ಮಕ್ಕಳ ಆಟದ ಗೂಡು ತೆರವು! PUTTUR

ಪುತ್ತೂರು: ಬಸ್ ನಿಲ್ದಾಣದ ಬಳಿಯಲ್ಲಿ ರಜೆಯಲ್ಲಿ ಮಕ್ಕಳು ಆಡುವುದಕ್ಕೆ ಬಳಸಿದ ತಾತ್ಕಾಲಿಕ ಟರ್ಪಾಲ್ ಶೆಡ್ ಅನ್ನು ನಗರಸಭೆ ಅಧಿಕಾರಿಗಳು ತೆರವು ಮಾಡಿದ್ದಾರೆ. ನಗರಸಭೆಯ ಈ ವಿಚಿತ್ರ ನಡೆ ಸಾರ್ವಜನಿಕ ವಲಯದಲ್ಲಿ ತೀವ್ರ ಆಕ್ರೋಶಕ್ಕೆ ಕಾರಣವಾಗಿದೆ ಹಾಗೂ ನಗೆಪಾಟಾಲಾಗಿದೆ.

ಬೇಸಿಗೆ ರಜೆಯ ಹಿನ್ನೆಲೆಯಲ್ಲಿ ಸ್ಥಳೀಯ ಮಕ್ಕಳು ಒಂದೆಡೆ ಸೇರಿ, ಸಮಯ ಕಳೆಯಲು ರಸ್ತೆ ಬದಿಯೊಂದರಲ್ಲಿ ಮರದ ಕೋಲುಗಳನ್ನು ಇಟ್ಟು ಟರ್ಪಾಲ್ ಕಟ್ಟಿ ಸಣ್ಣದಾದ ತಾತ್ಕಾಲಿಕ ಅಂಗಡಿಯನ್ನು ನಿರ್ಮಿಸಿದ್ದಾರೆ. ನಗರಸಭೆ ಅಽಕಾರಿಗಳು ಸ್ಥಳಕ್ಕೆ ದಾಳಿ ನಡೆಸಿ ಇದನ್ನು ತೆರವುಗೊಳಿಸಿದ್ದಾರೆ. ಈ ಅಂಗಡಿಯಲ್ಲಿದ್ದ ಒಟ್ಟು ಸಾಮಗ್ರಿ ಹಾಗೂ ವಸ್ತುಗಳ ಮೌಲ್ಯ ಕೇವಲ ಐನೂರು ರೂಪಾಯಿ ಕೂಡ ದಾಟಿಲ್ಲ ಎಂಬುದು ಅಚ್ಚರಿಯ ವಿಚಾರವಾಗಿದೆ.

ನಗರಾದ್ಯಂತ ಬೃಹತ್ ಅಕ್ರಮ ಅಂಗಡಿಗಳು, ಕಟ್ಟಡಗಳು ತಲೆಎತ್ತಿ ನಿಂತಿದ್ದು, ಅವುಗಳನ್ನು ಮುಟ್ಟಲು ಅಥವಾ ತೆರವುಗೊಳಿಸಲು ನಗರಸಭೆಯ ಅಧಿಕಾರಿಗಳು ಮುಂದಾಗಿಲ್ಲ. ಫುಟ್‌ಪಾತ್ ಹಾಗೂ ರಸ್ತೆ ಬದಿಗಳಲ್ಲಿ ಹತ್ತಾರು ಅನಧಿಕೃತವಾಗಿ ಹೊರ ಊರಿನ ವ್ಯಾಪಾರಿಗಳು ವ್ಯಾಪಾರ ನಡೆಸಿದರೂ ಕ್ರಮವಾಗುತ್ತಿಲ್ಲ. ರಸ್ತೆ ಪರಂಬೋಕು ಹಾಗೂ ತೋಡುಗಳನ್ನು ಮುಚ್ಚಿದರೂ ಕ್ರಮ ಆಗುತ್ತಿಲ್ಲ. ಅಕ್ರಮಗಳ ಬಗ್ಗೆ ದೂರುಗಳು ಬಂದರೂ ನಗರಸಭೆ ಕಣ್ಣು ಮುಚ್ಚಿ ಕುಳಿತಿದೆಯೇ ಹೊರತು ಒಂದೇ ಒಂದು ಕ್ರಮ ಕೈಗೊಂಡಿಲ್ಲ ಎಂಬ ಅರೋಪ ವ್ಯಕ್ತವಾಗಿದೆ.

ದೊಡ್ಡ ಅಕ್ರಮ ವ್ಯಾಪಾರಿಗಳ ಮತ್ತು ಪ್ರಭಾವಿಗಳ ಮುಂದೆ ಮೌನ ವಹಿಸುವ ನಗರಸಭೆ ಅಧಿಕಾರಿಗಳು, ಆಟ ಆಡುತ್ತಿದ್ದ ಸಣ್ಣ ಮಕ್ಕಳ ಮೇಲೆ ಅಧಿಕಾರದ ದರ್ಪ ತೋರಿಸಿರುವುದು ಸಾರ್ವಜನಿಕರಲ್ಲಿ ಹಲವು ಸಂಶಯಗಳಿಗೆ ಕಾರಣವಾಗಿದೆ. ದೊಡ್ಡ ಅಕ್ರಮಗಳನ್ನು ತೆರವುಗೊಳಿಸಲು ಬಾರದ ಶಕ್ತಿ, ಮಕ್ಕಳ ಆಟದ ಗೂಡನ್ನು ಕಿತ್ತೊಗೆಯಲು ಎಲ್ಲಿಂದ ಬಂತು? ಎಂದು ಸಾಮಾಜಿಕ ಜಾಲತಾಣದಲ್ಲಿ ಸಾರ್ವಜನಿಕರು ತರಾಟೆಗೆ ತೆಗೆದುಕೊಂಡಿದ್ದಾರೆ.