ಪಾವತಿಯಾಗದ ಜೋಳದ ಹಣ

ಎಐ ಚಿತ್ರ

Published on:

24 Aug 2026, 1:59 pm

ಪ್ರಮುಖ ಮುಖ್ಯಾಂಶಗಳು

154.23 ಕೋಟಿ ರೂ. ಬಾಕಿ
ಸಿಂಧನೂರು ಸಂಕಷ್ಟದಲ್ಲಿ ರೈತರು

ಸಿಂಧನೂರು; ಬೆಂಬಲ ಬೆಲೆ ಯೋಜನೆಯಡಿ ರೈತರಿಂದ ಮುಂಗಾರು ಹಾಗೂ ಹಿಂಗಾರು ಹಂಗಾಮಿನ ಜೋಳ ಖರೀದಿಸಿರುವ ಸರ್ಕಾರ ದುವರೆಗೆ ಬಹುತೇಕ ರೈತರಿಗೆ ಹಣ ಪಾವತಿಸಿಲ್ಲ. ಇದರಿಂದಾಗಿ ರೈತರು ಸಂಕಷ್ಟಕ್ಕೆ ಸಿಲುಕಿದ್ದಾರೆ. ರಾಯಚೂರು ಜಿಲ್ಲೆಯಲ್ಲಿ 4.10 ಲಕ್ಷ ಕ್ವಿಂಟಾಲ್ ಜೋಳದ 154.23 ಕೋಟಿ ರೂ. ಬಾಕಿ ಉಳಿಸಿಕೊಂಡಿದೆ.

ಫೆಬ್ರವರಿ ಕೊನೆಯಲ್ಲಿ ಹಿಂಗಾರು ಜೋಳ ಕೈಗೆ ಬಂದಿದ್ದರೂ ಸರ್ಕಾರ ಮುಂಗಾರು ಹಂಗಾಮಿನ ಜೋಳದ ಖರೀದಿ ಕೇಂದ್ರ ಆರಂಭಿಸಿರಲಿಲ್ಲ. ರೈತಸಂಘಟನೆಗಳ ಪ್ರತಿಭಟನೆ ನಂತರ ಮಾ.15ರಿಂದ ಖರೀದಿ ಕೇಂದ್ರ ತೆರೆಯಲಾಯಿತು. ಬಳಿಕ ಹಿಂಗಾರು ಜೋಳ ಖರೀದಿಗೆ ಮೇ ತಿಂಗಳ ಕೊನೆಯಲ್ಲಿ ಖರೀದಿ ಕೇಂದ್ರಗಳನ್ನು ಆರಂಭಿಸಲಾಯಿತು.

ಆದರೆ, ಜೋಳಕ್ಕೆ ನುಸಿ ಮತ್ತು ಹುಳು ಬಿದ್ದಿವೆ ಎಂದು ಎಂದು ಅಧಿಕಾರಿಗಳು ಖರೀದಿಗೆ ನಿರಾಕರಿಸಿದ್ದರು. ಇದರಿಂದ ರೊಚ್ಚಿಗೆದ್ದಿದ್ದ ರೈತರು ವಾರಗಟ್ಟಲೆ ತಹಸಿಲ್ ಕಚೇರಿ ಮುಖ್ಯದ್ವಾರದಲ್ಲಿ ಲೋಡ್‌ಗಳನ್ನು ನಿಲ್ಲಿಸಿ ಪ್ರತಿಭಟನೆ ನಡೆಸಿದ ನಂತರ ರಾಜ್ಯ ಸರ್ಕಾರ ಹಲವು ನಿಯಮಗಳನ್ನು ಸಡಿಲಗೊಳಿಸಿ ಹಿಂಗಾರು ಜೋಳ ಖರೀದಿಸಿತ್ತು. ಮೇ-ಜೂನ್‌ನಲ್ಲಿ ಖರೀದಿಯಾಗಿದ್ದ ಹಿಂಗಾರು ಜೋಳದ ಹಣ ಮೇ 23ರವರೆಗೆ ಪಾವತಿಯಾಗಿದ್ದು, ಜೂ.15ರವರೆಗೆ ಖರೀದಿಸಿದ್ದ 4.10 ಲಕ್ಷ ಕ್ವಿಂಟಾಲ್‌ನ 154.23 ಕೋಟಿ ರೂ. ಬಾಕಿ ಇದೆ.

ಬೆಳೆಗಾರರಿಗೆ ನ್ಯಾಯ ದೊರಕಿಸಲಿ

ಜೋಳ ಬೆಳೆದ ರೈತರು ಹಲವು ತಿಂಗಳು ಗತಿಸಿದರೂ ಹಣ ಪಾವತಿಸದ ಕಾರಣಕ್ಕೆ ನೊಂದಿದ್ದಾರೆ. ಮುಂಗಾರು ಮತ್ತು ಹಿಂಗಾರು ಹಂಗಾಮಿನ ಹಣದಲ್ಲಿ ಕೆಲವರಿಗೆ ಮುಂಗಾರು, ಇನ್ನೂ ಕೆಲವರಿಗೆ ಹಿಂಗಾರು ಹಣ ಪಾವತಿಯಾಗಿದ್ದು, ರಾಯಚೂರು ಜಿಲ್ಲೆಯ ಪೈಕಿ ಸಿಂಧನೂರು ತಾಲೂಕಿನಲ್ಲಿ ಹೆಚ್ಚು ಜೋಳ ಬೆಳೆದಿದ್ದು, ಅಂದಾಜು 80 ಕೋಟಿ ರೂ. ಬಾಕಿ ಹಣ ಪಾವತಿಸುವಲ್ಲಿ ಸರ್ಕಾರ ವಿಳಂಬದ ನೀತಿ ಅನುಸರಿದೆ. ಆದ್ದರಿಂದ ರೈತರಿಗೆ ನ್ಯಾಯ ದೊರಕಿಸಲು ಜನಪ್ರತಿನಿಧಿಗಳು ಅಧಿವೇಶನದಲ್ಲಿ ಧ್ವನಿಯೆತ್ತಲಿ ಎಂಬ ಕೂಗು ಕೇಳಿಬಂದಿದೆ.

ಸಿಂಧನೂರು ತಾಲೂಕಿನಲ್ಲಿ ಮುಂಗಾರು ಹಾಗೂ ಹಿಂಗಾರು ಹಂಗಾಮಿಗೆ ಸಂಬಂಧಿಸಿದಂತೆ ಮೇ 23ರವರೆಗೆ ಖರೀದಿಸಿರುವ ಜೋಳದ ಹಣ ಪಾವತಿಸಲಾಗಿದೆ. ನಂತರ ಜೂ.15ವರೆಗೆ ಖರೀದಿಸಿರುವ ಜೋಳದ ಹಣ ಬರಬೇಕಿದೆ. ಆದಷ್ಟು ಶೀಘ್ರವೇ ರೈತರ ಖಾತೆಗೆ ಹಣ ಪಾವತಿಯಾಗಲಿದೆ.

— > ಅರುಣ್ ದೇಸಾಯಿ ತಹಸೀಲ್ದಾರ್, ಸಿಂಧನೂರು

ರಾಯಚೂರು ಜಿಲ್ಲೆಯಲ್ಲಿ ಹೆಚ್ಚಿನ ಪ್ರಮಾಣದಲ್ಲಿ ಜೋಳ ಬೆಳೆದಿದ್ದು, ಈ ಪೈಕಿ ಸಿಂಧನೂರು ತಾಲೂಕಿನ ಪಾಲು ಹೆಚ್ಚಿದೆ. ಕಳೆದ ಮೂರು ತಿಂಗಳ ಹಿಂದೆಯೇ ಜೋಳ ಖರೀದಿ ಪ್ರಕ್ರಿಯೆ ಮುಗಿದಿದ್ದು, ಇದುವರೆಗೆ ಹಣ ಪಾವತಿಸಿಲ್ಲ. ಈ ಭಾಗದ ರೈತರು ಕೃಷಿ ಚಟುವಟಿಕೆಗೆ ಜೋಳದ ಹಣ ನಂಬಿಕೊಂಡಿದ್ದಾರೆ. ಕೂಡಲೇ ರೈತರ ಖಾತೆಗೆ ಹಣ ಜಮಾ ಮಾಡಲು ಕ್ರಮಕೈಗೊಳ್ಳಬೇಕು.

— > ಹೊನ್ನನಗೌಡ ಬೆಳಗುರ್ಕಿ ರೈತ ಮುಖಂಡ, ಸಿಂಧನೂರು

ಸಿಂಧನೂರು