ರಸಗೊಬ್ಬರ ಖರೀದಿಗೆ ಎಫ್‌ಐಡಿ

ಲಿಂಗಸುಗೂರು: ಕಾಳಸಂತೆಯಲ್ಲಿ ರಸಗೊಬ್ಬರ ಮಾರಾಟಕ್ಕೆ ಕಡಿವಾಣ ಹಾಕಲು ಮುಂದಾಗಿರುವ ಕೃಷಿ ಇಲಾಖೆ ರೈತರಿಗೆ ಫ್ರೂಟ್ಸ್ ತಂತ್ರಾಂಶದಲ್ಲಿ ಫಾರ್ಮರ್ ಐಡೆಂಟಿಫಿಕೇಷನ್ (ಎಫ್‌ಐಡಿ) ನಂಬರ್ ಕಡ್ಡಾಯಗೊಳಿಸಿದ್ದು, ಪಟ್ಟಾ ಜಮೀನು ಇರದ ಕೃಷಿಕರಿಗೆ ಸಂಕಷ್ಟ ಎದುರಾಗಿದೆ.

ರೈತರು ರಸಗೊಬ್ಬರ ಪಡೆಯಲು ಮಾನದಂಡ ರೂಪಿಸಿದ್ದು, ಕೆ-ಕಿಸಾನ್ ತಂತ್ರಾಂಶದ ಮೂಲಕ ವಿತರಿಸಲಾಗುತ್ತದೆ. ಎಫ್‌ಐಡಿ ಸಂಖ್ಯೆ ಕಡ್ಡಾಯವಾಗಿದ್ದು, ಖಾತೆದಾರರೇ ಖುದ್ದು ಹಾಜರಾಗಿ ಹೆಬ್ಬೆಟ್ಟಿನ ಗುರುತು ನೀಡಬೇಕು. ಆಧಾರ್ ಕಾರ್ಡ್ ಒಟಿಪಿ ನಂಬರ್ ಒದಗಿಸಬೇಕು ಎಂಬ ನಿಯಮ ಮಾಡಲಾಗಿದೆ. ಕಾನೂನುಬದ್ಧವಾಗಿ ವ್ಯಾಪಾರ, ವಹಿವಾಟು ನಡೆಸುವ ಉದ್ದೇಶದಿಂದ ವಿಶೇಷ ನಿಯಮ ರೂಪಿಸಲಾಗಿದೆ.

ಗಾಯದ ಮೇಲೆ ಬರೆ: ರಾಜ್ಯ ಸರ್ಕಾರ ಮುಂಗಾರು ಮಳೆ ಆರಂಭಗೊಳ್ಳುವ ಮೊದಲೇ ರಸಗೊಬ್ಬರ ನೀಡಲು ಎಫ್‌ಐಡಿ ಕಡ್ಡಾಯ ಮಾಡಿರುವುದು ಗಾಯದ ಮೇಲೆ ಬರೆ ಎಳೆದಂತಾಗಿದೆ. ಸುಮಾರು ವರ್ಷಗಳಿಂದ ಅರಣ್ಯ ಭೂಮಿ, ಬಗರ್ ಹುಕುಂ, ಗುತ್ತಿಗೆಗೆ ಭೂಮಿ ಪಡೆದ, ಹಕ್ಕುಪತ್ರ ಇಲ್ಲದ ಹಾಗೂ ದಾಖಲೆಗಳಿಲ್ಲದ ಜಮೀನುಗಳಲ್ಲಿ ವಿವಿಧ ಬೆಳೆಗಳನ್ನು ಬೆಳೆದು ಜೀವನ ನಡೆಸುತ್ತಿರುವ ರೈತರಿಗೆ ತೊಂದರೆಯಾಗಲಿದ್ದು ಹೊಸ ನಿಯಮ, ನಿಬಂಧನೆಗಳ ಬಗ್ಗೆ ರೈತರಿಗೆ ಮಾಹಿತಿ ಇಲ್ಲದೆ ತೊಂದರೆ ಎದುರಾಗಿದೆ.

ಮಾರಾಟಗಾರರಿಗೂ ನಿಬಂಧನೆ: ರಸಗೊಬ್ಬರ ಸೇರಿದಂತೆ ಕೃಷಿ ಪರಿಕರ ಮಾರಾಟಗಾರರಿಗೂ ಕೆಲ ನಿಬಂಧನೆ ವಿಧಿಸಲಾಗಿದೆ. ರೈತರ ಎಫ್‌ಐಡಿ ಪರಿಶೀಲಿಸಿ ನಿಗದಿತ ಪ್ರಮಾಣದಲ್ಲಿ ರಸಗೊಬ್ಬರವನ್ನು ಕೆ-ಕಿಸಾನ್ ತಂತ್ರಾಂಶದ ಮೂಲಕ ವಿತರಿಸಬೇಕು. ಕಡ್ಡಾಯವಾಗಿ ತಮ್ಮ ಮಳಿಗೆಯ ಸೂಚನಾ ಫಲಕದಲ್ಲಿ ರಸಗೊಬ್ಬರ ದರಪಟ್ಟಿ ಪ್ರದರ್ಶಿಸಬೇಕು. ಗರಿಷ್ಠ ಮಾರಾಟ ದರ ಮೀರದಂತೆ ರಸಗೊಬ್ಬರ ನಿಯಂತ್ರಣ ಆದೇಶದ ಮಾನದಂಡಗಳನ್ವಯ ವಿತರಿಸಲು ಕೃಷಿ ಇಲಾಖೆ ಸೂಚಿಸಿದೆ.

ನೋಂದಣಿ ಹೇಗೆ ?: ಪ್ರತಿ ರೈತ ತಮ್ಮ ಆಧಾರ್ ಕಾರ್ಡ್, ಪಹಣಿ, ಜಾತಿ ಪ್ರಮಾಣ ಪತ್ರ, ಫೋಟೋ ಮತ್ತು ಬ್ಯಾಂಕ್ ಪಾಸ್‌ಬುಕ್ ತೆಗೆದುಕೊಂಡು ಹತ್ತಿರದ ರೈತ ಸಂಪರ್ಕ ಕೇಂದ್ರ, ತೋಟಗಾರಿಕೆ ಇಲಾಖೆ ಅಥವಾ ಪಶು ಸಂಗೋಪನೆ ಇಲಾಖೆಗೆ ಭೇಟಿ ನೀಡಿ ಎಫ್‌ಐಡಿ ಮಾಡಿಸಬಹುದು. ಈ ಎಫ್‌ಐಡಿ ನಂಬರ್ ಬಂದ ನಂತರ ರಸಗೊಬ್ಬರ ಹಾಗೂ ಇತರ ಸೌಲಭ್ಯಗಳನ್ನು ಪಡೆಯಬಹುದಾಗಿದೆ.

"

ಕಳೆದ 25 ವರ್ಷಗಳಿಂದ ಬಗರ್‌ಹುಕುಂ ಜಮೀನಿನಲ್ಲಿ ರೈತರು ಸಾಗುವಳಿ ಮಾಡುತ್ತ ಬಂದಿದ್ದಾರೆ. ರಸಗೊಬ್ಬರ ಕೊಳ್ಳಲು ಎಫ್‌ಐಡಿ, ಪಹಣಿ ಕೊಡಬೇಕೆಂಬ ಮಾಹಿತಿ ಗೊತ್ತಿಲ್ಲ. ದಾಖಲೆ ಇಲ್ಲದ ರೈತರನ್ನೂ ಗಣನೆಗೆ ತೆಗೆದುಕೊಂಡು ಗೊಬ್ಬರ ನೀಡಬೇಕು. ಅಥವಾ ಹಳೆಯ ಪದ್ಧತಿ ಮುಂದುವರಿಸಬೇಕು.

— ಶಿವಪುತ್ರಗೌಡ ನಂದಿಹಾಳ ಜಿಲ್ಲಾಧ್ಯಕ್ಷ, ರೈತ ಸಂಘ ಹಾಗೂ ಹಸಿರು ಸೇನೆ

ರೈತರಿಗೆ ಬೀಜ, ರಸಗೊಬ್ಬರದ ಕೊರತೆ ಇಲ್ಲ. ಎಫ್‌ಐಡಿ ಪ್ರಕಾರವೇ ರಸಗೊಬ್ಬರ ವಿತರಿಸಲಾಗುವುದು. ಕಾಳಸಂತೆಯಲ್ಲಿ ರಸಗೊಬ್ಬರ ಮಾರಾಟಕ್ಕೆ ಕಡಿವಾಣ ಹಾಕಲು ಎಫ್‌ಐಡಿ ಕಡ್ಡಾಯಗೊಳಿಸಲಾಗಿದೆ.

— ಡಾ.ಎಸ್.ಮುತ್ತುರಾಜು ಉಪನಿರ್ದೇಶಕ, ಕೃಷಿ ಇಲಾಖೆ, ಲಿಂಗಸುಗೂರು