ಮಾ.24ರಂದು ದೇಶಾದ್ಯಂತ ಯುಎಫ್​ಬಿಯು ಮುಷ್ಕರ...

ಉಡುಪಿ ಕೆನರಾ ಬ್ಯಾಂಕ್​ ಬಳಿ ನೌಕರರಿಂದ ಪೂರ್ವಭಾವಿ ಪ್ರತಿಭಟನೆ

ವಿಜಯವಾಣಿ ಸುದ್ದಿಜಾಲ ಉಡುಪಿ

ಬ್ಯಾಂಕ್​ಗಳಲ್ಲಿ ಅಗತ್ಯ ನೇಮಕಾತಿ, ವಾರದಲ್ಲಿ ಐದು ದಿನ ಮಾತ್ರ ಬ್ಯಾಂಕಿಂಗ್​ ವ್ಯವಸ್ಥೆ ಜಾರಿ, ಬ್ಯಾಂಕಿಂಗ್​ ಸೇವೆ ಹೊರಗುತ್ತಿಗೆ ನೀಡದಂತೆ ಹಾಗೂ ಇನ್ನಿತರ ಪ್ರಮುಖ ಬೇಡಿಕೆ ಮುಂದಿಟ್ಟು ಬ್ಯಾಂಕ್​ ಕಾರ್ಮಿಕರ ಸಂಘಟನೆಗಳ ಸಂಯುಕ್ತ ವೇದಿಕೆ (ಯುಎಫ್​ಬಿಯು) ಮಾ.24 ಮತ್ತು ಮಾ.25ರಂದು ಅಖಿಲ ಭಾರತ ಬ್ಯಾಂಕ್​ ಮುಷ್ಕರಕ್ಕೆ ಕರೆ ನೀಡಿದೆ ಎಂದು ಸಂಘಟನೆಯ ಪ್ರತಿನಿಧಿ ಹಾಗೂ ಯೂನಿಯನ್​ ಬ್ಯಾಂಕ್​ನ ಮೆನೇಜರ್​ ಮುರಳೀಧರ್​ ತಿಳಿಸಿದರು.

ಮುಷ್ಕರಕ್ಕೆ ಪೂರ್ವಭಾವಿಯಾಗಿ ಉಡುಪಿಯ ಕೆನರಾ ಬ್ಯಾಂಕ್​ನ ಕ್ಯಾಥೊಲಿಕ್​ ಶಾಖೆಯ ಮುಂಭಾಗದಲ್ಲಿ ವಿವಿಧ ಬ್ಯಾಂಕ್​ಗಳ ಮೆನೇಜರ್​, ನೌಕರರು ಹಾಗೂ ಸಿಬ್ಬಂದಿ ಶುಕ್ರವಾರ ಸಂಜೆ ಹಮ್ಮಿಕೊಂಡಿದ್ದ ಪ್ರತಿಭಟನೆಯಲ್ಲಿ ಮಾತನಾಡಿದರು.

ನೌಕರರ ಬಲ ಪ್ರದರ್ಶನ

ಬ್ಯಾಂಕ್​ ಆಫ್​ ಬರೋಡಾದ ನೌಕರರ ಸಂಘದ ಕಾರ್ಯದರ್ಶಿ ನೇಹಾ ಮಾತನಾಡಿ, ಮುಷ್ಕರದ ದಿನದಂದು ಹೆಚ್ಚಿನ ಸಂಖ್ಯೆಯಲ್ಲಿ ನೌಕರರು ಪಾಲ್ಗೊಳ್ಳುವಂತಾಗಬೇಕು. ಆ ನಿಟ್ಟಿನಲ್ಲಿ ಕೆನರಾ ಬ್ಯಾಂಕ್​ ಸೇರಿದಂತೆ ಎಲ್ಲ ಬ್ಯಾಂಕ್​ಗಳ ನೌಕರರು, ಅಧಿಕಾರಿಗಳು ಹಾಗೂ ಸಿಬ್ಬಂದಿ ಸಾಂಕೇತಿಕವಾಗಿ ಇಂದು ಪ್ರತಿಭಟನೆಯ ಮೂಲಕ ಬಲ ಪ್ರದರ್ಶನ ಹಮ್ಮಿಕೊಂಡಿದ್ದೇವೆ ಎಂದರು.

ಸಂಘಟನೆಯ ಸದಸ್ಯರಾದ ರಮೇಶ್​ ಕೆ. ಸಚಿನ್​ ಶೆಟ್ಟಿ, ಸುಪ್ರಿಯಾ, ಮಂಜುನಾಥ್​, ಗೋಪಾಲ್​, ರವಿ ಅಬ್ರಾವತ್​, ರಾಮಾನಂದ ಪೈ, ಸೂರಜ್​ ಶೆಟ್ಟಿ, ಸೂರಜ್​ ಉಪ್ಪೂರು, ಮಾರಿಯೋ ಮತಾಯಸ್​, ನಾಗೇಶ್​ ನಾಯಕ್​, ಪ್ರೇಮನಾಥ್​ ಪೂಜಾರಿ ಇತರರಿದ್ದರು.