ರೈಲ್ವೆ ಯೂನಿಯನ್ ಚುನಾವಣೆ: ಶೇ. 53.35ಮತದಾನ

ಹುಬ್ಬಳ್ಳಿ : ರೈಲ್ವೆ ಯೂನಿಯನ್​ಗೆ ಬುಧವಾರ ದೇಶದಾದ್ಯಂತ ಮತದಾನ ಪ್ರಾರಂಭಗೊಂಡಿದ್ದು, ನೈಋತ್ಯ ರೈಲ್ವೆ ವಲಯದ ವ್ಯಾಪ್ತಿಯಲ್ಲಿ ಮೊದಲ ದಿನವಾದ ಬುಧವಾರದಂದು ಶೇ. 53.35ರಷ್ಟು ಮತದಾನವಾಗಿದೆ.

ರೈಲ್ವೆ ಯೂನಿಯನ್ ಚುನಾವಣೆಗೆ ಡಿ. 4 ಮತ್ತು 5ರಂದು ಮತದಾನ ನಡೆಯಲಿದ್ದು, 6 ರಂದು ರನ್ನಿಂಗ್ ಸ್ಟಾಫ್(ಲೋಕೋಪೈಲಟ್ ಹಾಗೂ ಗಾರ್ಡ್ಸ್) ಮಾತ್ರ ಮತದಾನ ಮಾಡಲಿದ್ದಾರೆ. ಡಿ. 12ರಂದು ಫಲಿತಾಂಶ ಪ್ರಕಟಗೊಳ್ಳಲಿದೆ.

ರೈಲ್ವೆ ನೌಕರರು ಬೆಳಗ್ಗೆಯಿಂದಲೇ ಮತಗಟ್ಟೆ ಬಳಿ ಸರದಿಯಲ್ಲಿ ನಿಂತು ಮತದಾನ ಮಾಡಿದರು.

ಗ್ರುಪ್ ಎ, ಬಿ ಹಾಗೂ ಆರ್​ಪಿಎಫ್ ಸಿಬ್ಬಂದಿಗೆ ಮತದಾನಕ್ಕೆ ಅವಕಾಶ ಇಲ್ಲ.

ನೈಋತ್ಯ ರೈಲ್ವೆ ವ್ಯಾಪ್ತಿಯಲ್ಲಿ ಒಟ್ಟು 36,935 ಮತದಾರರು ಇದ್ದಾರೆ. ಮತದಾನದ ಮೊದಲ ದಿನವಾದ ಬುಧವಾರದಂದು ನೈಋತ್ಯ ರೈಲ್ವೆಯ 19,706 ನೌಕರರು ಮತದಾನ ಮಾಡಿದ್ದಾರೆ. ಹೆಡ್​ಕ್ವಾರ್ಟರ್​ನ 923ರಲ್ಲಿ 607 ಮತದಾರರು ಹಕ್ಕು ಚಲಾಯಿಸಿದ್ದಾರೆ (ಶೇ. 65.76). ಹುಬ್ಬಳ್ಳಿ ವಿಭಾಗದ 12,759 ಮತದಾರರಲ್ಲಿ 6,518 (ಶೇ.51.09) ಜನ ಮತದಾನ ಮಾಡಿದ್ದರೆ, ಬೆಂಗಳೂರು ವಿಭಾಗದ ಒಟ್ಟು 11,461 ಮತದಾರರಲ್ಲಿ 6,137(ಶೇ. 53.55)ಮತದಾರರು; ಮೈಸೂರು ವಿಭಾಗದ 7,027ರಲ್ಲಿ 3,552 (ಶೇ. 50.55) ನೌಕರರು ಮತ ಚಲಾಯಿಸಿದ್ದಾರೆ.

ಹುಬ್ಬಳ್ಳಿ ವರ್ಕ್​ಶಾಪ್​ನ 2,886ರಲ್ಲಿ 1,949 (ಶೇ. 67.53) ನೌಕರರು, ಮೈಸೂರು ವರ್ಕ್​ಶಾಪ್​ನ 1,580ರಲ್ಲಿ 774 (ಶೇ. 48.99); ಬೆಂಗಳೂರು ಕಂಟೋನ್ಮೆಂಟ್​ನ 299 ಮತದಾರರಲ್ಲಿ 169 (ಶೇ. 56.52) ಜನ ಮತದಾನ ಮಾಡಿದ್ದಾರೆ.

ಸೌಥ್ ವೆಸ್ಟರ್ನ್ ರೈಲ್ವೆ ಎಂಪ್ಲಾಯೀಸ್ ಸಂಘ, ಬಿಎಂಎಸ್​ನ ನೈಋತ್ಯ ರೈಲ್ವೆ ಮಜ್ದೂರ ಸಂಘ, ಸೌಥ್ ವೆಸ್ಟರ್ನ್ ಎಂಪ್ಲಾಯೀಸ್ ಯೂನಿಯನ್, ಸೌಥ್ ವೆಸ್ಟರ್ನ್ ರೈಲ್ವೆ ಮಜ್ದೂರ ಯೂನಿಯನ್​ಗಳು ಈ ಚುನಾವಣೆಯಲ್ಲಿ ಸ್ಪರ್ಧಿಸಿವೆ.