ಗೃಹಜ್ಯೋತಿ ಪರಿಷ್ಕರಣೆ ಕಾರ್ಯ ಚುರುಕು

ತಾಲೂಕಾದ್ಯಂತ 23 ಗ್ರಾಮ ವಿದ್ಯುತ್ ಪ್ರತಿನಿಧಿಗಳು, 13 ಜನ ಮೀಟರ್ ರೀಡರ್, ಏಳು ಜನ ಮಾರ್ಗದಾಳು (ಲೈನ್‌ಮನ್) ಹಾಗೂ ಕಿರಿಯ ಸಹಾಯಕರು ಪರಿಷ್ಕರಣೆ ಕಾರ್ಯದಲ್ಲಿ ತೊಡಗಿದ್ದಾರೆ. ಆನೆಹೊಸೂರು ವಿಭಾಗದಲ್ಲಿ 1927, ಮಾವಿನಭಾವಿ 2990, ಹಟ್ಟಿ 7967, ಗುರುಗುಂಟಾ 1912, ಮುದಗಲ್ 8409, ನಾಗರಹಾಳ 3045 ಸೇರಿ ಒಟ್ಟು 13044 ಆರ್‌ಆರ್ ಸಂಖ್ಯೆ ಹೊಂದಿರುವ ಮನೆಗಳಿದ್ದು, ಜೆಸ್ಕಾಂ ಸಿಬ್ಬಂದಿ ಭೇಟಿ ನೀಡಿ ಪರಿಷ್ಕರಣೆ ಅರ್ಜಿ ನಮೂನೆಯಲ್ಲಿ ಮಾಹಿತಿ ಸಂಗ್ರಹಿಸಲಿದ್ದಾರೆ.

ಗೃಹಜ್ಯೋತಿ ಫಲಾನುಭವಿಗಳು ಆಧಾರ್ ಕಾರ್ಡ್, ವೋಟರ್ ಐಡಿ, ರೇಷನ್ ಕಾರ್ಡ್, ಪಾನ್‌ಕಾರ್ಡ್, ಜಾತಿ ಪ್ರಮಾಣ ಪತ್ರಗಳನ್ನು ಜೆಸ್ಕಾಂ ಸಿಬ್ಬಂದಿಗೆ ಒದಗಿಸಬೇಕು. ಮೀಟರ್ ರೀಡರ್‌ಗಳು ದಾಖಲೆಗಳನ್ನು ಮೊಬೈಲ್ ಅಪ್ಲಿಕೇಷನ್‌ಗೆ ದಾಖಲಿಸಿ, ಗೃಹಜ್ಯೋತಿ ಯೋಜನೆಗೆ ಅರ್ಜಿ ಸಲ್ಲಿಸಲು ನೆರವಾಗಲಿದ್ದಾರೆ. ಅಲ್ಲದೆ ಫಲಾನುಭವಿ ಮೊಬೈಲ್ ಸಂಖ್ಯೆ, ಬಾಡಿಗೆ ಇದ್ದರೆ ಕರಾರುಪತ್ರ, ಫಲಾನುಭವಿಯ ವೃತ್ತಿ ಮಾಹಿತಿ ಫಲಾನುಭವಿಗಳು ಒದಗಿಸಬೇಕು. 

ಅರ್ಜಿ ನಮೂನೆಯಲ್ಲಿ ನೀಡಿದ ಮಾಹಿತಿಯ ಘೋಷಣೆಯಲ್ಲಿ ಖಾತೆಯ ಐಡಿಯನ್ನು ಗೃಹಬಳಕೆಗೆ ಮಾತ್ರ ಬಳಸಲಾಗುತ್ತದೆ. ಬೇರೆ ಯಾವುದೇ ಉದ್ದೇಶಕ್ಕೆ ಬಳಸಿದಲ್ಲಿ ಗೃಹ ಜ್ಯೋತಿ ಯೋಜನೆಯ ಪ್ರಯೋಜನವನ್ನು ರದ್ದುಗೊಳಿಸಿ ಈಗಾಗಲೇ ಪಡೆದಿರುವ ಪ್ರಯೋಜನಗಳನ್ನು ಬಡ್ಡಿಯೊಂದಿಗೆ ಮರುಪಾವತಿಸಲು ಸಿದ್ಧನಿದ್ದೇನೆ ಎಂದು ಪರಿಶೀಲನಾ ಅರ್ಜಿಗೆ ಫಲಾನುಭವಿ ಸಹಿ ಮಾಡಬೇಕಾಗಿದೆ.