ಬಿಬಿಎಂಪಿ ಪುನಾರಚನೆಗೆ ನೇಮಕವಾಗಿರುವ ಬಿ.ಎಸ್.ಪಾಟೀಲ್ ಸಮಿತಿ 5 ಪಾಲಿಕೆಗಳನ್ನಾಗಿ ವಿಂಗಡಿಸುವ ಸುಳಿವು ನೀಡಿದೆ. ಹಾಲಿ ಬಿಬಿಎಂಪಿ ಸುತ್ತಲಿರುವ ಪ್ರದೇಶಗಳನ್ನು ಸೇರಿಸಿಕೊಂಡಲ್ಲಿ ಐದು ಪಾಲಿಕೆಗಳನ್ನು ಮಾಡುವುದು ಸುಲಭ. ಇದರಿಂದ ಹೊಸ ಪ್ರದೇಶಗಳಿಂದ ಆದಾಯ ಹೆಚ್ಚಿಸಿಕೊಳ್ಳುವ ಸಾಧ್ಯತೆ ಹೆಚ್ಚಿದೆ. ಜತೆಗೆ ಅಲ್ಲಿನ ಜನರು ಪಾಲಿಕೆ ಗಡಿ ಭಾಗದಲ್ಲಿದ್ದರೂ, ಸೌಲಭ್ಯದಿಂದ ವಂಚಿತರಾಗಿದ್ದೇವೆ ಎಂಬ ಅನಾಥ ಪ್ರಜ್ಞೆ ಕಾಡುತ್ತಿರುತ್ತದೆ. ಈ ಪ್ರಸ್ತಾಪಕ್ಕೆ ಇನ್ನಷ್ಟೇ ಒಪ್ಪಿಗೆ ಸಿಗಬೇಕಿದೆ. ಒಂದು ವೇಳೆ ಹಾಲಿ ಬಿಬಿಎಂಪಿಯನ್ನು ಮುಂದುವರಿಸಿಕೊಂಡು ಹೋಗುವುದಿದಲ್ಲಿ 3 ಪಾಲಿಕೆ ರಚಿಸಿ ಸಮಾನ ಅಭಿವೃದ್ಧಿ ಮಾಡಬಹುದಾಗಿದೆ ಎಂಬ ಸಲಹೆಯನ್ನು ಕಾಂಗ್ರೆಸ್ನ ಕೆಲ ಶಾಸಕರು ಸಿಎಂ ಬಳಿ ಹಂಚಿಕೊಂಡಿದ್ದಾರೆ. ಆದರೂ, ಹೊಸದಾಗಿ 3 ಪಾಲಿಕೆ ಅಥವಾ 5 ಪಾಲಿಕೆ ರಚಿಸುವ ಜಿಜ್ಞಾಸೆಯಲ್ಲಿ ಸಮಿತಿ ಸಿಲುಕಿದಂತಿದೆ.
