ಉಪಾಹಾರ ಸೇವಿಸಿ ವಿದ್ಯಾರ್ಥಿನಿಯರು ಅಸ್ವಸ್ಥ

ವಸತಿ ಶಾಲೆಯಲ್ಲಿ 540ಕ್ಕೂ ಅಧಿಕ ವಿದ್ಯಾರ್ಥಿನಿಯರಿದ್ದಾರೆ. ಗುರುವಾರ ಬೆಳಗಿನ ಉಪಾಹಾರಕ್ಕೆ ವೆಜ್ ಪಲಾವ್ ಮಾಡಿದ್ದು, ಕೆಲವರು ತಿಂದಿದ್ದಾರೆ. ಇನ್ನುಳಿದವರು ಹುಳು ಬಂದಿದೆ ಎಂದು ಸೇವಿಸಿಲ್ಲ. ಬಳಿಕ ಚಿತ್ರಾನ್ನ ಮಾಡಿಕೊಡಲಾಗಿದೆ. 

ಈ ಹೊತ್ತಿಗಾಗಲೇ ವಿದ್ಯಾರ್ಥಿನಿಯರು ಹೊಟ್ಟೆ ನೋವು, ವಾಂತಿ, ತಲೆಸುತ್ತಿನಿಂದ ಬಳಲಿದ್ದು, ಕೂಡಲೇ ತಾಯಿ-ಮಕ್ಕಳ ಆಸ್ಪತ್ರೆಗೆ ಚಿಕಿತ್ಸೆಗೆ ಸೇರಿಸಲಾಗಿದೆ. ಮುಖ್ಯ ವೈದ್ಯಾಧಿಕಾರಿ ಡಾ.ಕಾವೇರಿ ಹಾಗೂ ಸಿಬ್ಬಂದಿ ತುರ್ತು ಚಿಕಿತ್ಸೆ ನೀಡಿದರು. ವಿದ್ಯಾರ್ಥಿನಿಯರು ಮಾತನಾಡಿ, ವೆಜ್ ಪಲಾವ್‌ನಲ್ಲಿ ಹುಳುಗಳು ಬಿದ್ದಿದ್ದವು.

ನೋಡದೇ ತಿಂದಿದ್ದರಿಂದಲೇ ಅಸ್ವಸ್ಥರಾದೆವು ಎಂದು ಅಸಮಾಧಾನ ವ್ಯಕ್ತಪಡಿಸಿದರು. ಪ್ರಾಂಶುಪಾಲ ರಾಘವೇಂದ್ರ, ಹಲವು ಗಂಟೆಗಳಾದರೂ ಆಸ್ಪತ್ರೆಗೆ ಬಾರದೆ ನಿರ್ಲಕ್ಷ್ಯ ತೋರಿದ್ದು, ಆಕ್ರೋಶಕ್ಕೆ ಕಾರಣವಾಯಿತು.

ಭೇಟಿ: ವಿದ್ಯಾರ್ಥಿನಿಯರು ಅಸ್ವಸ್ಥರಾಗಿರುವ ವಿಷಯ ತಿಳಿದು ಬಿಜೆಪಿ ಮುಖಂಡ ಕೆ.ಕರಿಯಪ್ಪ ಆಸ್ಪತ್ರೆಗೆ ಭೇಟಿ ನೀಡಿ ಯೋಗಕ್ಷೇಮ ವಿಚಾರಿಸಿ, ಘಟನೆ ಕುರಿತಂತೆ ಅಧಿಕಾರಿಗಳಿಂದ ಮಾಹಿತಿ ಪಡೆದುಕೊಂಡರು. ಸಿಪಿಐಗಳಾದ ವಿನಾಯಕ, ವೀರರಾರೆಡ್ಡಿ, ಪಿಎಸ್‌ಐ ಯರಿಯಪ್ಪ ಭೇಟಿ ನೀಡಿ, ವಿಚಾರಿಸಿದರು.