ಬೀದಿ ನಾಯಿ ಹಿಡಿಯಲು ಮುಂದಾದ ನಗರಸಭೆ: ಗ್ರಾಮೀಣ ಭಾಗದಲ್ಲಿಯೂ ಶ್ವಾನಗಳ ಕಾಟ

ರಾಯಚೂರು: ಬೀದಿನಾಯಿಗಳ ದಾಳಿಯಿಂದ ರಾಯಚೂರು ನಗರದ ವಿವಿಧೆಡೆ ಸಾರ್ವಜನಿಕರಿಗೆ ತೊಂದರೆ ಉಂಟಾಗುತ್ತಿದ್ದು, ನಗರಸಭೆಯಿಂದ ಬೀದಿ ನಾಯಿಗಳನ್ನು ಸೆರೆಹಿಡಿಯುವ ಕಾರ್ಯ ಚುರುಕುಗೊಂಡಿದೆ.

ನಗರದ ಮಡ್ಡಿಪೇಟೆ ನಿವಾಸಿ ಮಹಾದೇವಿ ಎಂಬುವವರು ಬೀದಿ ನಾಯಿಗಳ ದಾಳಿಯಿಂದ ತಲೆಗೆ ಪೆಟ್ಟಾಗಿ ಕೋಮಾ ಸ್ಥಿತಿಗೆ ತಲುಪಿ ಬುಧವಾರ ಸಾವನಪ್ಪಿದ್ದರು. ಈ ವಿಚಾರಕ್ಕೆ ನಗರದ ಸಾರ್ವಜನಿಕರು ತೀವ್ರ ಆಕ್ರೋಶ ವ್ಯಕ್ತಪಡಿಸಿದ ಹಿನ್ನೆಲೆ ಬೀದಿ ನಾಯಿಗಳನ್ನು ಸೆರೆಹಿಡಿಯಲು ನಗರಸಭೆ ಮುಂದಾಗಿದೆ.

ಈ ಹಿಂದೆಯೂ ನಗರದಲ್ಲಿ ಬೀದಿ ನಾಯಿಗಳ ದಾಳಿಯಿಂದ ಮಕ್ಕಳು, ವೃದ್ಧರಿಗೆ ಗಾಯಗಳಾಗಿರುವ ಉದಾಹರಣೆಗಳಿದ್ದು, ನಗರದ ವಿವಿಧ ಬಡಾವಣೆಗಳಲ್ಲಿ ಬುಧವಾರದಿಂದ ಬೀದಿ ನಾಯಿಗಳನ್ನು ಹಿಡಿಯಲಾಗುತ್ತಿದೆ.

ರಾಯಚೂರು ನಗರ ಮಾತ್ರವಲ್ಲದೇ ರಾಯಚೂರು ತಾಲೂಕಿನ ಹಲವು ಗ್ರಾಮಗಳಲ್ಲಿ ಬೀದಿ ನಾಯಿಗಳ ಕಾಟ ಹೆಚ್ಚಾಗಿದ್ದು, ಕ್ರಮಕ್ಕಾಗಿ ವಿವಿಧ ಸಂಘಟನೆಗಳಿಂದ ಆಯಾ ಗ್ರಾ.ಪಂಗೆ ಪತ್ರ ಬರೆದರೆ ಒಂದು ನಾಯಿಗೆ ಇಂತಿಷ್ಟು ಮೊತ್ತವೆಂದು ಪಂಚಾಯತಿಯಿಂದ ನೀಡುತ್ತೇವೆ ನೀವೆ ನಾಯಿಗಳನ್ನು ಹಿಡಿಯುವವರನ್ನು ಹುಡುಕಿ ಎಂಬ ಹಾರಿಕೆಯ ಉತ್ತರವನ್ನು ಸಂಘಟನೆಗಳಿಗೆ ನೀಡುತ್ತಿದ್ದಾರೆ. ರಾಯಚೂರು ನಗರ ಸೇರಿದಂತೆ ತಾಲೂಕಿನ ವಿವಿಧ ಗ್ರಾಮಗಳಲ್ಲಿಯೂ ನಾಯಿ ಸೆರೆಹಿಡಿಯುವ ಕಾರ್ಯಕ್ಕೆ ಆಯಾ ಗ್ರಾ.ಪಂಗಳು ಮುಂದಾದರೇ ಜನರಿಗೆ ಅನುಕೂಲವಾಗಲಿದೆ.

ಕಟ್ಲಟ್ಕೂರಿನಲ್ಲಿ ಬಾಲಕಿ ಸಾವು: 

ಬೀದಿ ನಾಯಿಗಳ ಕಡಿತದಿಂದ ನ.16ರಂದು ರಾಯಚೂರು ತಾಲೂಕಿನ ಕಟ್ಲಟ್ಕೂರು ಗ್ರಾಮದ ಸರಿತಾ(8) ಎಂಬ ಬಾಲಕಿ ಮೃತಪಟ್ಟಿರುವುದು ತಡವಾಗಿ ಬೆಳಕಿಗೆ ಬಂದಿದೆ. ಬಾಲಕಿ ಸಾವಿನ ಬಳಿಕ ಚಂದ್ರಬಂಡಾ ಗ್ರಾ.ಪಂನಿಂದ ಪಶು ಸಂಗೋಪನೆ ಮತ್ತು ವೈದ್ಯಕೀಯ ಇಲಾಖೆಯ ಸಹಾಯಕ ನಿರ್ದೇಶಕರಿಗೆ ನ.22ರಂದು ಬೀದಿ ನಾಯಿಗಳನ್ನು ಸ್ಥಳಾಂತರಿಸುವಂತೆ ಪತ್ರವನ್ನು ಬರೆಯಲಾಗಿದೆ.