ಮೌಢ್ಯ ಬಿತ್ತಿ ವಂಚಿಸುವ ಮಾಲೀಕರು

ಸಿಂಧನೂರು: ಸಮಾಜದಲ್ಲಿ ಶ್ರೀಮಂತಿಕೆ ಹೆಚ್ಚಿಸುವಲ್ಲಿ ಕಾರ್ಮಿಕರ ಶ್ರಮ ಹೆಚ್ಚಿದ್ದು, ಅವರೇ ಈ ಸಂಪತ್ತಿನ ನಿಜವಾದ ವಾರಸುದಾರರಾಗಿದ್ದಾರೆ ಎಂದು ಕಾರ್ಮಿಕ ಸಂಘಟನೆ ಪ್ರಮುಖ ಎಚ್.ಎನ್.ಬಡಿಗೇರ ತಿಳಿಸಿದರು.

ನಗರದಲ್ಲಿ ಶ್ರಮಜೀವಿ ಎಪಿಎಂಸಿ ಹಮಾಲರ ಸಂಘದ ನೇತೃತ್ವದಲ್ಲಿ ಹಮ್ಮಿಕೊಂಡಿದ್ದ ಅಂತಾರಾಷ್ಟ್ರೀಯ ಕಾರ್ಮಿಕ ದಿನಾಚರಣೆ ಕಾರ್ಯಕ್ರಮದಲ್ಲಿ ಮಾತನಾಡಿದರು. ಬಂಡವಾಳಶಾಹಿಗಳು ಮತ್ತು ಭೂ ಮಾಲೀಕರು ಕಾರ್ಮಿಕರ ಮಧ್ಯೆ ಮೌಢ್ಯ ಬಿತ್ತಿ ಮೋಸ ಮಾಡುತ್ತ ಬಂದಿದ್ದಾರೆ. ಸರ್ಕಾರಗಳು ತಮ್ಮ ನೀತಿ, ನಡಾವಳಿಗಳಲ್ಲಿ ಸಹ ಬಂಡವಾಳಶಾಹಿಗಳ ಪರ ಕಾನೂನುಗಳನ್ನು ಜಾರಿ ಮಾಡುವ ಮೂಲಕ ಕಾರ್ಮಿಕರ ಹಕ್ಕುಗಳನ್ನು ರದ್ದುಗೊಳಿಸುತ್ತಿವೆ. ಇಂಥ ಸರ್ಕಾರ ಮತ್ತು ವಂಚನೆಯ ಆಳುವ ವರ್ಗವನ್ನು ಸಂಪೂರ್ಣ ಕಿತ್ತೊಗೆಯಬೇಕು ಎಂದರು.

ಮನುಜಮತ ಬಳಗ ಕಾರ್ಯದರ್ಶಿ ಬಸವರಾಜ ಬಾದರ್ಲಿ ಮಾತನಾಡಿ, ಅಂತಾರಾಷ್ಟ್ರೀಯ ಕಾರ್ಮಿಕ ವರ್ಗ ಐಕ್ಯಗೊಳ್ಳುವ ಅವಶ್ಯಕತೆ ಇದೆ. ಸರ್ಕಾರದ ನಾಲ್ಕು ಕಾರ್ಮಿಕ ಸಂಹಿತೆಗಳ ವಿರುದ್ಧ ಹೋರಾಟಗಳನ್ನು ರೂಪಿಸಬೇಕು ಎಂದು ತಿಳಿಸಿದರು.

ಉಪನ್ಯಾಸಕರಾದ ರಾಮಣ್ಣ ಹಿರೇಬೇರ‌್ಗಿ, ನಾರಾಯಣ ಬೆಳಗುರ್ಕಿ ಮಾತನಾಡಿದರು. ಹಮಾಲರ ಸಂಘದ ಅಧ್ಯಕ್ಷ ಮಾಬುಸಾಬ್ ಬೆಳ್ಳಟ್ಟಿ, ಉಪಾಧ್ಯಕ್ಷರಾದ ನಾಗಪ್ಪ ಉಮಲೂಟಿ, ಮೇಸ್ತ್ರಿ ರಾಮಣ್ಣ, ವೇರ್‌ಹೌಸ್ ಕಾರ್ಮಿಕ ಸಂಘದ ಅಧ್ಯಕ್ಷ ವೆಂಕಟೇಶ, ಮಹಿಳಾ ಅಧ್ಯಕ್ಷೆ ಅಂಬಮ್ಮ, ಉಪನ್ಯಾಸಕ ಶಂಕರ್ ವಾಲೀಕಾರ ಇದ್ದರು.

ದಾರಿ ತೋರಿದ ದಿನ: ಕಾರ್ಮಿಕ ಕ್ರಾಂತಿ ಜಗತ್ತಿನ ದುಡಿಯುವ ವರ್ಗಕ್ಕೆ ಸ್ಫೂರ್ತಿಯ ಶಕ್ತಿ. 18 ತಾಸು ದುಡಿಸಿಕೊಂಡು ಅತ್ಯಂತ ಕ್ರೂರ ಶ್ರಮ ಶೋಷಣೆ ವಿರುದ್ಧ ಸಮರ ಸಾರಿದ ದಿನ ಇದಾಗಿದೆ. ಜಗತ್ತಿನ ಕಾರ್ಮಿಕ ವರ್ಗಕ್ಕೆ ದಿಕ್ಕು ತೋರಿಸಿದೆ ಎಂದು ಸಿಪಿಐ (ಎಂಎಲ್) ಮಾಸ ಲೈನ್ ರಾಜ್ಯಕಾರ್ಯದರ್ಶಿ ಡಿ.ಎಚ್.ಪೂಜಾರ್ ಹೇಳಿದರು. ನಗರದ ಟ್ರೇಡ್ ಯೂನಿಯನ್ ಸೆಂಟರ್ ಆಫ್ ಇಂಡಿಯಾ ಜಿಲ್ಲಾ ಸಮಿತಿ ನೇತೃತ್ವದಲ್ಲಿ ಶುಕ್ರವಾರ ಹಮ್ಮಿಕೊಂಡಿದ್ದ ವಿಶ್ವ ಕಾರ್ಮಿಕ ದಿನಾಚರಣೆ ಕಾರ್ಯಕ್ರಮದಲ್ಲಿ ಮಾತನಾಡಿದರು.

ಕೆಆರ್‌ಎಸ್ ತಾಲೂಕು ಅಧ್ಯಕ್ಷ ರಮೇಶ ಪಾಟೀಲ್ ಬೇರ‌್ಗಿ ಮಾತನಾಡಿದರು. ಸಿಪಿಐ (ಎಂಎಲ್ ) ಮಾಸ್‌ಲೈನ್ ತಾಲೂಕು ಅಧ್ಯಕ್ಷ ಯಲ್ಲಪ್ಪ ಭಜಂತ್ರಿ, ಹಮಾಲರ ಸಂಘ 7ನೇಮೈಲ್‌ಕ್ಯಾಂಪ್ ಅಧ್ಯಕ್ಷ ಬಸಪ್ಪ ಕಡಬೂರ, ನಿರುಪಾದಿ, ರಾಮಣ್ಣ ವೀರಾಪುರ, ಹನುಮಂತ, ಪಂಪಣ್ಣ ಯರದೊಡ್ಡಿ, ಶ್ರೀಶೈಲ ಮಲ್ಲಿಕಾರ್ಜುನ ಹಮಾಲರ ಸಂಘದ ಕಲ್ಮಂಗಿ ಅಧ್ಯಕ್ಷ ಬಸವರಾಜ ಗುಂಡದ, ಶರಣಪ್ಪ ಲಿಂಗದಹಳ್ಳಿ, ಶರಣೇಗೌಡ ಹಳೇಮನಿ, ಮಲ್ಲಿಕಾರ್ಜುನ ಲಿಂಗದಹಳ್ಳಿ, ರಡ್ದೆಪ್ಪ ಮುಲಿಮನಿ, ಮಲ್ಲಿಕಾರ್ಜುನ ಮೈಲಾಪುರ ಇತರರಿದ್ದರು.