ಎಲ್ಲ ಕಲೆಗಳಿಗೂ ಪ್ರಾಮುಖ್ಯ ನೀಡಲಿ

ತಾಲೂಕಿನ ತಿಂಥಣಿ ಬ್ರಿಡ್ಜ್ ಕಾಗಿನೆಲೆ ಕನಕಗುರುಪೀಠದಲ್ಲಿ ಆಯೋಜಿಸಿದ್ಧ ಹಾಲುಮತ ಸಾಹಿತ್ಯ ಸಮ್ಮೇಳನದ ಸಮಾರೋಪ ಸಮಾರಂಭದ ಸಾನ್ನಿಧ್ಯವಹಿಸಿ ಬುಧವಾರ ಮಾತನಾಡಿದರು. ಮಂಗಳೂರು ಭಾಗದ ಆಚರಣೆ, ದೈವರಾಧನೆಗೆ ರಾಷ್ಟ್ರಮಟ್ಟದಲ್ಲಿ ಮನ್ನಣೆ ಕೊಡಲಾಗುತ್ತಿದೆ. ನಮ್ಮ ಭಾಗದಲ್ಲಿ ಅಂತಹ ನೂರಾರು ಆಚರಣೆ ಪದ್ಧತಿಗಳಿವೆ. ಅವುಗಳಿಗೆ ಬೆಲೆ ಸಿಗುತ್ತಿಲ್ಲ. ಬೆಂಗಳೂರು ಕೇಂದ್ರಿತ, ಮಲೆನಾಡ ಭಾಗದ ಕಲೆಗೆ ಮಾತ್ರಬೆಲೆ ನೀಡಿ ಮಾಸಾಶನ, ಪ್ರೋತ್ಸಾಹಧನ ನೀಡುತ್ತಿದೆ. ಈ ತಾರತಮ್ಯ ನೀತಿಯನ್ನು ಸರ್ಕಾರ ಹೋಗಲಾಡಿಸಬೇಕು ಎಂದರು.

ಹಾಲುಮತ ಸಾಹಿತ್ಯ ಸಮ್ಮೇಳನ ಇದು ವ್ಯಕ್ತಿಯನ್ನು ವೈಭವೀಕರಿಸುವ ಕಾರ್ಯಕ್ರಮವಲ್ಲ. ನಮ್ಮ ಮೂಲಸಂಸ್ಕೃತಿ, ಬಹುಸಂಸ್ಕೃತಿ, ಕಲೆ ಉಳಿಸಿ ಬೆಳೆಸುವ ನಿಟ್ಟಿನಲ್ಲಿ ಈ ವರ್ಷ ರಾಜಕೀಯೇತರ ಕಾರ್ಯಕ್ರಮ ಆಯೋಜಿಸಲಾಗಿದೆ. ಪುರೋಹಿತರು, ಪೂಜಾರಿಗಳಿಗೆ ತರಬೇತಿ ನೀಡಲಾಗಿದೆ. ಕೇವಲ ಶ್ಲೋಕ ಪಠಿಸುವುದು ಪವಿತ್ರವಲ್ಲ, ಸ್ವಚ್ಛ ಮನಸ್ಸಿನಿಂದ ಭಕ್ತಿಯಿಂದ ದೇವರನ್ನು ಪೂಜಿಸುವುದು ನಿಜವಾದ ಭಕ್ತಿಯಾಗಿದೆ. ಇದನ್ನು ಪೂಜಾರಿಗಳು ಅರ್ಥಮಾಡಿಕೊಳ್ಳಬೇಕು ಎಂದು ತಿಳಿಸಿದರು.

ರಾಜ್ಯ ಲೇಖಕಿಯರ ಸಂಘದ ಅಧ್ಯಕ್ಷೆ ಡಾ.ಸುನಂದಮ್ಮ ಮಾತನಾಡಿ, ಹರಿ-ಹರ ಬೇರೆಬೇರೆ ಎನ್ನುವುದು ಏಕಸಂಸ್ಕೃತಿ. ಹರಿ-ಹರ ಒಂದೇ ಎನ್ನುವ ಭಾವನೆಯೇ ಬಹುಸಂಸ್ಕೃತಿ. ಇದನ್ನು ಹಾಲುಮತ ಸಮಾಜ ಮಾಡಿಕೊಂಡು ಬಂದಿದೆ. ಗೋವು ಸಾಗಣೆ, ದನಕಾಯುವ ಜನರು ಗೊಲ್ಲನನ್ನು ಪೂಜಿಸಿದರೆ, ಕುರಿಕಾಯುವರು ಶಿವನನ್ನು ಪೂಜಿಸಿದರು. ಕಾಯಕ ಸಮಾಜ ಇಬ್ಬರು ದೇವರು ಒಂದೇ ಎನ್ನುವ ಭಾವನೆಯಿಂದ ಪೂಜೆ ಮಾಡಿಕೊಂಡು ಬಂದಿದೆ. ಸಮಾಜ ನೋಡುವಂಥ ತಳಮಟ್ಟ ಎನ್ನುವ ಪದ್ಧತಿಯೇ ಬಹಮುಖ ಸಂಸ್ಕೃತಿಯಾಗಿದೆ. ಶೈವರು, ವೈಷ್ಣವರು ಎಂದು ಹರಿ, ಹರನನ್ನು ಬೇರೆಮಾಡುವುದು ತರವಲ್ಲ. ಇದರಿಂದಲೇ ಮೇಲು ಕೀಳು, ಜಾತಿ ವ್ಯವಸ್ಥೆ ದೊಡ್ಡದಾಗುತ್ತಿದೆ ಎಂದರು.

ಹಾಲು, ತುಪ್ಪ ವೈಷ್ಣವ ಸಂಸ್ಕೃತಿಯಲ್ಲಿದ್ದರೆ, ಮಾಂಸಾಹಾರ ಶೈವ ಸಂಸ್ಕೃತಿಯಲ್ಲಿದೆ. ವಿಜ್ಞಾನಪ್ರಕಾರ ಬಿ 12 ವಿಟಮಿನ್ ಮಾಂಸಾಹಾರದಲ್ಲೂ ಇದೆ, ಹಾಲುತುಪ್ಪದಲ್ಲಿಯೂ ಇದೆ. ಆದರೆ, ತಿನ್ನುವ ಆಹಾರ ಪದ್ಧತಿ ಮೇಲೆ ಜಾತಿಕಟ್ಟುವುದು ಸರಿಯಲ್ಲ. ಸಮಾಜದಲ್ಲಿನ ಅನುಲೋಮ, ವಿಲೋಮ ಎನ್ನುವ ಆಚರಣೆಯೇ ವಿಘಟನೆಗೆ ಕಾರಣವಾಗಿದೆ.  ತುಪ್ಪ ತಿನ್ನುವವರು ಶ್ರೇಷ್ಠ, ಮಾಂಸ ತಿನ್ನುವುದು ಕನಿಷ್ಠ ಎನ್ನುವ ತಾರತಮ್ಯ ಹೋದಾಗ ಮಾತ್ರ ಸಮಸಮಾಜ ನಿರ್ಮಾಣ ಸಾಧ್ಯ ಎಂದರು.

ಮೈಸೂರಿನ ಶಿವಾನಂದಪುರಿ ಸ್ವಾಮೀಜಿ, ಆಗತೀರ್ಥದ ರೇವಣಸಿದ್ಧೇಶ್ವರ ಶಾಂತಮಯ ಸ್ವಾಮೀಜಿ, ಮುಖಣಾಪುರದ ಸೋಮಲಿಂಗೇಶ್ವರ ಸ್ವಾಮೀಜಿ ಸಾನ್ನಿಧ್ಯವಹಿಸಿದ್ದರು. ಬುಡಕಟ್ಟು ಜನರ ಸಾಮಾಜಿಕ ಪರಿಸ್ಥಿತಿ ಕುರಿತು ಡಾ.ಮಲ್ಲಿಕಾರ್ಜುನ ಮಾನ್ಪಡೆ, ಹಾಲುಮತ ಬುಡಕಟ್ಟು ಮಹಾಕಾವ್ಯಗಳ ಕುರಿತು ಡಾ.ಶಾಂತಪ್ಪ ಡಂಬಳ ಉಪನ್ಯಾಸ ನೀಡಿದರು. ವಿವಿಧ ಕ್ಷೇತ್ರದ ಸಾಧಕರನ್ನು ಸನ್ಮಾನಿಸಲಾಯಿತು. ಕೆಪಿಎಸ್ಸಿ ಮಾಜಿ ಸದಸ್ಯ ಎಚ್.ಡಿ.ಪಾಟೀಲ್, ವಿಜಯಪುರದ ಅಕ್ಕಮಹಾದೇವಿ ವಿವಿ ಕುಲಸಚಿವ ಬಸವರಾಜ ಲಕ್ಕಣ್ಣನವರ್, ಪ್ರಮುಖರಾದ ಭೀಮಣ್ಣ ಮೇಟಿ, ಬಸವರಾಜ ವಿಭೂತಿಹಳ್ಳಿ, ಎಚ್.ಬಿ.ಮಂಜಪ್ಪ, ಚಂದಪ್ಪ ಬುದ್ದಿನ್ನಿ, ಶರಣಯ್ಯ ಒಡೆಯರ್, ದಮ್ಮೂರು ಸೋಮಪ್ಪ ಇತರರಿದ್ದರು.