ಸಾಕ್ಷೃ ನಾಶಪಡಿಸಿದ ಇಲಾಖೆ: ಅಕ್ರಮ ದಂಧೆ ಮಾಹಿತಿ ಪಡೆದ ‘ವಿಜಯವಾಣಿ’ ಪ್ರತಿನಿಧಿ ಬೆಟ್ಟಕ್ಕೆ ತೆರಳಿದ್ದು, ಅಪಾಯಕಾರಿ ಸುರಂಗ ಕೊರೆದು ಹೊಳೆಯುವ ಕಲ್ಲುಗಳಿಗಾಗಿ ಹುಡುಕಾಟ ನಡೆಸುವ ಸ್ಥಳ ಪತ್ತೆಯಾಗಿದೆ. ಇದರ ಫೋಟೋ, ವಿಡಿಯೋಗಳನ್ನೂ ತೆಗೆಯಲಾಗಿತ್ತು. ಆದರೆ ಇದರ ಮಾಹಿತಿ ಪಡೆದ ಅರಣ್ಯ ಇಲಾಖೆ ಸಿಬ್ಬಂದಿ ಚೆಕ್ಪೋಸ್ಟ್ನಲ್ಲಿ ಮೊಬೈಲ್ ಹಾಗೂ ಕ್ಯಾಮರಾ ಕಸಿದು, ಎಲ್ಲವನ್ನೂ ಡಿಲೀಟ್ ಮಾಡಿದ್ದಾರೆ.
ಕೆ.ಜಿ.ಗೆ 40 ಸಾವಿರ ರೂ.!: ದಶಕಗಳ ಹಿಂದೆ ಈ ಹರಳು ಕಲ್ಲು ಕೆ.ಜಿ.ಗೆ 500ರಿಂದ 1 ಸಾವಿರ ರೂಪಾಯಿ ಬೆಲೆ ದೊರೆಯುತ್ತಿತ್ತು. ಪ್ರಸ್ತುತ ರಾಜಸ್ಥಾನ, ಗುಜರಾತ್, ಮುಂಬಯಿ ಆಭರಣ ತಯಾರಿಕರಿಂದ ಭಾರಿ ಬೇಡಿಕೆ ಇದ್ದು, ಪ್ರತಿ ಕೆ.ಜಿ. ಹರಳು ಕಲ್ಲು 30ರಿಂದ 40 ಸಾವಿರ ರೂ.ಗೆ ಮಾರಾಟವಾಗುತ್ತಿದೆ. ಆಭರಣಗಳಿಗೆ ಮತ್ತು ಅಲಂಕಾರಿಕ ವಸ್ತುಗಳಿಗೆ ಈ ಹೊಳೆಯುವ ಕೆಂಪು ಕಲ್ಲುಗಳು ಬಳಕೆಯಾಗುತ್ತಿರುವುದರಿಂದ ಅಪಾರ ಬೇಡಿಕೆ ಇದೆ.
‘ಪುಷ್ಪ’ ಚಿತ್ರ ಹೋಲುವ ದಂಧೆ: ಭಾರಿ ಸದ್ದು ಮಾಡಿದ ತೆಲುಗು ನಟ ಅಲ್ಲು ಅರ್ಜುನ್ ಅಭಿನಯದ ‘ಪುಷ್ಪ’ ದಟ್ಟಾರಣ್ಯದಲ್ಲಿ ನಡೆಯುವ ರಕ್ತಚಂದನ ಕರಾಳ ಮಾಫಿಯಾವನ್ನು ಕೇಂದ್ರೀಕರಿಸಿದ ಚಲನಚಿತ್ರ. ಇದೇ ಮಾದರಿಯಲ್ಲಿ ಪಶ್ಚಿಮಘಟ್ಟದಲ್ಲಿ ರೆಡ್ಸ್ಟೋನ್ ದಂಧೆ ಕಾರ್ಯನಿರ್ವಹಿಸುತ್ತಿದೆ. ಹಿಂದೆ ಹರಳುಕಲ್ಲು ದಂಧೆಯಿಂದಾಗಿ ಹೊಡೆದಾಟ, ಸುರಂಗ ಕುಸಿತ ಮತ್ತಿತರ ಕಾರಣಗಳಿಂದ ಅಲ್ಲಿ ಹಲವರು ಸಾವಿಗೀಡಾಗಿದ್ದರು.
