ಮುಗಿಯದ ಚತುಷ್ಪಥ ಕಾಮಗಾರಿ, ಧೂಳಿನಲ್ಲಿ ವಾಹನ ಚಾಲನೆ ಯಾತನೆ, ಸಾರ್ವಜನಿಕರ ಆಕ್ರೋಶ

ಆನೇಕಲ್: ಪಟ್ಟಣದಿಂದ ತಮಿಳುನಾಡಿಗೆ ಸಂಪರ್ಕ ಕಲ್ಪಿಸುವ ಥಳಿ ರಸ್ತೆಯನ್ನು ಚತುಷ್ಪಥವಾಗಿಸುವ ಕಾಮಗಾರಿ ಮುಗಿಯುವ ಲಕ್ಷಣ ಕಾಣುತ್ತಿಲ್ಲ. ಕಾಮಗಾರಿ ಕುಂಟುತ್ತ ಸಾಗಲು ಗುತ್ತಿಗೆದಾರರ ನಿರ್ಲಕ್ಷ್ಯವೇ ಕಾರಣ ಎಂಬ ಆಕ್ರೋಶ ಸಾರ್ವಜನಿಕ ವಲಯದಲ್ಲಿ ವ್ಯಕ್ತವಾಗಿದೆ.

ಕಾಮಗಾರಿಯನ್ನು ವರ್ಷದ ಹಿಂದೆ ಆರಂಭಿಸಿದ್ದ ಗುತ್ತಿಗೆದಾರರು, ಆನೇಕಲ್‌ನಿಂದ ಸೋಲೂರಿನವರೆಗೆ ರಸ್ತೆ ಅಗೆದಿದ್ದಾರೆ. ಇನ್ನೊಂದೆಡೆ ಕಳನಾಯಕನಹಳ್ಳಿಯಿಂದ ಸೋಲೂರುವರೆಗೆ ರಸ್ತೆಯಲ್ಲಿ ಜಲ್ಲಿ ಕಲ್ಲು ಹಾಕಿ ಬಿಟ್ಟಿದ್ದಾರೆ. ಇದರಿಂದಾಗಿ ಈ ಮಾರ್ಗದಲ್ಲಿ ಹಲವು ಅಪಘಾತಗಳು ಸಂಭವಿಸುತ್ತಿವೆ. ಜತೆಗೆ ಭಾರಿ ವಾಹನಗಳು ಸಾಗುವಾಗ ಧೂಳು ಏಳುವುದರಿಂದ, ಇತರ ಸವಾರರು ವಾಹನ ಚಾಲನೆ ಮಾಡಲು ಪಡಿಪಾಟಲು ಅನುಭವಿಸುವಂತಾಗಿದೆ.

ಚಕಾರ ಎತ್ತದ ಜನಪ್ರತಿನಿಧಿಗಳು: ಕಾಮಗಾರಿ ಅರ್ಧಕ್ಕೆ ನಿಲ್ಲಿಸಿರುವುದರಿಂದ, ಮಳೆ ಬಂದಾಗ ರಸ್ತೆ ಕೆಸರುಮಯವಾಗುತ್ತದೆ. ಬಿಸಿಲು ಬಂದಾಗ ಧೂಳು ಏಳುತ್ತದೆ. ಕಾಮಗಾರಿಗೆ ಅಡ್ಡವಾಗಿರುವ ಮರ, ವಿದ್ಯುತ್ ಕಂಬ ತೆರವುಗೊಳಿಸುವ ನಿಟ್ಟಿನಲ್ಲಿ ಸಂಬಂಧಪಟ್ಟ ಇಲಾಖೆಗಳೊಂದಿಗೆ ಮಾತನಾಡಿ, ಸಮಸ್ಯೆ ಬಗೆಹರಿಸುವ ಜವಾಬ್ದಾರಿ ತಾಲೂಕು ಆಡಳಿತದ್ದಾಗಿದೆ. ಆದರೆ, ಅಧಿಕಾರಿಗಳಾಗಲಿ, ಶಾಸಕರು, ಸಂಸತ್ ಸದಸ್ಯರಾಗಲಿ ಈ ಬಗ್ಗೆ ಚಕಾರ ಎತ್ತದೇ ಇರುವುದು ಶೋಚನೀಯ.