ಪಾವತಿಯಾಗದ ಜೋಳ ಖರೀದಿ ಹಣ

ಸಿಂಧನೂರು: ಸರ್ಕಾರವು ಬೆಂಬ ಬೆಲೆ ಯೋಜನೆಯಡಿ ಜೋಳ ಖರೀದಿಗೂ ವಿಳಂಬ ಮಾಡಿದ್ದಲ್ಲದೆ, ಖರೀದಿಸಿದ ನಂತರ ರೈತರಿಗೆ ಹಣ ಪಾವತಿಸಲು ಮೀನಮೇಷ ಎಣಿಸುತ್ತಿದ್ದು, ಬೆಳೆಗಾರರು ಪರದಾಡುವಂತಾಗಿದೆ.

ಫೆಬ್ರವರಿ ಕೊನೆಯಲ್ಲಿ ಹಿಂಗಾರು ಜೋಳ ಕೈಗೆ ಬಂದರೂ ಮುಂಗಾರು ಜೋಳದ ಖರೀದಿ ಕೇಂದ್ರವು ಆರಂಭವಾಗಿರಲಿಲ್ಲ. ರೈತಪರ ಸಂಘಟನೆಗಳು, ಹೋರಾಟ ಮಾಡಿದ ನಂತರ ಮಾರ್ಚ್ ತಿಂಗಳಲ್ಲಿ ಖರೀದಿ ಕೇಂದ್ರಗಳನ್ನು ಆರಂಭಿಸಲಾಯಿತು. ಖರೀದಿ ಪ್ರಕ್ರಿಯೆ ಮುಗಿದು ಈಗಾಗಲೇ ಒಂದೂವರೆ ತಿಂಗಳು ಕಳೆದಿದ್ದು, ಇದುವರೆಗೆ ಹಣ ಪಾವತಿ ಆಗಿಲ್ಲ. ಅಲ್ಲದೆ, ಹಿಂಗಾರಿನಲ್ಲಿ ಕೂಡ ರೈತರು ಜೋಳ ಬೆಳೆದಿದ್ದು, ಇದುವರೆಗೆ ನೋಂದಣಿ ಪ್ರಕ್ರಿಯೆ ನಡೆದಿಲ್ಲ ಎಂಬ ದೂರುಗಳು ಕೇಳಿಬಂದಿವೆ.

ಕಳೆದ ವರ್ಷ ಕೂಡ ಜೋಳಕ್ಕೆ ನುಸಿ ಮತ್ತು ಹುಳು ಬಿದ್ದಿವೆ ಎಂದು ರಾಜ್ಯ ಮತ್ತು ಕೇಂದ್ರ ಸರ್ಕಾರದ ಅಧಿಕಾರಿಗಳು ಜೋಳ ಖರೀದಿ ಮಾಡದೆ ತಿರಸ್ಕರಿಸಿದರು. ಇದರಿಂದ ರೊಚ್ಚಿಗೆದ್ದ ರೈತರು ವಾರಗಟ್ಟಲೆ ತಹಸಿಲ್ ಕಚೇರಿಯ ಮುಖ್ಯ ದ್ವಾರದಲ್ಲಿಯೇ ಜೋಳದ ಚೀಲ ತುಂಬಿದ ಲಾರಿಗಳನ್ನು ನಿಲ್ಲಿಸಿ ಪ್ರತಿಭಟನೆ ಮಾಡಿದ ನಂತರ ರಾಜ್ಯ ಸರ್ಕಾರ ಹಲವು ನಿಯಮಗಳನ್ನು ಸಡಿಲಗೊಳಿಸಿ ಹಿಂಗಾರು ಜೋಳ ಖರೀದಿ ಮಾಡಿತ್ತು. ಈಗ ಮುಂಗಾರು ಜೋಳ ಖರೀದಿ ಮಾಡಿದ್ದರೂ ಈವರೆಗೆ ಹಣ ಪಾವತಿಸಿದ ಕಾರಣ ರೈತರು ತೀವ್ರ ತೊಂದರೆ ಅನುಭವಿಸಬೇಕಾಗಿದೆ.

ಬೀಜ, ಗೊಬ್ಬರ, ಕ್ರಿಮಿನಾಶಕ ಖರೀದಿ, ಸಾಗಣೆ ವೆಚ್ಚಕ್ಕೆ ಮಾಡಿದ ಸಾಲ ತೀರಿಸಲು ಬೆಳೆಗಾರರು ಪರದಾಡುತ್ತಿದ್ದರೆ, ಅಧಿಕಾರಿಗಳು ಮಾತ್ರ ರೈತರಿಗೆ ಪ್ರತಿನಿತ್ಯ ಸಬೂಬು ಹೇಳಿ ಕಾಲ ಕಳೆಯುತ್ತಿದ್ದಾರೆ ಎಂಬುದು ಬೆಳೆಗಾರರ ವಾದವಾಗಿದೆ.

8.16 ಲಕ್ಷ ಕ್ವಿಂಟಾಲ್ ಮಾರಾಟ: ತಾಲೂಕಿನಲ್ಲಿ ಮುಂಗಾರು ಜೋಳ ಖರೀದಿಗೆ ಜ.13ರಿಂದ ನೋಂದಣಿ, ಮಾ.23ರಿಂದ ಖರೀದಿ ಆರಂಭ, ಏ.30ಕ್ಕೆ ಖರೀದಿ ಪ್ರಕ್ರಿಯೆ ಮುಗಿಸಲಾಗಿದ್ದು, ಎಫ್‌ಐಡಿ ಲಾಕ್ ಆಗಿದ್ದ ರೈತರ ಜೋಳ ಖರೀದಿ ಮಾಡಲಾಗುತ್ತಿದೆ. ಒಟ್ಟು 8.16 ಲಕ್ಷ ಕ್ವಿಂಟಾಲ್ ಫಸಲು ರೈತರಿಂದ ಮಾರಾಟವಾಗಿದೆ. ಕಳೆದ ತಿಂಗಳು ಹಣ ಪಾವತಿ ಮಾಡುವುದಾಗಿ ಕೆಎಫ್‌ಸಿ ಹೇಳಿತ್ತು. ಆದರೆ, ಇನ್ನೂ ಹಣ ಪಾವತಿಗೆ ಮುಂದಾಗಿಲ್ಲ. ಒಟ್ಟಿನಲ್ಲಿ ಮುಂಗಾರು-ಹಿಂಗಾರು ಜೋಳ ಖರೀದಿ ಪ್ರಕ್ರಿಯೆಯು ವಿಳಂಬ, ಖರೀದಿ ನಂತರ ರೈತರ ಖಾತೆಗೆ ಹಣ ಪಾವತಿಯಲ್ಲಿಯೂ ವಿಳಂಬ ನೀತಿ ಅನುಸರಿಸುತ್ತಿರುವುದು ರೈತರನ್ನು ಸಂಕಷ್ಟಕ್ಕೆ ದೂಡಿದೆ.

"

ತಾಲೂಕಿನಲ್ಲಿ ಮುಂಗಾರಿನಲ್ಲಿ 8.16 ಲಕ್ಷ ಕ್ವಿಂಟಾಲ್ ಜೋಳ ಖರೀದಿಯಾಗಿದ್ದು, ಏ.30ರವರೆಗೆ ಖರೀದಿಯಾದ ಜೋಳದ ಹಣ ಪಾವತಿಯಾಗಲಿದೆ. ಮುಂದಿನ ದಿನಗಳಲ್ಲಿ ಹಿಂಗಾರು ಖರೀದಿಯ ನೋಂದಣಿಯು ಆರಂಭಗೊಳ್ಳಲಿದೆ. ಆದಷ್ಟು ಶೀಘ್ರವೇ ರೈತರ ಖಾತೆಗೆ ಹಣ ಜಮೆಯಾಗಲಿದೆ.

— > ಭಾನುಪ್ರಕಾಶ ಡಿಎಂ, ಕೆಎಫ್‌ಸಿ, ರಾಯಚೂರು

"

ತಾಲೂಕಿನಲ್ಲಿ ಹೇರಳವಾಗಿ ರೈತರು ಜೋಳ ಬೆಳೆದಿದ್ದು, ಎಲ್ಲರೂ ಖರೀದಿ ಕೇಂದ್ರಕ್ಕೆ ಮಾರಾಟ ಮಾಡಿ ತಿಂಗಳು ಕಳೆದಿದೆ. ಆದರೆ, ರೈತರ ಖಾತೆಗಳಿಗೆ ಮಾತ್ರ ಹಣ ಜಮೆಯಾಗಿಲ್ಲ. ಕೂಡಲೇ ಅಧಿಕಾರಿಗಳು ಮುಂಗಾರಿನ ಜೋಳದ ಹಣ ಪಾವತಿಸುವ ಜತೆಗೆ ಹಿಂಗಾರು ಜೋಳ ಖರೀದಿ ಆರಂಭಿಸಲಿ.

— > ಅಮೀನಪಾಷಾ ದಿದ್ದಗಿ ಪ್ರ.ಕಾರ್ಯದರ್ಶಿ, ಕರ್ನಾಟಕ ರಾಜ್ಯ ರೈತ ಸಂಘ