ಕೊಚ್ಚಿಹೋದ ಬೊಮ್ಮನಾಳ-ಚಿರ್ತನಾಳ ಸೇತುವೆ

ಕಳೆದ ಎರಡು ದಿನಗಳಿಂದ ಮಳೆಯಿಂದ ಹಳ್ಳಕ್ಕೆ ನೀರು ಹೆಚ್ಚಾಗಿ ಹರಿದು ಬಂದಿದ್ದರಿಂದ ಸೇತುವೆ ಕಿತ್ತು ಹೋಗಿದೆ. ಜನರಿಗೆ  ವ್ಯಾಪಾರ-ವಹಿವಾಟಿಗೆ ತಾಲೂಕು ಕೇಂದ್ರ ಸಿಂಧನೂರಿಗೆ ಹೋಗಲು ಸಾಧ್ಯವಾಗದೆ ತೀವ್ರ ತೊಂದರೆ ಅನುಭವಿಸಿದರು. ಮಳೆ ಬಂದಾಗಲೆಲ್ಲ ಸಮಸ್ಯೆ ಸಾಮಾನ್ಯವಾಗಿದ್ದು, ತಾಲೂಕು ಕೇಂದ್ರಕ್ಕೆ ಬರಲು ಹರಸಾಹಸ ಪಡುವಂತಾಗಿದೆ. 

ಪ್ರಧಾನಮಂತ್ರಿ ಗ್ರಾಮ ಸಡಕ್ ಯೋಜನೆ ಅಡಿ ವೆಂಕಟರಾವ ನಾಡಗೌಡ ಶಾಸಕರಾಗಿದ್ದಾಗ ಪಗಡದಿನ್ನಿ, ದೇವರಗುಡಿ ಮತ್ತು ಬೊಮ್ಮನಾಳ ಸೇತುವೆ, ರಸ್ತೆಗಳ ನಿರ್ಮಾಣಕ್ಕೆ 14 ಕೋಟಿ ರೂ. ಬಿಡುಗಡೆಯಾಗಿತ್ತು. 

ಅದರಲ್ಲಿ ಪಗಡದಿನ್ನಿ, ದೇವರಗುಡಿ ಸೇತುವೆ ಮತ್ತು ರಸ್ತೆಗಳು ನಿರ್ಮಾಣಗೊಂಡು ಎರಡು ವರ್ಷ ಕಳೆದಿವೆ. ಆದರೆ, ಬೊಮ್ಮನಾಳ ಮತ್ತು ಚಿರ್ತನಾಳ ಮಧ್ಯದ ಸೇತುವೆ ಕಾಮಗಾರಿ ಮಾತ್ರ ನನೆಗುದಿಗೆ ಬಿದ್ದಿದೆ. ಚಿರ್ತನಾಳ-ಬೊಮ್ಮನಾಳ ಗ್ರಾಮಸ್ಥರು ಪಿಎಂಜೆಎಸ್‌ವೈ ಅಧಿಕಾರಿಗಳು ಹಾಗೂ ಜನಪ್ರತಿನಿಧಿಗಳ ನಿರ್ಲಕ್ಷೃದ ಬಗ್ಗೆ ಆಕ್ರೋಶ ವ್ಯಕ್ತಪಡಿಸಿದ್ದಾರೆ. ಕೂಡಲೇ ಸೇತುವೆ ಕಾಮಗಾರಿ ಪೂರ್ಣಗೊಳಿಸಬೇಕು ಎಂದು ಒತ್ತಾಯಿಸಿದ್ದಾರೆ. 

ಸಿಂಧನೂರು ತಾಲೂಕು ವ್ಯಾಪ್ತಿಯಲ್ಲಿ ಶನಿವಾರ ರಾತ್ರಿಯಿಂದ ಭಾನುವಾರ ಬೆಳಗಿನವರೆಗೆ ಉತ್ತಮ ಮಳೆಯಾಗಿದ್ದು, ಹಿರೇಹಳ್ಳ ತುಂಬಿ ಹರಿಯುತ್ತಿದೆ. ಶನಿವಾರ ರಾತ್ರಿ 7.30ಕ್ಕೆ ಜೋರು ಗಾಳಿಯೊಂದಿಗೆ ಆರಂಭವಾದ ಮಳೆ 9 ಗಂಟೆ ವೇಳೆಗೆ ಜೋರಾಯಿತು. ಬೆಳಗ್ಗೆ 6 ಗಂಟೆವರೆಗೂ ಬಿಟ್ಟು ಬಿಟ್ಟು ಮಳೆ ಸುರಿಯಿತು. ಇದರಿಂದ ಸಣ್ಣಪುಟ್ಟ ಹಳ್ಳಗಳಲ್ಲಿ ನೀರಿನ ಹರಿವು ಹೆಚ್ಚಿದ್ದು, ಎರೆ ಹೊಲಗಳ ಒಡ್ಡುಗಳಲ್ಲಿ ನೀರು ಸಂಗ್ರಹಗೊಂಡಿದೆ. ಹಸಿ ಮಳೆಯಾಗಿದ್ದರಿಂದ ರೈತರು ಹರ್ಷಗೊಂಡಿದ್ದು, ಕೃಷಿ ಚಟುವಟಿಕೆ ಗರಿಗೆದರಿದೆ.