ಅಧಿಕಾರಿಗಳ ವಿರುದ್ಧ ಹತ್ತಿ ರೈತರ ಆಕ್ರೋಶ

ಸಭೆ ಆರಂಭದಲ್ಲೇ ಶಾಸಕಿ ಕರೆಮ್ಮ ಜಿ.ನಾಯಕ ಮುಂದೆ ರೈತರು ಸಮಸ್ಯೆಗಳ ಸುರಿಮಳೆಗೈದರು. ಹತ್ತಿ ಖರೀದಿ ಕೇಂದ್ರದಲ್ಲಿ ಅನ್ಯಾಯ ಮಾಡುತ್ತಿದ್ದು ತೂಕ, ತೇವಾಂಶ, ಬೆಲೆಯಲ್ಲಿ ಏರಿಳಿತ ಮಾಡುತ್ತಿದ್ದಾರೆ. ಅಧಿಕಾರಿಗಳು, ಜಿನ್ನಿಂಗ್ ಮಾಲೀಕರು ಶಾಮೀಲಾಗಿ ಮನಬಂದಂತೆ ವ್ಯಾಪಾರ ಮಾಡುತ್ತಿದ್ದಾರೆ. ಹೆಸರು ನೋಂದಣಿಯಲ್ಲೂ ಗೋಲ್‌ಮಾಲ್ ನಡೆದಿದೆ ಎಂದು ಗುಡುಗಿದರು.

ಪ್ರಾಂತ ರೈತ ಸಂಘದ ಜಿಲ್ಲಾ ಕಾರ್ಯದರ್ಶಿ ನರಸಣ್ಣ ನಾಯಕ ಮಾತನಾಡಿ, ಖರೀದಿ ಕೇಂದ್ರದಲ್ಲಿ ಜಾಲಹಳ್ಳಿ ಭಾಗದ ರೈತರು ಹತ್ತಿ ಮಾರಾಟಕ್ಕೆ ಬಂದರೆ ಮುಂಜಾನೆಯಿಂದ ಸಂಜೆವರೆಗೆ ಕಾಯಿಸಿ ಖರೀದಿ ಮಾಡದೆ ವಾಪಸ್ ಕಳಿಸಿದ್ದಾರೆ. ಬೆಳೆಪರಿಹಾರ ಹಾಕಲು ಗ್ರಾಮ ಲೆಕ್ಕಾಧಿಕಾರಿಗಳು ರೈತರಿಂದ ಫೋನ್‌ಪೇ ಮೂಲಕ ಹಣ ಪಡೆಯುತ್ತಿದ್ದಾರೆ. ತೂಕದಲ್ಲಿ ಭಾರಿ ವ್ಯತ್ಯಾಸ ಕಂಡಬರುತ್ತಿದೆ. ಈ ಬಗ್ಗೆ ಅಧಿಕಾರಿಗಳು, ಮಾಲೀಕರಿಗೆ ದೂರು ನೀಡಿದರೂ ಕ್ರಮಕೈಗೊಂಡಿಲ್ಲ ಎಂದು ದೂರಿದರು.

ಶಾಸಕಿ ಕರೆಮ್ಮ ನಾಯಕ ಪ್ರತಿಕ್ರಿಯಿಸಿ, ರೈತರಿಂದ ಹಣ ಪಡೆದ ಹೇರುಂಡಿ ವಿಎ ರವಿಕುಮಾರ್‌ನನ್ನು ಅಮಾನತು ಮಾಡುವುದು ಮಾತ್ರವಲ್ಲ, ಹಣವಸೂಲಿ ಮಾಡಬೇಕು. ಆಸ್ತಿ ಮುಟ್ಟಿಗೋಲಿಗೆ ಮೇಲಧಿಕಾರಿಗಳಿಗೆ ಪತ್ರ ಬರೆಯಿರಿ ಎಂದು ತಹಸೀಲ್ದಾರ್ ನಾಗಮ್ಮ ಕಟ್ಟಿಮನಿಗೆ ಸೂಚಿಸಿದರು. ಮಾಲೀಕರು, ಅಧಿಕಾರಿಗಳು ಅತಿಯಾದ ರೂಲ್ಸ್ ಅನುಸರಿಸಬೇಡಿ. ರೈತರ ವಿಷಯದಲ್ಲಿ ಮಾನವೀಯತೆ ತೋರಿ. ಯಾವ ಕಾರಣಕ್ಕೂ ಹತ್ತಿ ವಾಪಸ್ ಕಳಿಸಬೇಡಿ. ನಿರ್ಲಕ್ಷ್ಯ ಮಾಡಿದರೆ ಜಿನ್ನಿಂಗ್ ಪರವಾನಗಿ ರದ್ದು ಮಾಡುವ ಜತೆಗೆ ಅಧಿಕಾರಿಗಳ ಅಮಾನತಿಗೆ ಶಿಫಾರಸು ಮಾಡುತ್ತೇನೆ ಎಂದು ಎಚ್ಚರಿಸಿದರು.

ಹೂವಿನಹೆಡಗಿ ರೈತ ಶಿವಕುಮಾರ ಮಾತನಾಡಿ, ಕೃಷ್ಣಾನೆರೆ ಹಾಗೂ ಅತಿವೃಷ್ಟಿಯಿಂದ ನದಿದಂಡೆ ಗ್ರಾಮಗಳಲ್ಲಿ ಬೆಳೆಹಾನಿಯಾಗಿದ್ದರೂ ಪರಿಹಾರ ಬಂದಿಲ್ಲ. ಗ್ರಾಮ ಲೆಕ್ಕಾಧಿಕಾರಿಗಳು, ಕಂದಾಯ ನಿರೀಕ್ಷಕರು ಮನೆಯಲ್ಲಿ ಕುಳಿತು ವರದಿ ನೀಡಿದ್ದಾರೆ. ಶಾಸಕರು ಗ್ರಾಮಕ್ಕೆ ಭೇಟಿ ನೀಡಿ ಪರಿಶೀಲನೆ ಮಾಡಬೇಕು. ಅಧಿಕಾರಿಗಳು ಆಫೀಸ್‌ನಲ್ಲಿ ಕುಳಿತು ಹೇಳಿದರೆ ಸಾಲಲ್ಲ. ರೈತರ ಹೊಲಕ್ಕೆ ಬನ್ನಿ ಎಂದು ಗುಡುಗಿದರು.

ಕೃಷಿ ಇಲಾಖೆ ಸಹಾಯಕ ನಿರ್ದೇಶಕ ಶ್ರೀನಿವಾಸ್ ನಾಯಕ ಮಾತನಾಡಿ, ಐದು ಹತ್ತಿ ಖರೀದಿ ಕೇಂದ್ರ ತೆರೆದಿದ್ದು ಪ್ರತಿನಿತ್ಯ ಸುಮಾರು 6600 ಕ್ವಿಂಟಾಲ್ ಹತ್ತಿ ಖರೀದಿಸಲಾಗುತ್ತಿದೆ. 7500 ರೈತರು ಹೆಸರು ನೋಂದಣಿ ಮಾಡಿದ್ದು, 4500 ಹೆಸರು ಸ್ವೀಕೃತವಾಗಿವೆ. ಪ್ರತಿ ಕೇಂದ್ರದಲ್ಲಿ 200-300 ಕ್ವಿಂಟಾಲ್ ಹೆಚ್ಚುವರಿ ಖರೀದಿಗೆ ಪತ್ರ ಬರೆದು 8 ಸಾವಿರ ಕ್ವಿಂ.ಗೆ ಮನವಿ ಮಾಡಲಾಗುವುದು ಎಂದರು.

ರೈತರು ಸಮಸ್ಯೆ ಹೇಳುವ ಸಂದರ್ಭದಲ್ಲಿ ಗದ್ದಲ ಉಂಟಾಯಿತು. ಈ ವೇಳೆ ಪಿಐ ಎಸ್.ಮಂಜುನಾಥ ಮಧ್ಯಪ್ರವೇಶಿಸಿ, ರೈತರ ಸಮಸ್ಯೆ ಆಲಿಸಲು ಸಭೆ ಕರೆದಿದ್ದು ಎಲ್ಲರೂ ಮಾತನಾಡದೆ ಒಬ್ಬೊಬ್ಬರು ಸಮಸ್ಯೆ ಹೇಳಬೇಕು ಎಂದು ಸಮಾಧಾನ ಪಡಿಸಿದರು. ಎಪಿಎಂಸಿ ಕಾರ್ಯದರ್ಶಿ ನೀಲಪ್ಪ ಶೆಟ್ಟಿ, ಸಿಪಿಐ ಗುಂಡೂರಾವ್, ರೈತರಾದ ಮರಿಲಿಂಗ ಪಾಟೀಲ್ ಗೌರಂಪೇಟೆ, ತಿಮ್ಮನಗೌಡ ಇತರರಿದ್ದರು.

"