ಜಾಹೀರಾತು ಫಲಕ ಕಾಣಲಿಲ್ಲವೆಂದು ಮರಗಳಿಗೆ ಕೊಡಲಿ! ;  ಬೇವಿನ ಮರ ಕಡಿಸಿದ ಮಹಾನಗರ ಪಾಲಿಕೆ?

ತುಮಕೂರು : ನಗರದ ಡಾ.ಶಿವಕುಮಾರ ಸ್ವಾಮೀಜಿ ರಸ್ತೆ ಮಧ್ಯೆ ನೆಡಲಾಗಿರುವ ಬೇವಿನ ಮರಗಳಿಗೆ ಭಾನುವಾರ ಬೆಳಗ್ಗೆ ಪಾಲಿಕೆ ಕೊಡಲಿ ಹಾಕಿದ್ದು ಹತ್ತಕ್ಕೂ ಹೆಚ್ಚು ಮರಗಳು ನಾಶವಾಗಿವೆ.

ನಗರದ ಸಿದ್ಧಗಂಗಾ ಆಸ್ಪತ್ರೆ ಮುಂಭಾಗದ ವಿದ್ಯುತ್ ಕಂಬಗಳಿಗೆ ಅಳವಡಿಸಿರುವ ಜಾಹೀರಾತು ಫಲಕಗಳಿಗೆ ಅಡ್ಡವಾಗಿವೆ ಎಂದು ಕಡಿಯಲಾಗಿದ್ದು, ಪಾಲಿಕೆ ಅಧಿಕಾರಿಗಳೇ ಇದಕ್ಕೆ ಕುಮ್ಮಕ್ಕು ನೀಡಿದ್ದಾರೆ ಎಂದು ಜನರು ಆಕ್ರೋಶ ವ್ಯಕ್ತಪಡಿಸಿದ್ದಾರೆ.

ಪಾಲಿಕೆ ಅಧಿಕಾರಿಗಳೇ ಶಾಮೀಲು?: ನಗರದಲ್ಲಿ ಜಾಹೀರಾತು ಫಲಕ ಅಳವಡಿಕೆಯಲ್ಲಿ ದೊಡ್ಡ ದಂಧೆಯೇ ನಡೆಯುತ್ತಿದ್ದು, ಜಾಹೀರಾತು ಗುತ್ತಿಗೆದಾರರ ಜತೆ ಪಾಲಿಕೆ ಅಧಿಕಾರಿಗಳೇ ಶಾಮೀಲಾಗಿ ಮರಗಳನ್ನು ಕಡಿಯಲು ಕುಮ್ಮಕ್ಕು ನೀಡಿರುವ ಶಂಕೆಯಿದೆ. ಭಾನುವಾರ ಅಧಿಕಾರಿಗಳು ರಜೆಯಲ್ಲಿರುವ ಕಾರಣಕ್ಕೆ ಈ ದಿನವನ್ನೇ ಆಯ್ಕೆ ಮಾಡಿಕೊಂಡು ಮರಗಳನ್ನು ನೆಲಕ್ಕುರುಳಿಸಲಾಗಿದೆ.

ಮರಕಡಿದ ವಿಷಯ ತಿಳಿದ ಸ್ಥಳೀಯರು ರಸ್ತೆಯಲ್ಲಿಯೇ ಪ್ರತಿಭಟನೆ ನಡೆಸಿ, ಆರೋಪಿಗಳನ್ನು ಬಂಧಿಸುವಂತೆ ಪಟ್ಟು ಹಿಡಿದರು. ಕೂಡಲೇ ಸ್ಥಳಕ್ಕಾಗಮಿಸಿದ ಪಾಲಿಕೆ ಆಯುಕ್ತೆ ರೇಣುಕಾ ಅವರನ್ನೂ ಜನ ತರಾಟೆಗೆ ತೆಗೆದುಕೊಂಡರು. ಸಿಸಿ ಕ್ಯಾಮರಾ ದೃಶ್ಯಾವಳಿ ಪರಿಶೀಲಿಸಿ ಮರಕಡಿದವರ ಮೇಲೆ ಕಾನೂನು ಕ್ರಮ ಕೈಗೊಳ್ಳುವುದಾಗಿ ಆಯುಕ್ತೆ ಭರವಸೆ ನೀಡಿದರು.