ಹೆಪಟೈಟಿಸ್ ತಡೆಗೆ ಜನಜಾಗೃತಿ ಮೂಡಿಸಿ

 ಸಿಂಧನೂರು: ಹೆಪಟೈಟಿಸ್ ಎಂಬುದು ಯಕೃತ್ತಿಗೆ (ಲಿವರ್) ಉರಿಯೂತ ಉಂಟುಮಾಡುವ ಗಂಭೀರ ಕಾಯಿಲೆಯಾಗಿದ. ಇದರ ಬಗ್ಗೆ ಜನರಿಗೆ ಜಾಗೃತಿ ಮೂಡಿಸುವ ಮೂಲಕ ರೋಗ ತಡೆಗಟ್ಟಲು ಶ್ರಮಿಸಬೇಕು ಎಂದು ಜಿಲ್ಲಾ ಆರೋಗ್ಯ ಅಧಿಕಾರಿ ಡಾ. ನಂದಿತಾ ಎಂ.ಎನ್. ಹೇಳಿದರು.

ನಗರದ ಟಿಎಚ್‌ಒ ಕಚೇರಿ ಸಭಾಂಗಣದಲ್ಲಿ ಜಿಲ್ಲಾಡಳಿತ, ಜಿಪಂ, ಜಿಲ್ಲಾ ಆರೋಗ್ಯ ಇಲಾಖೆ, ತಾಲೂಕು ಆರೋಗ್ಯಾಧಿಕಾರಿಗಳ ಕಚೇರಿ ಹಾಗೂ ಸಾರ್ವಜನಿಕ ಆಸ್ಪತ್ರೆಯಿಂದ ಬುಧವಾರ ಏರ್ಪಡಿಸಿದ್ದ ವಿಶ್ವ ಹೆಪಟೈಟಿಸ್ ದಿನಾಚರಣೆ ಕಾರ್ಯಕ್ರಮದಲ್ಲಿ ಮಾತನಾಡಿದರು. 

ಹೆಪಟೈಟಿಸ್‌ಲ್ಲಿ ಮುಖ್ಯವಾಗಿ ಎ, ಬಿ, ಸಿ, ಡಿ ಮತ್ತು ಇ ಎಂಬ ಐದು ವಿಧದ ವೈರಸ್‌ಗಳಿವೆ. ಹೆಪಟೈಟಿಸ್ ಎ ಮತ್ತು ಇ ಕಲುಷಿತ ನೀರು ಹಾಗೂ ಆಹಾರದ ಮೂಲಕ ಹರಡುತ್ತವೆ. ಹೆಪಟೈಟಿಸ್ ಬಿ ಮತ್ತು ಸಿ ಸೋಂಕಿತ ವ್ಯಕ್ತಿಯ ದೈಹಿಕ ದ್ರವಗಳು, ಅಸುರಕ್ಷಿತ ಸೂಜಿಗಳ ಬಳಕೆ ಹಾಗೂ ಸೋಂಕಿತ ರಕ್ತದ ಮೂಲಕ ಹರಡುವ ಸಾಧ್ಯತೆ ಇದೆ. ಈ ಸೋಂಕುಗಳು ಮುಂದಿನ ಹಂತದಲ್ಲಿ ಲಿವರ್ ಸಿರೋಸಿಸ್, ಲಿವರ್ ಕ್ಯಾನ್ಸರ್ ಹಾಗೂ ಯಕೃತ್ತಿನ ವೈಫಲ್ಯಕ್ಕೆ ಕಾರಣವಾಗಬಹುದು ಎಂದು ತಿಳಿಸಿದರು. 

ಜಿಲ್ಲಾ ಕ್ಷಯರೋಗ ನಿರ್ಮೂಲನಾಧಿಕಾರಿ ಡಾ.ಯಶೋದಾ ಮಾತನಾಡಿ, ಸ್ವಚ್ಛತೆ ಕಾಪಾಡುವುದು, ಶುದ್ಧ ಕುಡಿವ ನೀರು ಹಾಗೂ ಆಹಾರ ಸೇವಿಸುವುದು, ರಕ್ತ ಪೂರಣದ ವೇಳೆ ಅಗತ್ಯ ಮುನ್ನೆಚ್ಚರಿಕೆ ವಹಿಸಬೇಕು. ಬಳಸಿದ ಸೂಜಿಗಳನ್ನು ಮರುಬಳಕೆ ಮಾಡದಿರುವುದು ಮತ್ತು ಹೆಪಟೈಟಿಸ್ ಬಿ ಲಸಿಕೆ ಪಡೆಯುವುದು ಸೋಂಕು ತಡೆಗೆ ಅತ್ಯಂತ ಪರಿಣಾಮಕಾರಿ ಕ್ರಮಗಳಾಗಿವೆ ಎಂದು ತಿಳಿಸಿದರು. 

ಡಾ. ಚಂದ್ರಶೇಖರಯ್ಯ, ಜಿಲ್ಲಾ ಕುಟುಂಬ ಕಲ್ಯಾಣ ಕಾರ್ಯಕ್ರಮ ಅಧಿಕಾರಿ ಡಾ. ಶಿವಕುಮಾರ್ ನಾರಾ, ಟಿಎಚ್‌ಒ ಅಯ್ಯನಗೌಡ, ಸಿಎಂಒ ಡಾ. ಸುರೇಶ ಗೌಡ, ಎಂಸಿಎಚ್ ಸಿಎಂಒ ಡಾ. ಕಾವೇರಿ, ಡಿಎಚ್‌ಇಒ ಈಶ್ವರ ದಾಸಪ್ಪನವರ, ನವೀನ್‌ಕುಮಾರ, ಮಲ್ಲಯ್ಯ ಮಠಮತಿ, ಅಮರೇಶ, ಶ್ರೀನಿವಾಸ, ಸೂಗೂರಪ್ಪ, ರಂಗನಾಥ ಗುಡಿ, ಸಂಗನಗೌಡ ಪಾಟೀಲ್, ಗೀತಾ ಹಿರೇಮಠ, ತ್ರಿವೇಣಿ, ರಾಘವೇಂದ್ರ, ಎಫ್.ಎ. ಹಣಗಿ ಇದ್ದರು.