ಗುಂಜಳ್ಳಿಯಲ್ಲಿ ನೀರಿಗಾಗಿ ಜಾಗರಣೆ

ಅಶೋಕ ಬೆನ್ನೂರು ಸಿಂಧನೂರು: ಬೇಸಿಗೆ ಆರಂಭವಾಗಿ ತಿಂಗಳು ಕಳೆದಿಲ್ಲ. ಆಗಲೇ ಕುಡಿವ ನೀರಿಗೆ ಗ್ರಾಮಸ್ಥರು ರಾತ್ರಿಯಿಡೀ ನಿದ್ದೆಗೆಡಬೇಕಾದ ಸ್ಥಿತಿ ತಾಲೂಕಿನ ಗುಂಜಳ್ಳಿ ಗ್ರಾಮದಲ್ಲಿದೆ ಎದುರಾಗಿದೆ.

ಗುಂಜಳ್ಳಿ ಗ್ರಾಪಂ 3ಸಾವಿರ ಜನಸಂಖ್ಯೆ ಹೊಂದಿದೆ. ಗ್ರಾಮದಲ್ಲಿ ಕೆರೆ ಇದೆ. ಈ ಹಿಂದೆ 1,500 ಜನರಿಗೆ ಆಗುವಷ್ಟು ನೀರು ಸಂಗ್ರಹಗೊಳ್ಳುವ ಕೆರೆ ನಿರ್ಮಿಸಲಾಗಿದೆ. ಇದರಿಂದ ಇಡೀ ಊರಿಗೆ ನೀರು ಪೂರೈಕೆಯೇ ಸವಾಲಾಗಿ ಪರಿಣಮಿಸಿದೆ. ಈಗಾಗಲೇ ತಾಲೂಕಿನಲ್ಲಿ ಬೇಸಿಗೆ ಜನರನ್ನು ಸುಡುತ್ತಿದೆ. ನೀರಿನ ಸಮಸ್ಯೆಯು ತಲೆದೋರುತ್ತಿದೆ.

ತಾಲೂಕು ಆಡಳಿತ ಆಯಾ ಕಾಲುವೆ ವ್ಯಾಪ್ತಿಯಲ್ಲಿ ಕುಡಿವ ನೀರಿನ ಕೆರೆಗಳನ್ನು ತುಂಬಿಸಲು ಸೂಚನೆ ನೀಡಿದೆ. ಆದರೆ ಇಡೀ 3ಸಾವಿರ ಜನಸಂಖ್ಯೆಗೆ ಆಗುವಷ್ಟು ನೀರು ಪೂರೈಕೆ ಕಷ್ಟವಾಗಿದೆ. ಸಣ್ಣ ಕೆರೆಯಿದ್ದು ಈ ಕೆರೆಯಿಂದ ಗ್ರಾಮಕ್ಕೆ ನೀರು ಪೂರೈಕೆಯಾಗಬೇಕು. ಪ್ರತಿ ಬೇಸಿಗೆಯಲ್ಲಿ ಮೂರು ತಿಂಗಳು ವಾರಕ್ಕೊಮ್ಮೆ ನೀರು ಬಿಡಲಾಗುತ್ತದೆ. ಪ್ರತಿ ಶನಿವಾರಕ್ಕೊಮ್ಮೆ ಬರುವ ನೀರನ್ನು ಹಿಡಿದಿಟ್ಟುಕೊಳ್ಳುವುದೇ ಗ್ರಾಮಸ್ಥರಿಗೆ ಸವಾಲಾಗಿದೆ. ಶುಕ್ರವಾರವೇ ನೀರಿಗಾಗಿ ಮನೆಯ ಎಲ್ಲ ಕೊಡ, ಬಕೆಟು ಸೇರಿ ನಾನಾ ಪರಿಕರಗಳಲ್ಲಿ ನೀರು ಸಂಗ್ರಹಿಸಿಕೊಳ್ಳಲು ಸಿದ್ಧತೆ ಮಾಡಿಕೊಳ್ಳಲಾಗುತ್ತದೆ.

ಶನಿವಾರ ಬರುವ ನೀರಿಗಾಗಿ ಎಲ್ಲ ಕೆಲಸವನ್ನು ಬಿಟ್ಟು ಕಾಯಬೇಕಾಗುತ್ತದೆ. ಸಂಜೆಯಿಂದ ಹಿಡಿದು ಮಧ್ಯರಾತ್ರಿಯವರೆಗೂ ನೀರು ಸಂಗ್ರಹಿಸಿಕೊಳ್ಳಲು ಪರದಾಡಬೇಕಿದೆ. ಇದರಿಂದ ಗ್ರಾಮಸ್ಥರು ರೋಸಿ ಹೋಗಿದ್ದಾರೆ. ಜನಸಂಖ್ಯೆ ಅನುಗುಣವಾಗಿ ದೊಡ್ಡ ಕೆರೆ ನಿರ್ಮಾಣ ಮಾಡಬೇಕೆಂಬ ಗ್ರಾಮಸ್ಥರ ಒತ್ತಡಕ್ಕೆ ಜನಪ್ರತಿನಿಧಿಗಳು ಮನಸ್ಸು ಮಾಡಿಲ್ಲ.

ನಿದ್ದೆಗೆ ಜಾರಿದರೆ ನೀರಿಲ್ಲ: ಗ್ರಾಮದಲ್ಲಿ ಶನಿವಾರಕ್ಕೊಮ್ಮೆ ಬರುವ ನೀರು ಹಿಡಿದಿಟ್ಟುಕೊಳ್ಳಲು ನಿದ್ದೆಯಿಂದ ಎದ್ದಿರಬೇಕು. ಇಲ್ಲವಾದರೆ ನೀರು ಪಡೆಯಲು ಸಾಧ್ಯವಿಲ್ಲ. ಮಕ್ಕಳು, ಮಹಿಳೆಯರೆನ್ನದೇ ನೀರಿಗಾಗಿ ನಳದ ಮುಂದೆ ಬಿಂದಿಗೆ ಹಿಡಿದುಕೊಂಡು ಕುಳಿತುಕೊಳ್ಳುವುದು ಸಾಮಾನ್ಯವಾಗಿದೆ.

ಗ್ರಾಮದಲ್ಲಿ ಜೆಜೆಎಂ ಕಾಮಗಾರಿ ಕೈಗೊಂಡು ವರ್ಷ ಕಳೆದಿದ್ದರೂ ಹನಿ ನೀರು ಪೈಪ್‌ಲೈನ್ ಮೂಲಕ ಹರಿದಿಲ್ಲ. ಓಣಿಗಳ ಸಿಸಿ ರಸ್ತೆ ಅಗೆದು ಪೈಪ್ ಅಳವಡಿಸಿ, ಮನೆಗೊಂದು ನಳದ ಲೈನ್ ಬಿಟ್ಟು, ನಾಮಫಲಕ ಹಾಕಿ ಹೋದವರು ಇದುವರೆಗೂ ನಾಪತ್ತೆಯಾಗಿದ್ದಾರೆ. ಮನೆ ಮುಂದೆ ಅವಶೇಷಗಳಂತೆ ಉಳಿದುಕೊಂಡಿರುವುದು ವಿಪರ್ಯಾಸವೇ ಸರಿ. ಸರ್ಕಾರದ ಕೋಟ್ಯಾಂತರ ರೂ. ಹಣ ಪೋಲಾಗಿದ್ದು ಜೆಜೆಎಂ ನಳದಲ್ಲಿ ನೀರು ಯಾವಾಗ? ಬರಲಿದೆ ಎಂದು ಜನರು ಚಾತಕ ಪಕ್ಷಿಯಂತೆ ಕಾಯುತ್ತಿದ್ದಾರೆ. ವಾರದವರೆಗೆ ನೀರಿಗಾಗಿ ಕಾಯುವುದು ದೊಡ್ಡ ದುರಂತ. ಎರಡು ದಿನಕ್ಕೊಮ್ಮೆಯಾದರೂ ತಾಲೂಕು ಆಡಳಿತ ಕುಡಿವ ನೀರು ಪೂರೈಕೆಗೆ ಕ್ರಮಕೈಗೊಳ್ಳಬೇಕು ಎಂಬುದ ಗ್ರಾಮಸ್ಥರ ಆಗ್ರಹವಾಗಿದೆ.