ತೊಗರಿ ಬೆಳೆಗೆ ಬಂಪರ್ ಬೆಲೆ

ತಾಲೂಕಿನ 19600 ಹೆಕ್ಟೇರ್ ಪ್ರದೇಶದಲ್ಲಿ ತೊಗರಿ ಬೆಳೆಯಲಾಗಿದ್ದು ಅತಿವೃಷ್ಟಿಯಿಂದಾಗಿ ಬಹುತೇಕ ಬೆಳೆ ಹಾಳಾಗಿ, ಉತ್ಪಾದನೆಯೂ ಕುಸಿದಿದೆ. ಪರಿಣಾಮ ಮಾರುಕಟ್ಟೆಯಲ್ಲಿ ತೊಗರಿ ದರ ದಿನೇದಿನೆ ಹೆಚ್ಚತೊಡಗಿದೆ. ಕಳೆದ ವಾರ ಮಾರುಕಟ್ಟೆಯಲ್ಲಿ ಕ್ವಿಂಟಾಲ್‌ಗೆ 6800 ರೂ. ದಿಂದ 7100 ರೂ. ಬೆಲೆ ಇತ್ತು. ಈಗ 1200 ರೂ.ದಿಂದ 1400 ರೂ.ವರೆಗೆ ದರ ಜಿಗಿತ ಕಂಡಿದೆ. ಫೆ.5ರಂದು ಸಿಂಧನೂರಿನ ಎಪಿಎಂಸಿಯಲ್ಲಿ ಪ್ರತಿ ಕ್ವಿಂಟಾಲ್‌ಗೆ 8300 ರೂ. ದರದಲ್ಲಿ ತೊಗರಿ ಮಾರಾಟವಾಗಿದೆ. ಅದರಿಂದ 7500 ರೂ. ಇತ್ತು. ಕಳೆದ ಹತ್ತು ದಿನಗಳಲ್ಲಿ ತೊಗರಿ ಬೆಲೆ ಏರು ಗತಿಯಲ್ಲಿ ಸಾಗಿದೆ. ಬೇರೆ ನಗರದಲ್ಲಿಯೂ ಇದರ ಬೆಲೆ 9 ಸಾವಿರ ರೂ. ದಾಟಿದೆ ಎನ್ನಲಾಗುತ್ತಿದೆ. ಇಲ್ಲಿ ಉತ್ಪಾದನೆ ಕಡಿಮೆ, ತೊಗರಿಯ ಗುಣಮಟ್ಟದಲ್ಲಿಯೂ ವ್ಯತ್ಯಾಸವಾಗುವುದರಿಂದ ದರದ ಏರಿಳಿತ ನಿಧಾನಗತಿಯಲ್ಲಿದೆ.

ಕಳೆದ ಮುಂಗಾರಿನಲ್ಲಿ 19600 ಹೆಕ್ಟೇರ್ ಪ್ರದೇಶದಲ್ಲಿ ತೊಗರಿ ಬೆಳೆದಿದ್ದರೂ, ರೈತರ ಕೈಗೆ ಬಂದದ್ದು ಮಾತ್ರ ಕಡಿಮೆ. ಭಾರಿ ಮಳೆ, ಇತರ ಕಾರಣಗಳಿಂದ ಸಾಕಷ್ಟು ತೊಗರಿ ಹಾಳಾಗಿದೆ. ಅಳಿದುಳಿದ ತೊಗರಿ ಧಾನ್ಯವು ಬಂಪರ್ ದರಕ್ಕೆ ಮಾರಾಟವಾಗುವ ಮುನ್ಸೂಚನೆ ಕಂಡು ಬಂದಿರುವುದರಿಂದ ರೈತರು ಸಂತಸಗೊಂಡಿದ್ದಾರೆ. ಎಪಿಎಂಸಿಗೂ ರೈತರು ತೊಗರಿ ಧಾನ್ಯವನ್ನು ಮಾರಾಟಕ್ಕೆ ತರುತ್ತಿದ್ದಾರೆ. ಇನ್ನೂ ಕೆಲವು ರೈತರು ತೊಗರಿಗೆ ಬಂಪರ್ ಬೆಲೆ ಬರಬಹುದೆಂದು ಲೆಕ್ಕಾಚಾರ ಹಾಕಿಕೊಂಡು ಬೆಲೆ ನಿರೀಕ್ಷೆಯಲ್ಲಿದ್ದಾರೆ.