ರಸ್ತೆ ಕಾಣದೆ ವಾಹನ ಸವಾರರ ಪರದಾಟ

ಮುನಿರಾಜ.ಆರ್​ ವೇಮಗಲ್​ : ಕೋಲಾರ ತಾಲೂಕಿನ ವೇಮಗಲ್​ ಪಟ್ಟಣದ ಸುಣ್ಣಕಲ್ಲುಗೂಡು ಗ್ರಾಮದ ರಸ್ತೆಯಲ್ಲಿ ಸರಿಯಾದ ಬೀದಿ ದೀಪ, ಚರಂಡಿ ವ್ಯವಸ್ಥೆ ಇಲ್ಲದೆ ಸಾರ್ವಜನಿಕರು ಪರದಾಡುವ ಪರಿಸ್ಥಿತಿ ನಿರ್ಮಾವಾಗಿದೆ. ಅಷ್ಟೇ ಅಲ್ಲದೇ ರಸ್ತೆ ಪೂರ್ತಿ ಗಿಡ&ಗಂಟಿಗಳು ಬೆಳೆದು ಪಾದಚಾರಿಗಳಿಗೆ ಓಡಾಡಲು ಕಿರಿಕಿರಿ ಉಂಟಾಗಿದೆ.

ಚನ್ನಪ್ಪನಹಳ್ಳಿ ರಸ್ತೆಯಿಂದ ಸುಣ್ಣಕಲ್ಲುಗೂಡು ಗ್ರಾಮ ನಡುವೆ ವಿದ್ಯುತ್​ ಕಂಬಗಳು ಇಲ್ಲದಿರುವುದು ವಿಪರ್ಯಾಸವಾಗಿದೆ. ಸಂಜೆ 6 ಗಂಟೆಯಾದರೆ ವೃದ್ಧರು, ಮಹಿಳೆಯರು, ಮಕ್ಕಳು ರಸ್ತೆ ಕಾಣದೆ ಜೀವ ಕೈಯಲ್ಲಿ ಇಟ್ಟುಕೊಂಡು ನಡೆದಾಡುವ ಪರಿಸ್ಥಿತಿ ಎದುರಾಗಿದೆ. ರಸ್ತೆಯೂದ್ದಕ್ಕೂ ಗಿಡ&ಗಂಟಿ ಬೆಳೆದು ಕಾಡು ಕೊಂಪೆಯಾಗಿ ಹಾವು, ಚೇಳು ಹಾಗೂ ಇನ್ನಿತರೆ ಕ್ರಿಮಿ ಕೀಟಗಳು ಪೊದೆಗಳಲ್ಲಿ ಅವಿತಿದ್ದು, ರಾತ್ರಿ ನಡೆದು ಬರಲು ಭಯ ಪಡುವ ವಾತಾವರಣ ನಿರ್ಮಾಣವಾಗಿದೆ.

ಗ್ರಾಮಸ್ಥರು ಈ ಹಿಂದೆ ಹಲವು ಬಾರಿ ಗ್ರಾಮ ಪಂಚಾಯಿತಿ ಅಧಿಕಾರಿಗಳ ಗಮನಕ್ಕೆ ತಂದು ಮನವಿ ಸಲ್ಲಿಸಲಾಗಿದೆ. ಆದರೂ, ಇಲ್ಲಿನ ಅಧಿಕಾರಿಗಳು ತಮ್ಮಗೆ ಸಂಬಂಧವಿಲ್ಲದ ಹಾಗೆ ವರ್ತಿಸುತ್ತಿದ್ದಾರೆ ಎಂದು ಗ್ರಾಮಸ್ಥರು ಆಕ್ರೋಶ ವ್ಯಕ್ತಪಡಿಸಿದ್ದಾರೆ.

ವಿದ್ಯುತ್​ ಕಂಬಗಳಲ್ಲಿದೇ, ದ್ವಿಚಕ್ರ ವಾಹನಗಳು ಹಾಗೂ ಇತರೆ ವಾಹನಗಳು ಬರುವುದು ಕಾಣದೆ ಅಪಘಾತಗಳು ಆಗುತ್ತವೆ ಎಂಬ ಭಯ ಜನರಲ್ಲಿ ಕಾಡುತ್ತಿದೆ. ಹಾಗಾಗಿ ಆದಷ್ಟು ಬೇಗ ಈ ರಸ್ತೆಯ ದುರಸ್ತಿ ಕಾಮಗಾರಿ ಮಾಡಬೇಕೆಂದು ಸಾರ್ವಜನಿಕರು ಆಗ್ರಹಿಸಿದ್ದಾರೆ.