ಶಾಂತಿ-ಸೌಹಾರ್ದದಿಂದ ಹಬ್ಬ ಆಚರಿಸಿ

ಸಿಂಧನೂರು: ಪ್ರವಾದಿ ಮೊಹಮ್ಮದ್ ಅವರು ಬೋಧಿಸಿರುವ ತತ್ವಗಳು ಮತ್ತು ಸಂದೇಶಗಳು ಸಕಲ ಮಾನವ ಕುಲಕ್ಕೆ ಅನ್ವಯಿಸುತ್ತವೆ. ಮನುಷ್ಯರು ಸನ್ಮಾರ್ಗದಲ್ಲಿ ನಡೆಯಬೇಕು ಎಂದು ಅವರು ಪ್ರತಿಪಾದಿಸಿದ್ದಾರೆ. ಆದ್ದರಿಂದ ಎಲ್ಲರೂ ಶಾಂತಿ-ಸೌಹಾರ್ದದಿಂದ ಹಬ್ಬ ಆಚರಿಸಬೇಕು ಎಂದು ಎಸ್ಪಿ ಅರುಣಾಂಗ್ಷು ಗಿರಿ ಹೇಳಿದರು.

ಶಹರ ಪೊಲೀಸ್ ಠಾಣೆ ಆವರಣದಲ್ಲಿ ಈದ್ ಮಿಲಾದ್ ಅಂಗವಾಗಿ ಆಯೋಜಿಸಿದ್ದ ಶಾಂತಿ ಸಭೆಯಲ್ಲಿ ಮಾತನಾಡಿದರು. ಪೊಲೀಸ್ ಅಧಿಕಾರಿಗಳು ನಿಗದಿಪಡಿಸಿದ ಮಾರ್ಗದಲ್ಲೇ ಮೆರವಣಿಗೆ ನಡೆಸಬೇಕು. ಕಾನೂನು ಉಲ್ಲಂಘಿಸುವ ವ್ಯಕ್ತಿ ಎಷ್ಟೇ ಪ್ರಭಾವಿಯಾಗಿದ್ದರೂ ನಿರ್ದಾಕ್ಷಿಣ್ಯವಾಗಿ ಕ್ರಮಕೈಗೊಳ್ಳಲಾಗುವುದು ಎಂದು ತಿಳಿಸಿದರು.

ಇನ್‌ಸ್ಪೆಕ್ಟರ್ ವೀರಾರೆಡ್ಡಿ ಎಚ್. ಮಾತನಾಡಿ, ಶಹರ ಪೊಲೀಸ್ ಠಾಣೆಯ ವ್ಯಾಪ್ತಿಯಲ್ಲಿ ಶಾಂತಿ ಕದಡುವ 70 ಜನರ ವಿರುದ್ಧ ಈಗಾಗಲೇ ಪ್ರಕರಣ ದಾಖಲಾಗಿದೆ. ಅಂಥವರ ಮೇಲೆ ಸದಾ ನಿಗಾ ಇಡುತ್ತೇವೆ. ಧ್ವನಿವರ್ಧಕ ಮತ್ತು ಮೆರವಣಿಗೆಗೆ ಅನುಮತಿ ಪಡೆದಿರುವ ಮುಖಂಡರು ಸಹ ಶಾಂತಿಗೆ ಭಂಗ ತರುವ ವ್ಯಕ್ತಿಗಳ ಬಗ್ಗೆ ಮಾಹಿತಿ ನೀಡಬೇಕು. ಶಾಂತಿಸಭೆಗೆ ನಗರದ 200ಕ್ಕೂ ಹೆಚ್ಚು ಜನರಿಗೆ ಆಹ್ವಾನ ನೀಡಲಾಗಿದೆ. ಹಲವರು ಹಾಜರಾಗಿಲ್ಲ. ಮುಂದಿನ ಶಾಂತಿ ಸಭೆಗೆ ಹಾಜರಾಗುವ ವ್ಯಕ್ತಿಗಳಿಗೆ ಮಾತ್ರ ನೋಟಿಸ್ ಕಳಿಸಲಾಗುವುದು ಎಂದರು.

ಪ್ರಮುಖರಾದ ಎಂ.ಡಿ.ನದೀಮ್‌ವುಲ್ಲಾ, ಎಚ್.ಎನ್.ಬಡಿಗೇರ, ಖಾಜಿಮಲಿಕ್ ವಕೀಲ, ಶಫಿವುಲ್ಲಾ ಖಾನ್, ಸೈಯದ್ ಹುಸೇನ ಮಿಟ್ಟಿಮನಿ, ಟಿ.ಹುಸೇನಸಾಬ್, ಪ್ರೊಬೇಷನರಿ ಸಬ್‌ಇನ್ಸ್‌ಪೆಕ್ಟರ್ ಪ್ರದೀಪ್ ಕಲ್ಲೂರು, ಸೈಲಾನಿ ಪಾಷ, ನಾಸೀರ್ ಹುಸೇನ ಚಿಟಿಗಿ, ಸುರೇಶ ಗೊಬ್ಬರಕಲ್, ಕೆ.ಮರಿಯಪ್ಪ, ಯೂಸೂಫ್ ಏತ್ಮಾರಿ, ಹಬೀಬ್ ಖಾಜಿ, ದುರುಗಪ್ಪ ಬಾಲಿ, ಮೌಲಪ್ಪ ಮಾಡಶಿರವಾರ, ರಾಜಾಸಾಬ್, ಮಂಜುನಾಥ ಭಂಗಿ, ರವಿ ಹಿರೇಮಠ ಇದ್ದರು.

ಮಾನ್ವಿ: ತಾಲೂಕು ಯುವ ಮುಸ್ಲಿಂ ಸಮಾಜ ಸಮಿತಿಯಿಂದ ಆ.26ರಂದು ಪ್ರವಾದಿ ಮೊಹಮ್ಮದ್ ಪೈಗಂಬರ್ ಜನ್ಮದಿನ ಆಚರಿಸಲಾಗುವುದು ಎಂದು ಸಮಿತಿ ತಾಲೂಕು ಅಧ್ಯಕ್ಷ, ಧರ್ಮಗುರು ಸೈಯದ್ ಸಜ್ಜಾದ್ ಹುಸೇನಿ ಮತವಾಲೆ ಹೇಳಿದರು.

ಸುದ್ದಿಗೋಷ್ಠಿಯಲ್ಲಿ ಮಾತನಾಡಿ, ಪ್ರವಾದಿ ಅವರ ಜನ್ಮದಿನವನ್ನು ಷರಿಯತ್ ಹಾಗೂ ನಮ್ಮ ಕಾನೂನುಗಳನ್ನು ಗೌರವಿಸಿ ಶಾಂತಿ-ಸೌಹಾರ್ದದಿಂದ ಆಚರಿಸಲಾಗುವುದು. ಮಸ್ಜೀದ್ ಎ ಹಸ್ ನೈನ್ ಆವರಣದಲ್ಲಿ ಕಲ್ಮಠದ ಶ್ರೀ ವಿರೂಪಾಕ್ಷ ಪಂಡಿತಾರಾಧ್ಯ ಶಿವಾಚಾರ್ಯರು, ಕೋನಾಪುರ ಪೇಟೆಯ ಸೆಂಟ್ ಮೇರಿಸ್ ಚರ್ಚ್‌ನ ಫಾದರ್ ಹಾಗೂ ವಿವಿಧ ಧರ್ಮಗಳ ಗುರುಗಳು ಮೆರವಣಿಗೆಗೆ ಚಾಲನೆ ನೀಡಲಿದ್ದಾರೆ. ನಂತರ ಪ್ರಸಾದ ವ್ಯವಸ್ಥೆ ಇರುತ್ತದೆ ಎಂದು ತಿಳಿಸಿದರು.

ಪ್ರಮುಖರಾದ ಸೈಯದ್ ಮುಸ್ತಫಾ ಮಿಯಾ, ಸೈಯದ್ ಮಿನಲ್ ಹುಸೈನಿ ಮತವಾಲೆ, ಸೈಯದ್ ಅಕ್ಬರ್ ಹುಸೇನಿ ಮತವಾಲೆ, ಸೈಯದ್ ಸಿರಾಜ್ ಖಾದ್ರಿ, ಸೈಯದ್ ಖಾಲಿದ್ ಖಾದ್ರಿ, ಸೈಯದ್ ಅಮ್ಜದ್ ಹುಸೈನಿ, ಸೈಯದ್ ಮಕ್ಬುಲ್ ಸಾಹೇಬ್, ಸೈಯದ್ ಇರ್ಫಾನ್ ಖಾದ್ರಿ, ಹಾಫಿಜ್ ಆದಿಲ್ ರಶೀದ್, ಮೊಹಮ್ಮದ್ ಜಾವಿದ್ ಅಶ್ರಫಿ, ಸೈಯದ್ ಅಜೀಜ್ ಸಾಹೇಬ್, ಸುಭಾನ್ ಬೇಗ್, ಇಬ್ರಾಹಿಂ ಖುರೇಷಿ ಇತರರಿದ್ದರು.