ಜಾತ್ರೆ, ಉತ್ಸವಗಳು ಕಲಾವಿದರಿಗೆ ಉತ್ತಮ ವೇದಿಕೆ

ತಾಲೂಕಿನ ಜಾನೇಕಲ್ ಗ್ರಾಮದಲ್ಲಿ ಭಾನುವಾರ ಜೀವೈಕ್ಯ ವಿಜಯರುದ್ರ ಸ್ವಾಮಿಗಳ ಮಠದಲ್ಲಿ ಸ್ವಾಮಿಗಳ 11ನೇ ವರ್ಷದ ಜಾತ್ರೋತ್ಸವ ಅಂಗವಾಗಿ ಎಮ್ಮಿಗನೂರು ಜಡೆಸಿದ್ಧೇಶ್ವರ ಸ್ವಾಮಿ ಪುರಾಣ ಪ್ರವಚನ ಮಹಾಮಂಗಲ ಕಾರ್ಯಕ್ರಮದ ಸಮಾರೋಪ ಸಮಾರಂಭದಲ್ಲಿ ಮಾತನಾಡಿದರು. ಹಿಂದೂ ಸಮಾಜದಲ್ಲಿ ಹಬ್ಬ ಮತ್ತು ಉತ್ಸವಗಳು, ಜಾತ್ರೆಗಳು, ಅನೇಕ ವಿದ್ವಾಂಸರು, ಕಲಾವಿದರಿಗೆ ಉತ್ತಮ ವೇದಿಕೆ ಒದಗಿಸುತ್ತವೆ ಮತ್ತು ನಮ್ಮ ಸಂಪ್ರದಾಯ, ಪರಂಪರೆಯನ್ನು ಮುಂದಿನ ಪಿಳಿಗೆಗೆ ಕೊಂಡೊಯ್ಯುತ್ತವೆ ಎಂದರು.

ಜಾನೇಕಲ್ ಗ್ರಾಮದಲ್ಲಿ ವಿಜಯರುದ್ರ ಶ್ರೀಗಳು ಜೀವೈಕ್ಯರಾಗಿ ಗ್ರಾಮದ ಭಕ್ತರನ್ನು ಉದ್ಧಾರ ಮಾಡುತ್ತಿದ್ದಾರೆ ಹಾಗೂ ಅನೇಕ ಲೀಲೆಗಳನ್ನು ತೋರುತ್ತ ಭಕ್ತರನ್ನು ಧರ್ಮ ಮಾರ್ಗದಲ್ಲಿ ನಡೆಯುವಂತೆ ಶ್ರೀಗಳು ಅನುಗ್ರಹ ನೀಡುತ್ತ ಬಂದಿದ್ದಾರೆ. ಮುಂದಿನ ವರ್ಷದ ಜಾತ್ರೆಗೆ ರಥ ನಿರ್ಮಾಣಕ್ಕೆ ಚಾಲನೆ ನೀಡಲಾಗಿದ್ದು, ಶ್ರೀಮಠದಿಂದ 25 ಸಾವಿರ ರೂ. ಆರ್ಶೀವಾದ ರೂಪದಲ್ಲಿ ನೀಡುತ್ತೇವೆ. ಭಕ್ತರು ಸಂಕಲ್ಪ ಮಾಡಿಕೊಂಡು ರಥ ನಿರ್ಮಾಣ ಮಾಡುವಂತೆ ತಿಳಿಸಿದರು.

ಖರಾಬದಿನ್ನಿ ಶ್ರೀ ದೊಡ್ಡ ಬಸಯ್ಯಶಾಸ್ತ್ರಿ ಪ್ರವಚನ ನೀಡಿದರೆ, ಶರಣಯ್ಯಸ್ವಾಮಿ ಸೋಮನಾಳ ಸಂಗೀತ ಸೇವೆ, ಆರ್.ಪಿ. ಮಲ್ಲಿನಾಥ ಸ್ವಾಮಿ ತಬಲಾ ಸಾಥ್ ನೀಡಿದರು. ಅಮರೇಶ ಗವಾಯಿ ಚಿಕ್ಕಕೋಟ್ನೆಕಲ್ ಗಾಯನ ನಡೆಸಿಕೊಟ್ಟರು. ಸಂಜೆ ಗ್ರಾಮದ ಪ್ರಮುಖ ಬೀದಿಗಳಲ್ಲಿ ಉಚ್ಚಾಯ ಮಹೋತ್ಸವ ನಡೆಯಿತು. ಮಾಜಿ ಶಾಸಕ ಬಸವನಗೌಡ ಬ್ಯಾಗವಾಟ, ಡಾ.ಶರಣಪ್ಪ ಬಲ್ಲಟಗಿ, ಡಾ.ಚಂದ್ರಶೇಖರ ಸುವರ್ಣಗಿರಿ ಮಠ, ಮುಪ್ಪಿನ ದೇವಿ ದೇವಸ್ಥಾನದ ಪೀಠಾಧ್ಯಕ್ಷ ಪ್ರಭುಸ್ವಾಮೀಜಿ, ವೀರಭದ್ರಗೌಡ ಭೋಗಾವತಿ, ಶರಣಪ್ಪಗೌಡ ನಕ್ಕುಂದಿ, ಜೆ.ಎಂ. ಶರಣಯ್ಯಸ್ವಾಮಿ, ಗ್ರಾಪಂ ಸದಸ್ಯರಾದ ಮೌನೇಶಗೌಡ, ರಾಮನಗೌಡ ಪೊಪಾ, ನೀಲಪ್ಪಗೌಡ, ಬಸವರಾಜಪ್ಪ ಹೊಸಗೌಡ, ರೈತ ಸಂಘದ ಬಸವರಾಜ ಮಾಲಿಪಾಟೀಲ್, ಲಿಂಗರೆಡ್ಡಿ ಮಾಲಿಪಾಟೀಲ್, ಅಮರೇಗೌಡ ಮಾಲಿಪಾಟೀಲ್, ಶ್ರೀಮಠದ ಸೂಗುರಯ್ಯಸ್ವಾಮಿ ಇತರರಿದ್ದರು.