ಹತ್ತಿ ಬೆಳೆಗಾರರಿಗೆ ಬಿಮಾ ಆಘಾತ

ಲಿಂಗಸುಗೂರು: ಕಂದಾಯ ಮತ್ತು ಕೃಷಿ ಇಲಾಖೆಯ ಅಧಿಕಾರಿಗಳ ಸಾಲುಸಾಲು ಎಡವಟ್ಟುಗಳಿಂದಾಗಿ ಪ್ರಸಕ್ತ ಸಾಲಿನ ಮುಂಗಾರು ಹಂಗಾಮಿನಲ್ಲಿ ಹತ್ತಿ ಬೆಳೆದ ತಾಲೂಕಿನ ನೂರಾರು ರೈತರು ಹೈರಾಣಾಗಿದ್ದಾರೆ. ಸರ್ಕಾರದ ಮಹತ್ವಾಕಾಂಕ್ಷೆಯ ಕರ್ನಾಟಕ ರೈತ ಸುರಕ್ಷಾ ಪ್ರಧಾನಮಂತ್ರಿ ಫಸಲ್ ಬಿಮಾ ಯೋಜನೆಯ ಸೌಲಭ್ಯದಿಂದ ರೈತರು ಸಂಪೂರ್ಣ ವಂಚಿತರಾಗುವ ಗಂಭೀರ ಪರಿಸ್ಥಿತಿ ಎದುರಾಗಿದೆ.

ರಾಯಚೂರು ಜಂಟಿ ಕೃಷಿ ನಿರ್ದೇಶಕರು 2026-27ನೇ ಸಾಲಿನ ಮುಂಗಾರು ಹಂಗಾಮಿನ ಯೋಜನೆಯಡಿ ರೈತರು ವಿಮಾ ಮೊತ್ತ ಪಾವತಿಸಿ ಸೌಲಭ್ಯ ಪಡೆಯುವಂತೆ ಕರಪತ್ರಗಳನ್ನು ಹೊರಡಿಸಿ ವ್ಯಾಪಕ ಪ್ರಚಾರ ಕೈಗೊಂಡಿದ್ದಾರೆ. ಪ್ರತಿ ಬೆಳೆಗೆ ಇಂತಿಷ್ಟೇ ವಿಮಾ ಮೊತ್ತ ಎಂದು ನಿಗದಿಪಡಿಸಿ ಅರ್ಜಿ ಸಲ್ಲಿಸಲು ಪ್ರಕಟಣೆಯಲ್ಲಿ ಕೋರಲಾಗಿದೆ. ಈ ಕರಪತ್ರದಲ್ಲಿ ಹತ್ತಿ ನೀರಾವರಿ ಹಾಗೂ ಮಳೆಯಾಶ್ರಿತ ಪ್ರದೇಶದಲ್ಲಿ ಬೆಳೆದ ರೈತರು ವಿಮಾ ಸೌಲಭ್ಯ ಪಡೆಯಬಹುದು ಎಂದು ಸ್ಪಷ್ಟವಾಗಿ ಆದೇಶಿಸಲಾಗಿದೆ.

ಆದರೆ, ಅಸಲಿ ಸಂಗತಿಯೆಂದರೆ ಹತ್ತಿ ಬೆಳೆಗೆ ವಿಮಾ ಸೌಲಭ್ಯ ಕಲ್ಪಿಸಲು ಸರ್ಕಾರದಿಂದ ಯಾವುದೇ ಅಧಿಕೃತ ಅಧಿಸೂಚನೆ ಹೊರಬಿದ್ದಿಲ್ಲ. ಇಂತಹ ಅಧಿಸೂಚನೆ ಇಲ್ಲದಿದ್ದರೂ ಅಧಿಕಾರಿಗಳು ಕರಪತ್ರದಲ್ಲಿ ಲಿಂಗಸುಗೂರು ತಾಲೂಕನ್ನು ಅಳವಡಿಸಿ ದೊಡ್ಡ ಪ್ರಮಾದ ಎಸಗಿದ್ದಾರೆ. ಪರಿಣಾಮವಾಗಿ, ಪ್ರಸ್ತುತ ಹತ್ತಿ ಬಿತ್ತನೆ ಮಾಡಿ ವಿಮಾ ಕಂತು ಪಾವತಿಸಲು ಸಿಎಸ್‌ಸಿ ಕೇಂದ್ರ ಅಥವಾ ಬ್ಯಾಂಕುಗಳಿಗೆ ಅಲೆಯುತ್ತಿರುವ ರೈತರ ಅರ್ಜಿಯನ್ನು ಕಂಪ್ಯೂಟರ್ ತಂತ್ರಾಂಶವು ಸ್ವೀಕರಿಸುತ್ತಿಲ್ಲ.

ಕ್ರಾಪ್ ಸರ್ವೇ ವರದಿಯ ಗೊಂದಲ: ಹೋಬಳಿವಾರು ಹಾಗೂ ಗ್ರಾಪಂವಾರು ಕ್ರಾಪ್ ಸರ್ವೇ ನಡೆಸುವ ಸಂದರ್ಭದಲ್ಲಿ ಕಳೆದ ಎರಡು ವರ್ಷಗಳಿಂದ ಗುರುಗುಂಟ ಹೋಬಳಿಯನ್ನು ಹೊರತುಪಡಿಸಿ, ಲಿಂಗಸುಗೂರು ತಾಲೂಕಿನ ಲಿಂಗಸುಗೂರು, ಮುದಗಲ್ಲ ಮತ್ತು ಮಸ್ಕಿ ತಾಲೂಕಿನ ಮಸ್ಕಿ ಹೋಬಳಿಯ ವ್ಯಾಪ್ತಿಯಲ್ಲಿ 125 ಹೆಕ್ಟೇರ್‌ಗಿಂತ ಹೆಚ್ಚು ಜಮೀನಿನಲ್ಲಿ ಹತ್ತಿ ಬಿತ್ತನೆಯೇ ಆಗಿಲ್ಲ ಎನ್ನುವ ವಿಲಕ್ಷಣ ವರದಿಯನ್ನು ಕಳುಹಿಸಲಾಗಿದೆ. ನಿಯಮಾವಳಿಗಳ ಪ್ರಕಾರ ಇಷ್ಟು ಕಡಿಮೆ ವಿಸ್ತೀರ್ಣ ದಾಖಲಾಗಿರುವುದರಿಂದ ಈ ವರ್ಷ ಹತ್ತಿ ಬೆಳೆಗೆ ವಿಮೆ ಸೌಲಭ್ಯ ದೊರೆಯುವುದಿಲ್ಲ ಎಂದು ಕೃಷಿ ಇಲಾಖೆ ಹಾಗೂ ವಿಮಾ ಕಂಪನಿಯ ಅಧಿಕಾರಿಗಳು ಜಾರಿಕೊಳ್ಳುತ್ತಿದ್ದಾರೆ. ಆದರೆ ಸ್ವತಃ ಕೃಷಿ ಇಲಾಖೆಯ ಬಳಿ ಇರುವ ನೈಜ ವರದಿಯೇ ಬೇರೆ ಕಥೆ ಹೇಳುತ್ತದೆ.

ಇಲಾಖೆಯ ಅಧಿಕೃತ ಅಂಕಿಅಂಶಗಳ ಪ್ರಕಾರ, 2024-25ನೇ ಸಾಲಿನ ಮುಂಗಾರು ಹಂಗಾಮಿನಲ್ಲಿ ಲಿಂಗಸುಗೂರು ಹೋಬಳಿಯಲ್ಲಿ 85 ಹೆಕ್ಟೇರ್, ಮುದಗಲ್ಲ ಹೋಬಳಿಯಲ್ಲಿ 214 ಹೆಕ್ಟೇರ್ ಹಾಗೂ ಗುರುಗುಂಟ ಹೋಬಳಿಯಲ್ಲಿ 907 ಹೆಕ್ಟೇರ್ ಪ್ರದೇಶದಲ್ಲಿ ಹತ್ತಿ ಬಿತ್ತನೆಯಾಗಿತ್ತು. ಇನ್ನು 2025-26ನೇ ಸಾಲಿನಲ್ಲಿ ಈ ಪ್ರಮಾಣ ಗಣನೀಯವಾಗಿ ಹೆಚ್ಚಾಗಿದ್ದು, ಲಿಂಗಸುಗೂರು ಹೋಬಳಿಯಲ್ಲಿ 2,916 ಹೆಕ್ಟೇರ್, ಮುದಗಲ್ ಹೋಬಳಿಯಲ್ಲಿ 1,950 ಹೆಕ್ಟೇರ್ ಮತ್ತು ಗುರುಗುಂಟ ಹೋಬಳಿಯಲ್ಲಿ 1,810 ಹೆಕ್ಟೇರ್ ಪ್ರದೇಶದಲ್ಲಿ ಹತ್ತಿ ಬಿತ್ತನೆ ಮಾಡಲಾಗಿತ್ತು. ಕೃಷಿ ಇಲಾಖೆಯ ಸ್ವಂತ ದಾಖಲೆಗಳಲ್ಲೇ ಸಾವಿರಾರು ಹೆಕ್ಟೇರ್ ಬಿತ್ತನೆಯಾದ ಮಾಹಿತಿ ಇದ್ದರೂ, ಕ್ರಾಪ್ ಸರ್ವ ವರದಿಯಲ್ಲಿ ಮಾತ್ರ ಪ್ರತಿ ಹೋಬಳಿಯಲ್ಲಿ 125 ಹೆಕ್ಟೇರ್‌ಗಿಂತ ಕಡಿಮೆ ಬಿತ್ತನೆಯಾಗಿದೆ ಎಂದು ಉಲ್ಲೇಖಿಸಿರುವುದು ಅಧಿಕಾರಿಗಳ ಬೇಜವಾಬ್ದಾರಿತನಕ್ಕೆ ಹಿಡಿದ ಕನ್ನಡಿಯಾಗಿದೆ.

ಖಾಸಗಿ ನಿವಾಸಿಗಳ ಸಮೀಕ್ಷೆಯ ಪ್ರಮಾದ: ಕಂದಾಯ ಇಲಾಖೆಯು ಜಮೀನುಗಳ ಬೆಳೆ ಸಮೀಕ್ಷೆ ನಡೆಸಲು 2019ನೇ ಸಾಲಿನಿಂದ ಖಾಸಗಿ ನಿವಾಸಿಗಳನ್ನು ನೇಮಕ ಮಾಡಿಕೊಂಡಿದೆ. ಪ್ರತಿ ಎಕರೆ ಸರ್ವೇ ಕಾರ್ಯಕ್ಕೆ ನಿರ್ದಿಷ್ಟ ಹಣ ನಿಗದಿಪಡಿಸಿ ಕೃಷಿ ಇಲಾಖೆಯ ವತಿಯಿಂದಲೇ ಇವರಿಗೆ ಹಣವನ್ನು ಪಾವತಿಸಲಾಗುತ್ತಿದೆ. ಈ ಖಾಸಗಿ ನಿವಾಸಿಗಳು ಪ್ರತಿ ಗ್ರಾಮದ ಜಮೀನುಗಳಿಗೆ ಖುದ್ದಾಗಿ ಭೇಟಿ ನೀಡಿ ಕ್ರಾಪ್ ಸರ್ವೇ ನಡೆಸಿ ವರದಿ ಸಲ್ಲಿಸಬೇಕಿತ್ತು. ಆದರೆ ಅವರು ಕಳೆದ ಎರಡು ವರ್ಷಗಳಲ್ಲಿ ಲಿಂಗಸುಗೂರು, ಮುದಗಲ್ ಹಾಗೂ ಮಸ್ಕಿ ಹೋಬಳಿಗಳಲ್ಲಿ ನಿಗದಿಪಡಿಸಿದ ಗುರಿಯಷ್ಟು ಹತ್ತಿ ಬಿತ್ತನೆಯಾಗಿಲ್ಲ ಎಂದು ತಪ್ಪು ವರದಿಯನ್ನು ನೀಡಿದ್ದಾರೆ.

ಇಷ್ಟಾದರೂ ಕೃಷಿ ಇಲಾಖೆಯ ಉನ್ನತ ಅಧಿಕಾರಿಗಳು ಈ ವರದಿಯನ್ನು ಮರುಪರಿಶೀಲಿಸದೆ ಕಣ್ಣುಮುಚ್ಚಿ ಅಸ್ತು ಎಂದಿದ್ದೇ ಪ್ರಸಕ್ತ ಸಾಲಿನ ಈ ಇಡೀ ಅವಘಡಕ್ಕೆ ಮುಖ್ಯ ಕಾರಣವಾಗಿದೆ. ಸದ್ಯದ ಪರಿಸ್ಥಿತಿಯಲ್ಲಿ 2026ನೇ ಸಾಲಿನಲ್ಲಿ ಹತ್ತಿ ಬೆಳೆದು ಸಂಕಷ್ಟದಲ್ಲಿರುವ ರೈತರಿಗೆ ವಿಮಾ ಮೊತ್ತ ಪಾವತಿಸಲು ಅನುವಾಗುವಂತೆ ತಕ್ಷಣವೇ ಹತ್ತಿ ಬೆಳೆಯ ವಿಶೇಷ ಅಧಿಸೂಚನೆ ಹೊರಡಿಸಬೇಕು ಎಂದು ಲಿಂಗಸುಗೂರು ಕೃಷಿ ಇಲಾಖೆಯ ಸಹಾಯಕ ಕೃಷಿ ನಿರ್ದೇಶಕಿ ಎನ್. ಅವರು ರಾಯಚೂರು ಜಂಟಿ ಕೃಷಿ ನಿರ್ದೇಶಕರಿಗೆ ಶುಕ್ರವಾರ ಪತ್ರ ಬರೆದು ವಿನಂತಿಸಿದ್ದಾರೆ. ಸರ್ಕಾರ ಈಗಲಾದರೂ ಎಚ್ಚೆತ್ತು ಅಧಿಸೂಚನೆ ಹೊರಡಿಸಿದರೆ ಹತ್ತಿ ಬೆಳೆದ ಅನ್ನದಾತರಿಗೆ ದೊಡ್ಡ ನಿರಾಳತೆ ಸಿಗಲಿದೆ.

"

ಲಿಂಗಸುಗೂರು, ಮುದಗಲ್ ಹಾಗೂ ಮಸ್ಕಿ ಹೋಬಳಿಗಳಲ್ಲಿ ಕಳೆದ ಎರಡು ವರ್ಷಗಳಿಂದ ನಿಗದಿಪಡಿಸಿದ ಗುರಿಯಷ್ಟು ಹತ್ತಿ ಬಿತ್ತನೆ ಮಾಡದೆ ಇದ್ದುದರಿಂದ ಮುಂಗಾರು ಹಂಗಾಮಿಗೆ ಅಧಿಸೂಚನೆ ಹೊರಡಿಸಿಲ್ಲ. ರೈತರಿಗೆ ಅನುಕೂಲವಾಗಲು ಅಧಿಸೂಚನೆ ಹೊರಡಿಸುವಂತೆ ಜಂಟಿ ನಿರ್ದೇಶಕರಿಗೆ ಪತ್ರ ಬರೆಯಲಾಗಿದೆ. — > ಡಾ. ಮುತ್ತುರಾಜ ಕೃಷಿ ಉಪ ನಿರ್ದೇಶಕರು, ಲಿಂಗಸುಗೂರು

"

ಅಧಿಸೂಚನೆ ಹೊರಡಿಸದೆ ಇದ್ದುದರಿಂದ ಲಿಂಗಸುಗೂರು, ಮುದಗಲ್ ಹಾಗೂ ಮಸ್ಕಿ ಹೋಬಳಿಯಲ್ಲಿ ಹತ್ತಿ ಬೆಳೆದ ರೈತರ ವಿಮಾ ಮೊತ್ತವನ್ನು ಸ್ವೀಕರಿಸುತ್ತಿಲ್ಲ.

— > ಸುರೇಶಕುಮಾರ ತಾಲೂಕು ಸಂಯೋಜಕ, ಎಸ್‌ಬಿಐ ಜನರಲ್ ಇನ್ಶೂರೆನ್ಸ್ ಕಂಪನಿ