ಹೈಟೆಕ್ ಶೌಚಗೃಹಕ್ಕೆ ಗ್ರಹಣ

ಗಬ್ಬೂರು ಹೋಬಳಿ ಸುತ್ತಲಿನ ಹಳ್ಳಿಗಳ ವಿದ್ಯಾರ್ಥಿಗಳಿಗೆ ಸರ್ಕಾರಿ ಪದವಿ ಪೂರ್ವ ಕಾಲೇಜು ಆಸರೆಯಾಗಿದೆ. ಪ್ರಥಮ, ದ್ವಿತೀಯ ವಿಭಾಗದಲ್ಲಿ 120ಕ್ಕೂ ಹೆಚ್ಚು ವಿದ್ಯಾರ್ಥಿಗಳು ದಾಖಲಾಗಿದ್ದಾರೆ. ಅದರಲ್ಲಿ ಅರ್ಧಕ್ಕಿಂತ ಹೆಚ್ಚು ವಿದ್ಯಾರ್ಥಿನಿಯರಿದ್ದು ಪಾಲಕರು ಹಾಗೂ ವಿದ್ಯಾರ್ಥಿಗಳ ಮನವಿ ಮೇರೆಗೆ ಹೈಟೆಕ್ ಶೌಚಗೃಹ ನಿರ್ಮಿಸಲು 20ಲಕ್ಷ ರೂ. ಅನುದಾನ ಮಂಜೂರು ಮಾಡಲಾಗಿದೆ. ಆದರೆ ಮೂಲ ಉದ್ದೇಶ ಈಡೇರಿಸುವಲ್ಲಿ ವಿಫಲವಾಗಿದೆ.

ಕಾಮಗಾರಿಯನ್ನು ಕೆಆರ್‌ಐಡಿಎಲ್ ಗುತ್ತಿಗೆ ಪಡೆದಿದ್ದು ಕೆಲಸವನ್ನು ಅರೆಬರೆ ಮಾಡಲಾಗಿದೆ. 2023ರಲ್ಲಿ ಕಾಮಗಾರಿ ಆರಂಭವಾಗಿದ್ದು ಮೂರು ವರ್ಷ ಕಳೆದರೂ ಪೂರ್ಣಗೊಳಿಸಿಲ್ಲ. ಗೋಡೆ ನಿರ್ಮಿಸಿ ಛಾವಣಿ ಹಾಕಿದ್ದು ಬಿಟ್ಟರೆ ಯಾವುದೇ ಕೆಲಸ ಮಾಡಿಲ್ಲ. ಅರೆಬರೆ ಕೆಲಸ ಮಾಡಿ ಕೈಬಿಟ್ಟಿದ್ದು ಕಾಮಗಾರಿ ಸಂಬಂಧ ಯಾರನ್ನು ಕೇಳಬೇಕು ಎನ್ನುವುದೇ ವಿದ್ಯಾರ್ಥಿಗಳಿಗೆ ತೋಚುತ್ತಿಲ್ಲ. ಇಷ್ಟಾದರೂ ಯಾವೊಬ್ಬ ಅಧಿಕಾರಿಗಳು ಸ್ಥಳಕ್ಕೆ ಭೇಟಿ ನೀಡಿ ಸಮಸ್ಯೆ ಪರಿಹರಿಸುವ ಗೋಜಿಗೆ ಹೋಗಿಲ್ಲ.

ಅರ್ಧಬಿಲ್ ಮಾಡಿಕೊಂಡ ಕೆಆರ್‌ಐಡಿಎಲ್ ಮತ್ತೆ ತಿರುಗಿ ಈಕಡೆ ನೋಡಿಲ್ಲ. ಗುತ್ತಿಗೆದಾರರು ಕೆಲಸ ಟೆಂಡರ್ ಪಡೆದರೆ ಜನರು, ಪಾಲಕರು ಪ್ರಶ್ನೆ ಮಾಡಬಹುದು. ಆದರೆ, ಕೆಆರ್‌ಐಡಿಎಲ್ ಕಾಮಗಾರಿ ಟೆಂಡರ್ ಪಡೆದಿರುವ ಕಾರಣ ಯಾರನ್ನು ಕೇಳಬೇಕು ಎನ್ನುವುದೇ ಗೊತ್ತಾಗುತ್ತಿಲ್ಲ. ಕಾಲೇಜು ಪ್ರಾಚಾರ್ಯರು ಎರಡ್ಮೂರು ಸಲ ಸಂಬಂಧಿಸಿದ ಇಲಾಖೆಗೆ ಪತ್ರ ಬರೆದಿದ್ದರೂ ಪ್ರತಿಕ್ರಿಯೆ ಬಂದಿಲ್ಲ.

ಶೌಚಗೃಹ ಇಲ್ಲದೆ ವಿದ್ಯಾರ್ಥಿನಿಯರು ತೀವ್ರ ಮುಜುಗರ ಅನುಭವಿಸುತ್ತಿದ್ದಾರೆ. ಬೆಳಗ್ಗೆ 10ರಿಂದ ಸಂಜೆ 4 ಗಂಟೆವರೆಗೆ ತರಗತಿಗಳು ನಡೆಯುತ್ತಿದ್ದು, ಶೌಚಕ್ಕೆ ಸಮಸ್ಯೆ ಎದುರಿಸುತ್ತಿದ್ದಾರೆ. ಬಾಲಕರು ತೆರೆಮರೆ, ಜಾಲಿಪೊದೆಗೆ ಹೋದರೆ ಬಾಲಕಿಯರ ಪರಿಸ್ಥಿತಿ ಹೇಳತೀರದು. ಬಸ್ ನಿಲ್ದಾಣದಲ್ಲಿನ ಶೌಚಗೃಹ ಹಲವು ವರ್ಷಗಳಿಂದ ಮುಚ್ಚಿದೆ. ಹಲವು ವಿದ್ಯಾರ್ಥಿನಿಯರು ಶೌಚಗೃಹ ಸಮಸ್ಯೆಯಿಂದಲೇ ಕಾಲೇಜು ಬಿಡುವ ಸ್ಥಿತಿ ಎದುರಾಗಿದೆ. ಇನ್ನಾದರೂ ಸಂಬಂಧಿಸಿದ ಅಧಿಕಾರಿಗಳು ಎಚ್ಚೆತ್ತು ಕಾಮಗಾರಿ ಪೂರ್ಣಗೊಳಿಸಿ ಅನುಕೂಲ ಮಾಡಿಕೊಡಬೇಕಿದೆ.

"

ಮೂರು ವರ್ಷಗಳ ಹಿಂದೆ ಕಾಮಗಾರಿ ಆರಂಭಿಸಿದ್ದು ಇನ್ನೂ ಪೂರ್ಣಗೊಳಿಸಿಲ್ಲ. ಕೆಆರ್‌ಐಡಿಎಲ್‌ಗೆ ಎರಡ್ಮೂರು ಸಲ ಪತ್ರ ಬರೆದು ಮನವಿ ಮಾಡಿದ್ದೇನೆ. ಸ್ಪಂದನೆ ದೊರೆತಿಲ್ಲ. ಶೌಚಗೃಹ ಇಲ್ಲದೆ ವಿದ್ಯಾರ್ಥಿಗಳು, ಉಪನ್ಯಾಸಕರಿಗೂ ಸಮಸ್ಯೆಯಾಗಿದೆ.

— ಜಗದೀಶ ಪ್ರಾಚಾರ್ಯ, ಸರ್ಕಾರಿ ಪಪೂ ಕಾಲೇಜು, ಗಬ್ಬೂರು

"

ಕೆಆರ್‌ಐಡಿಎಲ್ ಕೈಗೊಂಡ ಬಹುತೇಕ ಕಾಮಗಾರಿಗಳು ಕುಲಗೆಟ್ಟು ಹೋಗಿವೆ. 20 ಲಕ್ಷ ರೂ. ಶೌಚಗೃಹ ಅರೆಬರೆ ಮಾಡಿದ್ದು ಅಧಿಕಾರಿಗಳು ಇತ್ತ ಕಡೆ ಕಣ್ಣೆತ್ತಿಯೂ ನೋಡಿಲ್ಲ. ಶೌಚಗೃಹ ಇಲ್ಲದೆ ವಿದ್ಯಾರ್ಥಿನಿಯರು ಕಾಲೇಜು ಬಿಡುತ್ತಿದ್ದಾರೆ. ಸರ್ಕಾರಿ ಕಾಲೇಜು ಬಗ್ಗೆ ಯಾರಿಗೂ ಕಾಳಜಿಯಿಲ್ಲ.

— ಮಲ್ಲಿಕಾರ್ಜುನ ನಿಜವಂತ ಸ್ಥಳೀಯ ನಿವಾಸಿ, ಗಬ್ಬೂರು