ಕಸ ವಿಲೇವಾರಿಗೆ ಜಾಗ ಮೇಲಧಿಕಾರಿಗಳಿಗೆ ವರದಿ

ದೇವದುರ್ಗ: ಜಾಲಹಳ್ಳಿ ಹೊರವಲಯದಲ್ಲಿ ಕಸ ವಿಲೇವಾರಿ ಘಟಕ ಸ್ಥಾಪನೆಗೆ ಅಧಿಕಾರಿಗಳ ತಂಡ ಸ್ಥಳ ಪರಿಶೀಲನೆ ನಡೆಸಿತು.

ಪಿಡಿಒ ಲಕ್ಷ್ಮಿ ಅಷ್ಟಗಿ ಮಾತನಾಡಿ, ಜಾಲಹಳ್ಳಿಯಲ್ಲಿ ಐದು ಸಾವಿರ ಜನಸಂಖ್ಯೆ, ಒಂದೂವರೆ ಸಾವಿರಕ್ಕೂ ಅಧಿಕ ಮನೆಗಳು, 300ಕ್ಕೂ ಹೆಚ್ಚು ವಾಣಿಜ್ಯ ಮಳಿಗೆಗಳಿವೆ. ನಿತ್ಯ ಸಂಗ್ರಹಿಸುವ ಕಸ ವಿಲೇವಾರಿಗೆ ಜಾಗದ ಕೊರತೆಯಿದೆ. ಹೀಗಾಗಿ ಮೂರ್ನಾಲ್ಕು ಕಡೆ ಜಾಗ ಪರಿಶೀಲನೆ ಮಾಡಿದ್ದು, ಒಂದು ಜಾಗ ಅಂತಿಮಗೊಳಿಸಿ ಮೇಲಧಿಕಾರಿಗಳಿಗೆ ವರದಿ ನೀಡಲಾಗುವುದು ಎಂದು ತಿಳಿಸಿದರು.

ಕಸ ವಿಲೇವಾರಿಗೆ ಸೂಕ್ತ ನಿವೇಶನ ನೀಡುವಂತೆ ಕೆಲ ತಿಂಗಳ ಹಿಂದೆ ಕಂದಾಯ ಇಲಾಖೆಗೆ ಪತ್ರ ಬರೆದು ಮನವಿ ಮಾಡಲಾಗಿತ್ತು. ಕಂದಾಯ ಇಲಾಖೆ ಅಧಿಕಾರಿಗಳ ಸಮ್ಮುಖದಲ್ಲಿ ಜಾಗ ಪರಿಶೀಲಿಸಲಾಗಿದೆ. ಜಾಗ ಮಂಜೂರಿಗೆ ಕಂದಾಯ ಇಲಾಖೆಗೆ ಪತ್ರ ಬರೆದು ಮನವಿ ಮಾಡಲಾಗುವುದು ಎಂದರು. ಕಂದಾಯ ನಿರೀಕ್ಷಕ ದೇವರೆಡ್ಡಿ ಪಾಟೀಲ್, ಸರ್ವೇಯರ್ ಲಕ್ಷ್ಮಣ, ಗ್ರಾಮ ಆಡಳಿತಾಧಿಕಾರಿ ಸಂತೋಷ ಕುರಿ, ಕರವಸೂಲಿಗಾರ ಮುದ್ದುರಂಗಪ್ಪ ನಾಯಕ ಇತರರಿದ್ದರು.