‘ಉಂಡೊಟ್ಟೆ ಮುಂದೆ ಇಟ್ಟುಕೊಂಡು ಊಟ ಹಾಕ್ಲಿಲ್ಲ’ ಎನ್ನುವ ಮಾತಿನಂತಾಗಿದೆ ಸಚಿವ ಚಲುವರಾಯಸ್ವಾಮಿ ಅವರ ಮಾತು. ದೇವೇಗೌಡ ಹಾಗೂ ಕುಮಾರಸ್ವಾಮಿ ಅವರು ಜಿಲ್ಲೆಯ ನೀರಾವರಿ, ವಿದ್ಯುತ್, ಶಿಕ್ಷಣ ಕ್ಷೇತ್ರ ಸೇರಿದಂತೆ ಹಲವು ಅಭಿವೃದ್ಧಿ ಯೋಜನೆಗಳನ್ನು ನೀಡುವ ಮೂಲಕ ಜಿಲ್ಲೆಯ ಜನರ ಮನ ಗೆದ್ದಿದ್ದಾರೆ. ಇಷ್ಟಾದರೂ ಅವರ ಕೊಡುಗೆ ಏನೂ ಇಲ್ಲ ಹೇಗೆ ಹೇಳುತ್ತೀರಿ ಎಂದು ಪ್ರಶ್ನಿಸಿದ ಸಿ.ಎಸ್.ಪುಟ್ಟರಾಜು, ಹೇಮಾವತಿ ನದಿ ನೀರನ್ನು ಕೆ.ಆರ್.ಪೇಟೆ, ಪಾಂಡವಪುರ, ನಾಗಮಂಗಲ ಕ್ಷೇತ್ರಗಳಿಗೆ ಎಚ್.ಡಿ.ದೇವೇಗೌಡರು ನೀಡದಿದ್ದರೆ ಜಿಲ್ಲೆಯ ಸ್ಥಿತಿ ಏನಾಗುತ್ತಿತ್ತು ಎಂದು ಊಹಿಸಲು ಅಸಾಧ್ಯ. ನಾನು ಮತ್ತು ನೀವು ಜಿಲ್ಲಾ ಪಂಚಾಯಿತಿ ಸದಸ್ಯ, ಶಾಸಕ, ಸಂಸದ, ಸಚಿವರಾಗಿ ಕೆಲಸ ಮಾಡಲು ಎಚ್.ಡಿ.ದೇವೇಗೌಡರೇ ಕಾರಣ. ಹೀಗಿದ್ದರೂ ಅವರ ವಿರುದ್ಧವೇ ಮಾತನಾಡುವುದು ಸರಿಯಲ್ಲ. ಇಷ್ಟೆಲ್ಲ ಉಪಯೋಗ ಪಡೆದು ಅವರ ವಿರುದ್ಧವೇ ಮಾತನಾಡುತ್ತೀರಾ?. ಜಿಲ್ಲೆಯ ಜನ ಸೂಕ್ಷ್ಮಮತಿಗಳು. ನಿಮಗೂ-ನಮಗೂ ಪಾಠ ಕಲಿಸಿದ್ದಾರೆ. ಇದನ್ನು ಅರಿತು ಒಳ್ಳೆಯ ದಾರಿಯಲ್ಲಿ ರಾಜಕೀಯ ಮಾಡುವಂತೆ ಸಲಹೆ ನೀಡಿದರು.
