ದೇವದುರ್ಗ: ತಾಲೂಕಿನ ಗಬ್ಬೂರು ಶ್ರೀಬೂದಿಬಸವೇಶ್ವರ ಜಾತ್ರೆ ನಿಮಿತ್ತ ಆಯೋಜಿಸಿದ್ದ ನಗೆ ಕಲರವ-2026 ಕಾರ್ಯಕ್ರಮ ಜನರು ನೋವನ್ನು ಮರೆಸಿ ನಗೆಗಡಲಲ್ಲಿ ತೇಲಾಡುವಂತೆ ಮಾಡಿತು. ಸಿನಿಮಾ ಕಲಾವಿದ ಅಪ್ಪಣ್ಣ ಅವರ ಸಿನಿಮಾ ಡೈಲಾಗ್, ಕಾಮಿಡಿ ಪಂಚ್, ಕಚಗುಳಿ ಹಾಡು ಜನರನ್ನು ನಗಿಸಿತು. ಇವರಿಗೆ ಕಲಾವಿದರಾದ ವಾಣಿ ಗೌಡ, ಸೂರಜ್ ಸಾಥ್ ನೀಡಿ ವಿವಿಧ ಕಾಮಿಡಿ ದೃಶ್ಯಗಳನ್ನು ಪ್ರದರ್ಶಿಸಿದರು. ಸಾಂಸಾರಿಕ ಹಾಗೂ ಕೌಟುಂಬಿಕ ಜೋಕ್ಗಳು, ಹುಡುಗರು ಹಾಗೂ ಹುಡುಗಿಯರ ನೋವು, ನಲಿವುಗಳು ಹಾಗೂ ಗೃಹಣಿಯರ ಶಕ್ತಿ ಹಾಗೂ ಗಂಡಂದಿರ ಫಜೀತಿ ಬಗ್ಗೆ ಮಾತನಾಡಿ ಜನರನ್ನು ರಂಜಿಸಿದರು. ಅಲ್ಲದೆ ವಿವಿಧ ನೃತ್ಯ ತಂಡಗಳು ಬೆಂಕಿಯೊಂದಿಗೆ ಡ್ಯಾನ್ಸ್ ಮಾಡಿದ್ದು ರೋಮಾಂಚನ ಮೂಡಿಸಿತು. ಜಾದೂಗಾರ ಮಣಿಕಂಠ ಎಸ್.ಎಂ., ವಿವಿಧ ಮ್ಯಾಜಿಕ್ ಮಾಡಿ ಮಕ್ಕಳು, ಮಹಿಳೆಯರನ್ನು ಅಚ್ಚರಿಗೊಳಿಸಿದರು.
