ಕಾಯಕ-ದಾಸೋಹ ಸೇವೆ ಸ್ಮರಣೀಯ

ಮಾನ್ವಿ: ಶಿವಶರಣ ಮೇದಾರ ಕೇತಯ್ಯ, ಕಾಯಕದಿಂದ ಬಂದ ಹಣದಲ್ಲಿ ದಾಸೋಹ ನಡೆಸುತ್ತಿದ್ದರು. ಅವರ ಕಾಯಕ ತತ್ವ ಸ್ಫೂರ್ತಿದಾಯಕವಾಗಿದೆ ಎಂದು ಉಪನ್ಯಾಸಕ ಬಸವರಾಜ ಸುಂಕೇಶ್ವರ ಹೇಳಿದರು.

ಪಟ್ಟಣದ ಬಸವಕೇಂದ್ರ, ಮಹಿಳಾ ಮತ್ತು ಯುವ ಬಸವಕೇಂದ್ರದಿಂದ ಹಮ್ಮಿಕೊಂಡಿದ್ದ ಶಿವಶರಣ ಮೇದಾರ ಕೇತಯ್ಯ ಜಯಂತಿ ಮತ್ತು ಮನೆಯಲ್ಲಿ ಮಹಾಮನೆ ಕಾರ್ಯಕ್ರಮದಲ್ಲಿ ಮಾತನಾಡಿದರು. ಮೇದಾರ ಕೇತಯ್ಯ ಅವರು ಬಿದಿರಿನಿಂದ ಮರ-ಪುಟ್ಟಿ ತಯಾರಿಸಿ ಬಂದ ಹಣದಿಂದ ದಾಸೋಹ ನಡೆಸುತ್ತಿದ್ದರು. ಅವರು ಗವರೇಶ್ವರ ಲಿಂಗ ಅಂಕಿತ ನಾಮದಿಂದ ಬರೆದ ಅನೇಕ ವಚನಗಳಿವೆ ಎಂದರು.

ಕಾಯಕ-ದಾಸೋಹ, ಶರಣರ ಶ್ರೇಷ್ಠತೆ ಮತ್ತು ಬಸವಣ್ಣನವರ ಮಹತ್ವವವನ್ನು ಸಾರುತ್ತವೆ. ತಮ್ಮನ್ನು ಮೊರದ ಹೊಲಿವ ಗವರ ಎಂದು ಹೇಳಿಕೊಂಡು, ಕಾಯಕವೇ ಕೈಲಾಸ ಎಂದು ಪ್ರತಿಪಾದಿಸಿ ಗುರು, ಲಿಂಗ, ಜಂಗಮ ಮತ್ತು ಅಷ್ಠಾವರಣಗಳ ಮಹತ್ವವನ್ನು ವಿವರಿಸಿದ್ದಾರೆ. ಅವರ ವಚನಗಳು ನಿಷ್ಠೆ, ಸತ್ಯ, ಶುದ್ಧ ಕಾಯಕ ಮತ್ತು ದಾಸೋಹದ ಜೀವನದರ್ಶನ ನೀಡುತ್ತವೆ. ಶಿವನಿಗಿಂತಲೂ ಶರಣರೇ ಶ್ರೇಷ್ಠ ಎಂದು ಹೇಳುತ್ತ ಬಸವಣ್ಣನವರನ್ನು ಪರದೈವವೆಂದು ಸ್ತುತಿಸಿದರು ಎಂದು ತಿಳಿಸಿದರು.

ಬಸವಕೇಂದ್ರದ ಅಧ್ಯಕ್ಷ ಜಿ.ಎಂ.ರಂಗಪ್ಪ, ಶಶಿಕಲಾ ಪಾಟೀಲ್, ಬೆಟ್ಟಪ್ಪ ಕಸ್ತೂರಿ ಇತರರಿದ್ದರು.