ಬೇಡಿಕೆ ಇಳಿಕೆ-
ಪ್ರಸಕ್ತ ಬೇಸಿಗೆಯಲ್ಲಿ ರಾಜ್ಯದ ದೈನಂದಿನ ಬೇಡಿಕೆಯು 18,800 ಮೆವಾ ವರೆಗೆ ತಲುಪಿ ಆತಂಕ ಮೂಡಿಸಿತ್ತು. ಜಲಾಶಯಗಳು ಬರಿದಾಗಿದ್ದರಿಂದ ಜಲ ವಿದ್ಯುತ್ ಘಟಕಗಳಲ್ಲಿ ಉತ್ತಾದನೆ ನಿಂತಿತ್ತು. ಥರ್ಮಲ್ ಘಟಕಗಳ ಮೇಲೆಯೇ ಒತ್ತಡ ಹೆಚ್ಚಾಗಿತ್ತು. ಉತ್ಪಾದನೆಯ ಒತ್ತಡದಿಂದಾಗಿ ಅನೇಕ ಸಲ ತಾಂತ್ರಿಕ ಸಮಸ್ಯೆಯಿಂದಾಗಿ ಘಟಕಗಳು ಉತ್ಪಾದನೆ ಸ್ಥಗಿತಗೊಳಿಸಿದ ಪ್ರಸಂಗಗಳು ನಡೆದಿದ್ದವು. ಕುಡಿಯುವ ನೀರು, ಕೃಷಿಗೂ ಥರ್ಮಲ್ ವಿದ್ಯುತ್ ಮೇಲೆ ನಿರ್ಭರ ಆಗುವಂತಾಗಿತ್ತು. ಪರಿಣಾಮ ಕೆಲ ವೇಳೆ ಅಘೋಷಿತ ಲೋಡ್ ಶೆಡ್ಡಿಂಗ್ ಅನುಭವಿಸುವಂತಾಗಿತ್ತು. ದೈನಂದಿನ ಬೇಡಿಕೆಯು 20,000ಮೆವಾ ನಿಂದ ಈಗ 13 ಸಾವಿರ ಮೆವಾ ಗೆ ಇಳಿದಿದೆ. ಪರಿಣಾಮ ವಿದ್ಯುತ್ ಕಡಿತದ ಸಮಸ್ಯೆಯೂ ನಿವಾರಣೆಯಾಗಿದೆ ಅಷ್ಟೇ ಅಲ್ಲ ರಾಜ್ಯದಲ್ಲಿ ಬೇಸಿಗೆಯಲ್ಲಿ ನಿರಂತರ ವಿದ್ಯುತ್ ಉತ್ಪಾದನೆಯಲ್ಲಿ ತೊಡಗಿದ್ದ ಶಕ್ತಿನಗರ ಹಾಗೂ ಯರಮರಸ್‌ನಲ್ಲಿ ಉತ್ಪಾದನೆ ತಗ್ಗಿಸಲಾಗಿದೆ.

ರಾಜ್ಯಾದ್ಯಂತ ಮಳೆಯ ಅಬ್ಬರ-
ರಾಜ್ಯದಲ್ಲಿ ಜನವರಿ ಅಂತ್ಯದಿಂದಲೇ ವಿದ್ಯುತ್ ಬೇಡಿಕೆ ಏರಿಕೆಯಾಗಿ ಆತಂಕ ಸೃಷ್ಟಿಸಿತ್ತು. ಕಳೆದ ತಿಂಗಳು ಬಿಸಿಲ ತಾಪದಿಂದ ವಿದ್ಯುತ್ ಬೇಡಿಕೆ 18,800 ಮೆವಾ ಗೆ ತಲುಪಿತ್ತು. ಕೃಷಿಯಲ್ಲೂ ಪಂಪ್‌ಸೆಟ್ ಬಳಕೆ ಹೆಚ್ಚಳದಿಂದ ಬೇಡಿಕೆ ಗಗನಕ್ಕೇರಿತ್ತು. ಕಳೆದೊಂದು ವಾರದಿಂದ ನಾನಾ ಕಡೆ ದಿನವೂ ಸಂಜೆಯಾಗುತ್ತಿದ್ದಂತೆಯೇ ಧಾರಾಕಾರ ಮಳೆ ಸುರಿಯುತ್ತಿದ್ದು ಅದರಿಂದ ಕೃಷಿ ಹಾಗೂ ವಾಣಿಜ್ಯ, ಗೃಹ ಬಳಕೆ ವಿದ್ಯುತ್‌ನಲ್ಲಿ ಇಳಿಕೆ. ಮುಂಗಾರು ಪೂರ್ವ ಮಳೆಯಿಂದ ವಾತಾವರಣದಲ್ಲಿ ತಾಪಮಾನ ತುಸು ಇಳಿಕೆಯಾಗಿ ಎಸಿ,ಕೂಲರ್ ಗೃಹ ಬಳಕೆಯಲ್ಲಿ ಕಡಿತ ಆಗಿರೋದರಿಂದ ಬೇಡಿಕೆ ಕುಸಿದಿದೆ.

ತಾಪಮಾನ ಇಳಿಕೆ-
ಉತ್ತರ ಒಳನಾಡು, ಕರಾವಳಿ ಸೇರಿ ರಾಜ್ಯದ ವಿವಿಧೆಡೆ ಹಗುರದಿಂದ ಸಾಧಾರಣ ಮಳೆಯಾಗಿರುವುದರಿಂದ ರಾಜ್ಯದ ಎಲ್ಲಾ ಜಿಲ್ಲೆಗಳಲ್ಲಿ ತಾಪಮಾನದಲ್ಲಿ 3 ರಿಂದ 5 ಡಿಗ್ರಿ ಸೆಲ್ಸಿಯಸ್‌ನಷ್ಟು ಇಳಿಕೆಯಾಗಿದೆ. ಭಾರೀ ಬಿಸಿಲಿನಿಂದ ಕಂಗೆಟ್ಟಿದ್ದ ಜನತೆ ಸ್ವಲ್ಪ ನಿರಾಳರಾಗಿದ್ದಾರೆ. ರಾಜ್ಯದ ವಿವಿಧೆಡೆ ಮಳೆಯಾಗುತ್ತಿದ್ದು, ಗರಿಷ್ಠ ತಾಪಮಾನವು 40 ಡಿಗ್ರಿ ಸೆಲ್ಸಿಯಸ್‌ಗಿಂತ ಕೆಳಕ್ಕೆ ಇಳಿದಿದೆ. ರಾಯಚೂರು ಮತ್ತು ಸುತ್ತಮುತ್ತಲಿನಲ್ಲಿ ಮೋಡ ಕವಿದ ವಾತಾವರಣ ಮತ್ತು ತಂಪಾದ ಗಾಳಿ ಬೀಸುವ ಮೂಲಕ ಬಿಸಿಲಿನ ತಾಪಮಾನ ತಗ್ಗಿದೆ.