ಗಜೇಂದ್ರಗಡಕ್ಕೆ ಚತುಷ್ಪಥದ ಗರಿ

ಶಿವು ಶಶಿಮಠ ಗಜೇಂದ್ರಗಡ

ನೂತನ ತಾಲೂಕು ಕೇಂದ್ರವಾಗಿ ಅಸ್ತಿತ್ವಕ್ಕೆ ಬಂದಿರುವ ಗಜೇಂದ್ರಗಡ ತಾಲೂಕಿನ ಅಭಿವೃದ್ಧಿಗೆ ಹಲವಾರು ಯೋಜನೆಗಳನ್ನು ಶಾಸಕ ಕಳಕಪ್ಪ ಬಂಡಿ ಜಾರಿಗೊಳಿಸಿದ್ದಾರೆ. ಈಗಾಗಲೇ ತಾಲೂಕಿನಲ್ಲಿ ಸಾಗುವ ರಾಷ್ಟ್ರೀಯ ಹೆದ್ದಾರಿ (ಎನ್​ಎಚ್ 367ರ) ಅಭಿವೃದ್ಧಿಗೆ ಹಾಗೂ ಪಟ್ಟಣದಲ್ಲಿ ಈ ಹೆದ್ದಾರಿಯು ಸಾಗುವ ಮಾರ್ಗವನ್ನು ಚತುಷ್ಪಥವನ್ನಾಗಿ ಅಭಿವೃದ್ಧಿಪಡಿಸುವ ಕಾಮಗಾರಿಗೆ ಬಂಡಿ ಅವರ ನೇತೃತ್ವದಲ್ಲಿ ಜ. 26ರಂದು ಭೂಮಿಪೂಜೆ ನೆರವೇರಲಿದೆ. ಈ ಮಹತ್ವಾಕಾಂಕ್ಷಿ ಯೋಜನೆಯು ಸಂಚಾರ ಸುಗಮಗೊಳಿಸುವುದಲ್ಲದೆ, ಪಟ್ಟಣದ ಸೌಂದರ್ಯವನ್ನೂ ಅಧಿಕಗೊಳಿಸುವ ಮೂಲಕ ಗಜೇಂದ್ರಗಡಕ್ಕೆ ಗರಿ ಮೂಡಿಸಲಿದೆ.

ರಸ್ತೆ ಕಾಮಗಾರಿ ಮಾರ್ಗ: ಕೇಂದ್ರ ರಸ್ತೆ ಸಾರಿಗೆ ಹಾಗೂ ಹೆದ್ದಾರಿ ಸಚಿವ ನಿತಿನ್ ಗಡ್ಕರಿ ಮತ್ತು ಮುಖ್ಯಮಂತ್ರಿ ಬಿ.ಎಸ್. ಯಡಿಯೂರಪ್ಪ ಅವರು ರಾಜ್ಯದಲ್ಲಿ ಒಟ್ಟು 1197 ಕಿ.ಮೀ. ಉದ್ದದ ಕಾಮಗಾರಿಗೆ ವಿಡಿಯೋ ಸಂವಾದದ ಮೂಲಕ ಜನವರಿ 16ರಂದು ಚಾಲನೆ ನೀಡಿದ್ದರು. ಉದ್ದೇಶಿತ ಬಾನಾಪೂರ- ಗದ್ದನಕೇರಿ ಹೆದ್ದಾರಿ ಕಾಮಗಾರಿಯು ಗಜೇಂದ್ರಗಡ ಮಾರ್ಗವಾಗಿ ಹಾದು ಹೋಗಲಿದೆ.

ಈ ಹೆದ್ದಾರಿಯು ತಾಲೂಕಿನಲ್ಲಿ ಉಣಚಗೇರಿ- ಗಜೇಂದ್ರಗಡ- ರಾಜೂರ (39.95 ಕಿ.ಮೀ. ದಿಂದ 52 ಕಿ.ಮೀ. ವರೆಗೆ ಖಾತ್ರಾಳ ಕ್ರಾಸ್​ವರೆಗೆ ) ಒಟ್ಟು 12.05 ಕಿ.ಮೀ. ಉದ್ದ ಸಾಗಲಿದೆ. ಪಟ್ಟಣದ ಹೊರವಲಯದಲ್ಲಿ ಒಟ್ಟು 9.19 ಕಿ.ಮೀ. ದ್ವಿಪಥ ರಸ್ತೆ ಡಾಂಬರೀಕರಣ ಕಾಮಗಾರಿ ವೇಳೆಯಲ್ಲಿ 11 ಸೇತುವೆಗಳ ನಿರ್ವಣ, 6 ಪೈಪ್ ಸಿ.ಡಿ. (ಅಡ್ಡ ಚರಂಡಿ) ನಿರ್ಮಾಣ ಇದರಲ್ಲಿ ಸೇರಿವೆ. ಇದೇ ಸಂದರ್ಭದಲ್ಲಿ ಅವರು ಪಟ್ಟಣದಲ್ಲಿ ಹೆದ್ದಾರಿ ಸಾಗುವ ಮಾರ್ಗದಲ್ಲಿ ಚತುಷ್ಪಥ ನಿರ್ವಿುಸುವ ಮಹತ್ವಾಕಾಂಕ್ಷಿ ಕಾಮಗಾರಿಗೆ ಭೂಮಿಪೂಜೆ ನೆರವೇರಿಸಲಿದ್ದಾರೆ. ಈ ಎರಡೂ ಕಾಮಗಾರಿಗಳಿಗೆ ಶಾಸಕ ಕಳಕಪ್ಪ ಬಂಡಿ ಅವರು ಪಟ್ಟಣದ ರೋಣ ರಸ್ತೆಯ ಎಪಿಎಂಸಿ ಬಳಿಯ ಬಯಲು ಜಾಗದ ಮುಂಭಾಗದ ರಸ್ತೆಯಲ್ಲಿ ಚಾಲನೆ ನೀಡಲಿದ್ದಾರೆ. ಈ ಎರಡೂ ಕಾಮಗಾರಿಗಳ ಒಟ್ಟು ವೆಚ್ಚ 70.44 ಕೋಟಿ ರೂ. ಆಗಿದೆ.

ಏನಿದು ಚತುಷ್ಪಥ: ರಾಷ್ಟ್ರೀಯ ಹೆದ್ದಾರಿ 367 ಮಾರ್ಗವು ಪಟ್ಟಣದಲ್ಲಿ ಕಿತ್ತೂರ ರಾಣಿ ಚನ್ನಮ್ಮ ವೃತ್ತದಿಂದ ಜಗದ್ಗುರು ತೋಂಟದಾರ್ಯ ಸಿಬಿಎಸ್​ಇ ಶಾಲೆಯವರೆಗೆ (2.76 ಕಿ.ಮೀ. ವರೆಗೆ) ಸಾಗುತ್ತದೆ. ಈ ಸಂದರ್ಭವನ್ನೇ ಬಳಸಿಕೊಂಡಿರುವ ಶಾಸಕ ಬಂಡಿ ಅವರು, ದೂರದೃಷ್ಟಿಯ ಯೋಜನೆ ರೂಪಿಸಿದ್ದಾರೆ. ಎರಡು ಪಥವಾಗಿ ನಿರ್ವಣವಾಗುವ ರಾಷ್ಟ್ರೀಯ ಹೆದ್ದಾರಿಯನ್ನೇ ಚತುಷ್ಪಥವನ್ನಾಗಿಸಿ ಪಟ್ಟಣದಲ್ಲಿ ಸಂಚಾರ ಸುಗಮವಾಗುವಂತೆ ಕಾರ್ಯತಂತ್ರ ಹೆಣೆದಿದ್ದಾರೆ. ಇದರ ಅನುಸಾರವಾಗಿ ಪಟ್ಟಣದ ಮಧ್ಯಭಾಗದಲ್ಲೇ ಚತುಷ್ಪಥ ನಿರ್ವಣವಾಗಲಿದೆ. ಈ ನಾಲ್ಕು ಪಥಗಳ ಕಾಂಕ್ರೀಟ್ ರಸ್ತೆಯ ಮಧ್ಯದಲ್ಲಿ ಡಿವೈಡರ್, ವಿದ್ಯುತ್ ದೀಪ, ಚರಂಡಿ ಗ್ರೀಲ್ ಮುಂತಾದ ಸೌಲಭ್ಯಗಳನ್ನು ಸೃಷ್ಟಿಸಲು ಉದ್ದೇಶಿಸಲಾಗಿದೆ.

ಹಲವು ಪ್ರಯೋಜನ: ಕೊಪ್ಪಳ ಜಿಲ್ಲೆಯ ಬಾನಾಪೂರದಿಂದ ಆರಂಭವಾಗುವ ಹೆದ್ದಾರಿಯು (ಎನ್​ಎಚ್ 367) ಕುಕನೂರ, ಯಲಬುರ್ಗಾ, ಗಜೇಂದ್ರಗಡ, ಬಾದಾಮಿ, ಗುಳೇದಗುಡ್ಡ ಮೂಲಕ ಬಾಗಲಕೋಟೆ ಜಿಲ್ಲೆಯ ಗದ್ದನಕೇರಿ ಕ್ರಾಸ್​ವರೆಗೆ ನಿರ್ವಣವಾಗಲಿದೆ. ಈ ರಸ್ತೆಯ ನಿರ್ವಣದಿಂದಾಗಿ ಗಜೇಂದ್ರಗಡ ತಾಲೂಕಿನ ದಕ್ಷಿಣ ಕಾಶಿ ಕಾಲಕಾಲೇಶ್ವರ, ಸೂಡಿ ಗ್ರಾಮದಲ್ಲಿನ ಜೋಡು ಕಳಸ ದೇವಸ್ಥಾನ, ಇಟಗಿಯ ಭೀಮಾಂಬಿಕೆ ದೇವಸ್ಥಾನಕ್ಕೆ ಪ್ರಯಾಣ ಕೈಗೊಳ್ಳುವುದು ಸುಲಭವಾಗಲಿದೆ. ತಾಲೂಕಿನಲ್ಲಿ ವ್ಯಾಪಾರ, ವಹಿವಾಟು ಹೆಚ್ಚಳವಾಗಲು ನೆರವಾಗಲಿದೆ.