ಪಪಂ ಅಧ್ಯಕ್ಷ ಹಾಜಿ ಚೌದ್ರಿ ಅಧ್ಯಕ್ಷತೆಯಲ್ಲಿ ಏರ್ಪಡಿಸಿದ್ದ ಸಭೆಯಲ್ಲಿ ಪಟ್ಟಣದ ಮುಖ್ಯರಸ್ತೆಯ ವಿದ್ಯುತ್ ಬಲ್ಬ್‌ಗಳ ಬದಲಾವಣೆ, ಬ್ಯಾನರ್ ಅಳವಡಿಕೆಗೆ ಸ್ಥಳ ಹಾಗೂ ಐದು ಹೈಮಾಸ್ಟ್ ವಿದ್ಯುತ್ ಅಳವಡಿಸಲು ಸ್ಥಳ ನಿಗದಿ ಕುರಿತು ಚರ್ಚಿಸಲಾಯಿತು. ರಸ್ತೆ ಬದಿ ಸಸಿ ನೆಡುವುದು, ವಿವಿಧ ವಾರ್ಡ್‌ಗಳಲ್ಲಿ ಶುದ್ಧ ಕುಡಿವ ನೀರಿನ ಘಟಕಗಳ ಸ್ಥಾಪನೆ ಮತ್ತು ನಿರ್ವಹಣೆ, ಜಲಜೀವನ ಮಿಷನ್ ಯೋಜನೆಯಡಿ ಕಾಮಗಾರಿ ಆರಂಭ, ಶಾಶ್ವತ ಕುಡಿವ ನೀರಿನ ಸರಬರಾಜಿಗೆ ಕೆರೆ ನಿರ್ಮಾಣ ಅಭಿವೃದ್ಧಿ ಕಾರ್ಯಗಳನ್ನು ಕೈಗೊಳ್ಳುವುದರ ಕುರಿತು ಪಪಂ ಸದಸ್ಯರು ಅಧಿಕಾರಿಗಳಿಗೆ ನಿರ್ದೇಶಿಸಿದರು.

ಇನ್ನು ಪತ್ರಕರ್ತರಿಗೆ ಪಪಂ ಬಜೆಟ್‌ನಲ್ಲಿ 10 ಲಕ್ಷ ರೂ. ಆರೋಗ್ಯ ವಿಮೆಗೆ ಮೀಸಲು ಇಡುವಂತೆ ಹಾಗೂ ಪತ್ರಕರ್ತರ ಭವನ ನಿರ್ಮಿಸಲು ಸಿಎ ಸೈಟ್ ನೀಡುವ ಕುರಿತು ಚರ್ಚೆ ಮಾಡಲಾಯಿತು. ಸ್ಥಳೀಯ ಮುಖಂಡ ಎನ್.ಉದಯಕುಮಾರ ಸಾಹುಕಾರ ಮಾತನಾಡಿ, ಎಪಿಎಂಸಿಯ ಖಾಲಿ ಜಾಗದಲ್ಲಿ, ಮುಖ್ಯರಸ್ತೆ ಪಕ್ಕದ ತರಕಾರಿ ಹಾಗೂ ಮಾಂಸದ ಅಂಗಡಿಗಳನ್ನು ಎಪಿಎಂಸಿಯ ಖಾಲಿ ಜಾಗದಲ್ಲಿ ಹೊಸದಾಗಿ ಮಳಿಗೆಗಳನ್ನು ನಿರ್ಮಾಣ ಮಾಡಿ ಸ್ಥಳಾಂತರಿಸಬೇಕೆಂದು ಸಲಹೆ ನೀಡಿದರು.

ಬಜೆಟ್ ಪೂರ್ವಭಾವಿ ಸಭೆಗೆ ಒಟ್ಟು 20 ಜನಪ್ರತಿನಿಧಿಗಳ ಪೈಕಿ ಅಧ್ಯಕ್ಷ ಹಾಜಿ ಚೌದ್ರಿ, ಉಪಾಧ್ಯಕ್ಷೆ ಲಕ್ಷ್ಮೀ ಆದೆಪ್ಪ ನಾಯಕ ಹಾಗೂ 4 ಜನ ಸದಸ್ಯರು ಮಾತ್ರ ಕೊನೆವರೆಗೆ ಹಾಜರಿದ್ದರು. ಬಾಕಿ ಸದಸ್ಯರು ಸಭೆ ಆರಂಭದಲ್ಲೇ ಕೆಲ ನಿಮಿಷಗಳತನಕ ಇದ್ದು ಹೊರನಡೆದರು. ಮುಖ್ಯಾಧಿಕಾರಿ ಸುರೇಶ್ ಶೆಟ್ಟಿ, ಸದಸ್ಯರಾದ ಸೂರಿ ದುರುಗಣ್ಣ ನಾಯಕ, ಎಚ್.ಮಾರ್ಕಪ್ಪ, ಹಸೇನಲಿಸಾಬ್, ಮೌಲಸಾಬ್ ವರ್ಚಸ್, ಮುಖಂಡರಾದ ರಮೇಶ್ ದರ್ಶನಕರ್, ಉಮೇಶ್ ಜೇಗರಕಲ್ ಇತರರಿದ್ದರು.