ಉಷ್ಣ ಸಂಬಂಧಿತ ರೋಗಕ್ಕೆ ತಕ್ಷಣ ಚಿಕಿತ್ಸೆ

ತೀವ್ರ ತಾಪಮಾನ ಇರುವುದರಿಂದ ಸಾರ್ವಜನಿಕರಲ್ಲಿ ಸನ್‌ಸ್ಟ್ರೋಕ್, ನಿರ್ಜಲೀಕರಣ, ಶೀತ ಸಂಬಂಧಿತ ರೋಗಗಳು ಬರುತ್ತಿವೆ. ತೀವ್ರವಾದ ಶಾಖದ ಸಮಯದಲ್ಲಿ ಹೀಟ್‌ಸ್ಟ್ರೋಕ್ ಹೆಚ್ಚಾಗಿ ಕಂಡಬರುತ್ತಿದೆ. ಹೀಗಾಗಿ ಮಕ್ಕಳು ಸೇರಿ ಎಲ್ಲ ವಯಸ್ಸಿನವರಿಗೆ ಉಷ್ಣ ಸಂಬಂಧಿತ ರೋಗ ಕಂಡುಬಂದರೆ ಸೂಕ್ತ ಚಿಕಿತ್ಸೆ ನೀಡಲು ಆರು ಹಾಸಿಗೆಯುಳ್ಳ ವಾರ್ಡ್ ಆರಂಭಿಸಲಾಗಿದೆ.

ಆಸ್ಪತ್ರೆಯ ಒಂದು ಕೊಠಡಿಯಲ್ಲಿ ಆರು ಹಾಸಿಗೆ ವ್ಯವಸ್ಥೆ ಮಾಡಿ ಎರಡು ಎಸಿ ಅಳವಡಿಸಲಾಗಿದೆ.

 ತುರ್ತು ಚಿಕಿತ್ಸೆಗೆ ಬರುವ ರೋಗಿಗಳಿಗೆ ಚಿಕಿತ್ಸೆ ನೀಡಲು ವೈದ್ಯರು, ಸಿಬ್ಬಂದಿ ತಂಡವನ್ನು ನಿಯೋಜಿಸಲಾಗಿದೆ. ಈ ವಾರ್ಡ್‌ನಲ್ಲಿ ಉಷ್ಣ ಸಂಬಂಧಿತ ಕಾಯಿಲೆ (ಎಚ್‌ಆರ್‌ಐ)ಗೆ ಮಾತ್ರ ಚಿಕಿತ್ಸೆ ನೀಡಲಾಗುತ್ತಿದೆ. ಚಿಕಿತ್ಸೆ ಜತೆಗೆ ರೋಗಿಗಳು ಬೇಸಿಗೆಯಲ್ಲಿ ಅನುಸರಿಸಬೇಕಾದ ನಿಯಮಗಳ ಮಾಹಿತಿ ನೀಡಲಾಗುತ್ತಿದೆ.

ಪಟ್ಟಣ ಸೇರಿ ತಾಲೂಕಿನಲ್ಲಿ 15 ದಿನಗಳಿಂದ ಬಿಸಿಲಿನ ಪ್ರಖರತೆ ಹೆಚ್ಚಿದ್ದು ಮಕ್ಕಳು ಸೇರಿದಂತೆ ವೃದ್ಧರು ನಾನಾ ಕಾಯಿಲೆಗೆ ತುತ್ತಾಗಿ ತೊಂದರೆ ಅನುಭವಿಸುತ್ತಿದ್ದಾರೆ. ಒಂದು ವಾರದಿಂದ 38 ರಿಂದ 42 ಡಿಗ್ರಿ ಸೆಲ್ಸಿಯಸ್‌ವರೆಗೆ ಉಷ್ಣತೆ ದಾಖಲಾಗಿದೆ. ಅಲ್ಲದೆ ಗಾಳಿಯ ಕಡಿತವಾಗಿದ್ದು ಉಸಿರಾಟದ ತೊಂದರೆ ಕೂಡ ಹೆಚ್ಚಾಗಿದೆ. ರಾತ್ರಿ ವೇಳಿಯೂ ಗಾಳಿ ಇಲ್ಲದೆ ಮಕ್ಕಳು ಸಮಸ್ಯೆ ಅನುಭವಿಸುತ್ತಿದ್ದಾರೆ.

ಕೆಲದಿನಗಳ ಹಿಂದೆ ಅಲ್ಲಲ್ಲಿ ಮಳೆ ಸುರಿದಿದ್ದರಿಂದ ಗಾಳಿ ಕಡಿತವಾಗಿ ಸೆಕೆ ಹೆಚ್ಚಾಗಿದೆ. ಇದರಿಂದ ನಾನಾ ಕಾಯಿಲೆ ಬರುತ್ತಿವೆ. ಈ ಪರಿಸ್ಥಿತಿ ಅರ್ಥ ಮಾಡಿಕೊಂಡು ತಾಲೂಕು ಆರೋಗ್ಯ ಇಲಾಖೆ ಚಿಕಿತ್ಸೆಗಾಗಿ ಹವಾನಿಯಂತ್ರಿತ ಪ್ರತ್ಯೇಕ ವಾರ್ಡ್ ಆರಂಭಿಸಿರುವುದು ಸಾರ್ವಜನಿಕರ ಮೆಚ್ಚುಗೆಗೆ ಕಾರಣವಾಗಿದೆ.