ಮಂಗಗಳ ಹಾವಳಿಗೆ ಊರು ಬಿಡಬೇಕಾಗಿದೆ: ರಾಮನಗರ ಜಿಲ್ಲಾ ವ್ಯಾಪ್ತಿಯಲ್ಲಿ ಅನೆಗಳ ಹಾವಳಿ ಜತೆಗೆ ಮಂಗಗಳ ಕಾಟವೂ ವಿಪರೀತವಾಗಿದೆ, ಇದರಿಂದ ತೋಟಗಾರಿಕೆ ಬೆಳೆಗಾರರು ಪರದಾಡುವಂತಾಗಿದೆ, ತಮ್ಮ ಜಮೀನುಗಳಲ್ಲಿನ ಸಲನ್ನು ಉಳಿಸಿಕೊಳ್ಳಲು ರೈತರು ಸಾಧ್ಯವಾಗದಂತಾಗಿದೆ, ತೆಂಗಿನ ಮರಗಳಲ್ಲಿ ಒಂದು ತೆಂಗಿನ ಕಾಯಿಯೂ ಉಳಿಗಾಲವಿಲ್ಲದಂತಾಗಿದೆ, ರೈತರು ಎದುರಿಸುತ್ತಿರುವ ಅನೇಕ ಸಮಸ್ಯೆಗಳ ನಡುವೆ ಈ ಮಂಗಗಳ ಸಮಸ್ಯೆಯೂ ದುಬಾರಿಯಾಗಿದೆ ಎಂದು ರವಿಕುಮಾರ್ ಸಭೆಯಲ್ಲಿ ಗಮನ ಸೆಳೆದರು. ಪರಿಸ್ಥಿತಿ ಕೈಮೀರಿ ಹೋಗುತ್ತಿದೆ, ಮಂಗಗಳ ಹಾವಳಿಗೆ ನಾವೇ ಊರು ಬಿಡುವಂತ ಪರಿಸ್ಥಿತಿ ಎದುರಾಗಿದೆ ಎಂದು ಆತಂಕ ವ್ಯಕ್ತಪಡಿಸಿದರು. ಇದಕ್ಕೆ ಪ್ರತಿಕ್ರಿಯಿಸಿದ ಸಚಿವರು ಇದನ್ನು ಗಂಭೀರವಾಗಿ ಪರಿಗಣಿಸಲಾಗುವುದು, ಇದರ ಬಗ್ಗೆ ಅರಣ್ಯ ಇಲಾಖೆ ಅಧಿಕಾರಿಗಳೊಂದಿಗೆ ಚರ್ಚಿಸಿ ಮಂಗಗಳ ಸೆರೆ ಕಾರ್ಯಾಚರಣೆ ನಡೆಸಲಾಗುವುದು, ಮಂಗಗಳ ಹಾವಳಿಯಿಂದ ಬೆಳೆ ಹಾನಿ ಆಗುತ್ತಿರುವುದು ಸರ್ಕಾರದ ಗಮನಕ್ಕೆ ಬಂದಿದೆ ಎಂದು ತಿಳಿಸಿದರು.
