಿದ್ದು, ಇನ್ನು ಕೆಲವೊಂದು ರೈಲುಗಳು ಪಥ ಬದಲಾಯಿಸಿವೆ. ಸೋಮವಾರ ಮತ್ತೆ ರೈಲು ಸಂಚಾರ ಆರಂಭಗೊಳ್ಳುವ ಸಾಧ್ಯತೆ ಇದೆ ಎನ್ನಲಾಗಿದೆ.

ಸಮರೋಪಾದಿಯಲ್ಲಿ ನಡೆಯುತ್ತಿದೆ ಹಳಿ ದುರಸ್ತಿ ಕಾರ್ಯ

ಘಟನೆ ನಡೆದ ತಕ್ಷಣ ರೈಲ್ವೆ ಇಲಾಖೆಗೆ ಮಾಹಿತಿ ನೀಡಲಾಗಿತ್ತು. ಘಟನಾ ಸ್ಥಳಕ್ಕೆ ರೈಲ್ವೆ ಅಧಿಕಾರಿಗಳು, ಇಂಜಿನಿಯರ್‌ಗಳು ಭೇಟಿ ನೀಡಿ ಪರಿಶೀಲನೆ ನಡೆಸಿ ದುರಸ್ತಿ ಕಾರ್ಯ ಆರಂಭಿಸಿದ್ದಾರೆ. ರಾತ್ರಿ ನಿರಂತರ ಮಳೆಯಾಗಿದ್ದು, ದುರಸ್ತಿಗೆ ಅಲ್ಪ ಹಿನ್ನಡೆಯಾಗಿತ್ತು. ರೈಲು ಮಾರ್ಗದಲ್ಲಿ ಭೂಕುಸಿತ ಸಂಭವಿಸಿದ ಕೆಳಭಾಗದಿಂದ ತಡೆಗೋಡೆ ಮಾದರಿ ನಿರ್ಮಿಸುವ ಕಾರ್ಯ ಭರದಿಂದ ನಡೆಯುತ್ತಿದೆ.

ಪರ್ಯಾಯ ಮಾರ್ಗ:

ಕಾಮಗಾರಿ ಪೂರ್ತಿಗೊಳ್ಳಲು ಅಂದಾಜು 2-3 ದಿನ ಬೇಕಾಗಬಹುದು ಎಂದು ಮೂಲಗಳು ತಿಳಿಸಿವೆ. ಆದ್ದರಿಂದ ಸೋಮವಾರದವರೆಗೆ ರೈಲು ಸಂಚಾರ ಸ್ಥಗಿತಗೊಳ್ಳುವ ಮಾಹಿತಿ ಲಭ್ಯವಾಗಿದೆ. ಈಗಾಗಲೇ ಆ ಮಾರ್ಗದ ಮೂಲಕ ಸಂಚರಿಸುವ ರೈಲುಗಳ ಸಂಚಾರ ಸ್ಥಗಿತ ಮಾಡಿರುವ ಬಗ್ಗೆ ಇಲಾಖೆಯಿಂದ ಅಧಿಕೃತ ಮಾಹಿತಿ ನೀಡಲಾಗುತ್ತಿದೆ. ಜತೆಗೆ ಪರ್ಯಾಯ ಮಾರ್ಗದ ಮೂಲಕ ಸಂಚರಿಸುವ ರೈಲುಗಳ ಬಗ್ಗೆಯೂ ಪ್ರಕಟಣೆ ನೀಡಲಾಗಿದೆ. ಶನಿವಾರ ಹಾಸನ-ಶಾಂತಿಗ್ರಾಮ ನಡುವೆ ಅಲ್ಪ ಮಣ್ಣುಕುಸಿತ ಸಂಭವಿಸಿತ್ತು. ಇದರಿಂದ ಗೂಡ್ಸ್ ರೈಲು( 12419/12502) ಅಲ್ಪ ಪ್ರಮಾಣದಲ್ಲಿ ತೊಂದರೆಗೆ ಸಿಲುಕಿತ್ತು. ಯಾವುದೇ ಹಾನಿಯಾಗಿಲ್ಲ.

ಸ್ಥಗಿತಗೊಂಡ ರೈಲುಗಳು

ಯಶವಂತಪುರ-ಮಂಗಳೂರು(16539), ಕಾರವಾರ-ಯಶವಂತಪುರ(16516), ಮಂಗಳೂರು ಜಂಕ್ಷನ್ ಯಶವಂತಪುರ(16540), ಮಂಗಳೂರು ಸೆಂಟ್ರಲ್-ವಿಜಯಪುರ(07378), ವಿಜಯಪುರ-ಮಂಗಳೂರು ಸೆಂಟ್ರಲ್(07377), ಎಸ್‌ಎಂವಿಟಿ ಬೆಂಗಳೂರು-ಕಾರವಾರ(06568), ಎಸ್‌ಎಂವಿಟಿ ಬೆಂಗಳೂರು-ಮುರ್ಡೇಶ್ವರ(16585), ಮುರ್ಡೇಶ್ವರ-ಎಸ್‌ಎಂವಿಟಿ ಬೆಂಗಳೂರು-(16586), ಯಶವಂತಪುರ-ಮಂಗಳೂರು ಜಂಕ್ಷನ್(16575), ಮಂಗಳೂರು ಜಂಕ್ಷನ್-ಯಶವಂತಪುರ(16576), ಮಂಗಳೂರು ಸೆಂಟ್ರಲ್-ವಿಜಯಪುರ(07378), ಬೆಂಗಳೂರು-ಕಣ್ಣೂರು(16511), ಬೆಂಗಳೂರು-ಕಾರವಾರ(16595), ಕಣ್ಣೂರು-ಬೆಂಗಳೂರು(16512) ರೈಲುಗಳು ರದ್ದಾಗಿದೆ. ಉಳಿದಂತೆ ಕಣ್ಣೂರು-ಬೆಂಗಳೂರು(16512), ಕಾರವಾರ-ಬೆಂಗಳೂರು(16596), ಮುರ್ಡೇಶ್ವರ-ಬೆಂಗಳೂರು(16586) ಪಥ ಬದಲಾಯಿಸಿ ಚಲಿಸಿದೆ.

https://www.vijayavani.net/mangalore-north-police-station-atida-koota

https://www.vijayavani.net/mangalore-sri-bharathi-samuha-samsthe-kargil-vijayothsava