ಅದಕ್ಷ ಪಿಡಿಒಗಳ ಅಮಾನತಿಗೆ ಶಿಫಾರಸು

ದೇವದುರ್ಗ: ಕುಡಿವ ನೀರು ಪೂರೈಕೆಯಲ್ಲಿ ನಿಷ್ಕಾಳಜಿ, ಜನರ ಸಮಸ್ಯೆ ಸ್ಪಂದಿಸದೆ ಇರುವುದು, ಗ್ರಾಪಂಗೆ ಬಾರದೆ ಸಂಪರ್ಕಕ್ಕೆ ಸಿಗದ ಪಿಡಿಒಗಳನ್ನು ತಕ್ಷಣವೇ ಅಮಾನತು ಮಾಡಲು ಶಿಫಾರಸು ಮಾಡುವಂತೆ ತಾಪಂ ಇಒಗಳಾದ ಬಸವರಾಜ ಹಟ್ಟಿ, ಅಣ್ಣರಾವ್ ನಾಯಕಗೆ ಶಾಸಕಿ ಕರೆಮ್ಮ ಜಿ.ನಾಯಕ ಸೂಚನೆ ನೀಡಿದರು.

ಪಟ್ಟಣದ ತಾಪಂ ಸಭಾಂಗಣದಲ್ಲಿ ಜರುಗಿದ ಕುಡಿವ ನೀರು ಪೂರೈಕೆ ಹಾಗೂ ಅಭಿವೃದ್ಧಿ ಕಾಮಗಾರಿಗಳ ಪ್ರಗತಿ ಪರಿಶೀಲನೆ ಸಭೆ ಅಧ್ಯಕ್ಷತೆವಹಿಸಿ ಸೋಮವಾರ ಅಧಿಕಾರಿಗಳ ವಿರುದ್ಧ ಕಿಡಿಕಾರಿದರು. ಜನರ ಸಮಸ್ಯೆಗೆ ಸ್ಪಂದಿಸದ ಪಿಡಿಒಗಳನ್ನು ನೀವೇಕೆ ಸಹಿಸಿಕೊಂಡಿದ್ದೀರಿ. ನಿಮ್ಮ ಫೋನ್‌ಗೆ ಉತ್ತರಿಸದ, ಮಾತುಕೇಳದ ಪಿಡಿಒಗಳು ಯಾಕೇಬೇಕು ಎಂದು ಪ್ರಶ್ನಿಸಿದ ಶಾಸಕಿ, ತಕ್ಷಣವೇ ಅಂಥ ಪಿಡಿಒಗಳ ಪಟ್ಟಿಮಾಡಿ ವರದಿ ಕೊಡಿ. ನಾನು ಮೇಲಧಿಕಾರಿಗಳಿಗೆ ಸಲ್ಲಿಸಿ ಅಮಾನತು ಮಾಡಿಸುತ್ತೇನೆ ಎಂದು ಖಾರವಾಗಿ ಹೇಳಿದರು.

ದಿನೇ ದಿನೆ ಬಿಸಿಲಿನ ಪ್ರಮಾಣ ಹೆಚ್ಚಾಗುತ್ತಿದ್ದು ಪಟ್ಟಣ ಸೇರಿ ಗ್ರಾಮೀಣ ಭಾಗದಲ್ಲಿ ಕುಡಿವ ನೀರಿನ ಬೇಡಿಕೆ ಹೆಚ್ಚಾಗುತ್ತಿದೆ. ಶುದ್ಧ ಕುಡಿವ ನೀರಿನ ವಿಷಯದಲ್ಲಿ ಪಿಡಿಒಗಳು ನಿರ್ಲಕ್ಷ್ಯ ಮಾಡಬಾರದು. ಅಶುದ್ಧ ನೀರು ಪೂರೈಕೆಯಿಂದ ಜಾಲಹಳ್ಳಿ, ಜಾಡಲದಿನ್ನಿ ಗ್ರಾಪಂನಲ್ಲಿ ನಡೆದ ಅವಘಡ ಮರುಕಳಿಸದಂತೆ ಎಚ್ಚರಿಕೆವಹಿಸಬೇಕು. ನೀರಿನ ಮೂಲಗಳ ರಕ್ಷಣೆಗೆ ಒತ್ತುಕೊಡಬೇಕು. ಬೋರ್‌ವೆಲ್ ರಿಪೇರಿ ಮಾಡಿ ಆರ್‌ಒ ಪ್ಲಾಂಟ್ ಸುಸ್ಥಿತಿಯಲ್ಲಿ ಇರುವಂತೆ ನೋಡಿಕೊಳ್ಳಬೇಕು. ಅಗತ್ಯವೆನಿಸಿದರೆ ಖಾಸಗಿ ಬೋರ್‌ವೆಲ್ ಬಾಡಿಗೆ ಪಡೆಯಿರಿ ಎಂದು ಸೂಚಿಸಿದರು.

ನದಿದಂಡೆ ಗ್ರಾಮಗಳಲ್ಲಿ ಮರಳು ಅಕ್ರಮ ಸಾಗಣೆ ನಡೆಯುತ್ತಿದ್ದು ಪಿಡಿಒಗಳು ಏನು ಮಾಡುತ್ತಿದ್ದೀರಿ. ಮರಳು ರಕ್ಷಣಾ ಸಮಿತಿಯಲ್ಲಿ ಪಿಡಿಒಗಳು ಸದಸ್ಯರಿದ್ದು ಮೇಲಧಿಕಾರಿಗಳಿಗೆ ಮಾಹಿತಿ ನೀಡಬೇಕು.

ಟಿಪ್ಪರ್‌ಗಳ ಓಡಾಟದಿಂದ ರಸ್ತೆ ಹಾಳಾಗುತ್ತಿವೆ. ಇಸ್ಪೀಟ್, ಮಟ್ಕಾ, ಮದ್ಯ ಮಾರಾಟ ತಡೆ ಕೇವಲ ಪೊಲೀಸರ ಕೆಲಸವಲ್ಲ. ನಿಮ್ಮದೂ ಪಾತ್ರವಿದ್ದು ಅವರಿಗೆ ಇಲ್ಲವೆ ನನಗೆ ಮಾಹಿತಿ ಕೊಡಬೇಕು. 15ನೇ ಹಣಕಾಸು ಯೋಜನೆಯ ಅನುದಾನ ಅಂಗವಿಕರಿಗೆ ಬಳಕೆಯಾಗುತ್ತಿಲ್ಲ. ನಿಮಗೆ ಇಷ್ಟ ಬಂದಂತೆ ಹಣ ಖರ್ಚು ಮಾಡದೆ ಅವರಿಗೆ ಪರಿಹರ ವಿತರಿಸಬೇಕು.

ವಿವಿಧ ವಸತಿ ಯೋಜನೆಯಡಿ ಫಲಾನುಭವಿಗಳಿಗೆ ಮನೆ ನಿರ್ಮಾಣಕ್ಕೆ ಹಣ ಜಮಾ ಆಗುತ್ತಿಲ್ಲ. ನೆಪಹೇಳದೆ ಬಡವರಿಗೆ ಹಣ ಜಮಾಮಾಡಿ. ಆಲ್‌ಲೈನ್ ಪ್ರಾಬ್ಲಂ, ಪೆಂಡಿಂಗ್, ನೆಟ್‌ವರ್ಕ್, ಜಿಪಿಎಸ್ ನೆಪಹೇಳಬೇಡಿ. ಈ ವಿಚಾರದಲ್ಲಿ ಬಡವರನ್ನು ಗೊಳಾಡಿಸಿದರೆ ನಾನು ಸಹಿಸಲ್ಲ. ತಕ್ಷಣವೇ ಕಂತಿನ ಹಣಪಾವತಿಗೆ ಕ್ರಮಕೈಗೊಳ್ಳಬೇಕು ಎಂದು ತಾಪಂ ಇಒಗಳಿಗೆ ಸೂಚನೆ ನೀಡಿದರು.

ತಾಪಂ ಇಒ ಬಸವರಾಜ ಹಟ್ಟಿ, ಅರಕೇರಾ ತಾಪಂ ಇಒ ಅಣ್ಣರಾವ್ ನಾಯಕ, ಪಂಚಾಯತ್‌ರಾಜ್ ಸಹಾಯಕ ನಿರ್ದೇಶಕಿ ಮಹೇಶ್ವರಿ, ಪಿಡಿಒಗಳಾದ ಲಕ್ಷ್ಮೀ, ನರಸಪ್ಪ ಜಾಲಹಳ್ಳಿ, ಲಕ್ಷ್ಮೀ ಕಾಂತರೆಡ್ಡಿ, ವೆಂಕಟೇಶ, ಮತಿನುದ್ದೀನ್, ಶಿವಪ್ಪ, ತಿರುಮಲರೆಡ್ಡಿ ಇತರರಿದ್ದರು.