ನೆಮ್ಮದಿ ಕೆಡಿಸುವ ಮಣಿಪಾಲದ ಶಾಂತಿನಗರ

ರಸ್ತೆಯಲ್ಲಿ ಹರಿಯುವ ಮಲೀನ ನೀರು | ಅವ್ಯವಸ್ಥೆಗೆ ಸಾರ್ವಜನಿಕರ ಬೇಜಾರು

ವಿಜಯವಾಣಿ ಸುದ್ದಿಜಾಲ ಉಡುಪಿ
ಮಣಿಪಾಲ ಸಮೀಪದ ಈ ಊರಿನ ಹೆಸರು ಶಾಂತಿನಗರ ಎಂದಿದೆ. ಆದರೆ, ಇಲ್ಲಿನ ಪರಿಸರದ ಅವ್ಯವಸ್ಥೆಯಿಂದಾಗಿ ಸ್ಥಳೀಯರು ಹಾಗೂ ಈ ಭಾಗದಲ್ಲಿ ಸಂಚರಿಸುವವರ ನೆಮ್ಮದಿ ಕೆಡುತ್ತಲಿದೆ.

ಶಾಂತಿನಗರ ಸಂಪರ್ಕಿಸುವ ಮುಖ್ಯ ರಸ್ತೆ ಸಂಪೂರ್ಣ ಹದಗೆಟ್ಟಿದ್ದು, ಹೊಂಡ-ಗುಂಡಿಗಳಷ್ಟೇ ಗೋಚರಿಸುತ್ತಿದೆ. ಹೀಗಾಗಿ ಈ ಭಾಗದಲ್ಲಿ ವಾಹನಗಳ ಸುಗಮ ಸಂಚಾರಕ್ಕೆ ತೊಡಕಾಗಿದೆ.

ರಸ್ತೆಗೆ ಕೊಳಚೆ ನೀರು!

ಮಳೆ ಸುರಿದಾಗ ಇಲ್ಲಿನ ರಸ್ತೆಗಳಲ್ಲಿರುವ ಗುಂಡಿಗಳಲ್ಲಿ ನೀರು ಸಂಗ್ರಹಗೊಳ್ಳುತ್ತವೆ. ಆದರೆ, ಮಳೆ ಸುರಿಯದೇ ಇದ್ದರೂ ಈ ಮಾರ್ಗದಲ್ಲಿ ನಿತ್ಯವೂ ನೀರು ನಿಂತಿರುತ್ತದೆ. ಇದಕ್ಕೆ ರಸ್ತೆಯ ಅಕ್ಕಪಕ್ಕದ ಕೆಲ ಮನೆಯವರು ಕೊಳಚೆ ನೀರನ್ನು ರಸ್ತೆಗೆ ಬಿಡುವುದೇ ಕಾರಣವಾಗಿದೆ. ಬಟ್ಟೆ ತೊಳೆದ ನೀರು, ಸ್ನಾನಾದಿಗಳ ಕೊಳಚೆ ನೀರು ಈ ರಸ್ತೆಯಲ್ಲಿ ಹರಿಯುತ್ತಲೇ ಇರುತ್ತದೆ.

ಕಾಯಿಲೆ ಭೀತಿ

ಶಾಂತಿನಗರದ ರಸ್ತೆಯಲ್ಲಿ ಸಂಚರಿಸಲಾಗದ ಪರಿಸ್ಥಿತಿ ನಿರ್ಮಾಣವಾಗಿದೆ. ಇಲ್ಲಿಯ ಈ ಅವ್ಯವಸ್ಥೆಯಿಂದಾಗಿ ಸಾರ್ವಜನಿಕರೂ ನಿತ್ಯ ಸಂಕಷ್ಟ ಅನುಭವಿಸುವಂತಾಗಿದೆ. ಡೆಂಘೆಯಂತಹ ಮಾರಕ ಸಾಂಕ್ರಾಮಿಕ ಕಾಯಿಲೆ ಉಡುಪಿಯಲ್ಲೂ ಇದ್ದು, ಈ ರೋಗದ ಹೆಚ್ಚಳಕ್ಕೆ ಇಲ್ಲಿನ ಮಾಲಿನ್ಯತೆ ಕಾರಣವಾಗುವ ಸಾಧ್ಯತೆಯೂ ಇದೆ. ಸೊಳ್ಳೆಗಳ ಸಂತಾನೋತ್ಪತ್ತಿಗೆ ಇಲ್ಲಿನ ವಾತಾವರಣ ಪೂರಕವಾಗಿದೆ ಎಂದು ಜನರು ಆತಂಕ ವ್ಯಕ್ತಪಡಿಸುತ್ತಿದ್ದಾರೆ.

ಪರಿಸರದಲ್ಲಿ ಹರಡಿದೆ ಗಬ್ಬು ವಾಸನೆ

ಶಾಂತಿನಗರದ ಕೆಲ ಮನೆಗಳವರು ಕೊಳಚೆ ನೀರನ್ನು ರಸ್ತೆಗೆ ಬಿಡುತ್ತಾರೆ. ಅವರ ಮನೆಯ ಗೇಟ್​ ಮುಂಭಾಗದಿಂದಲೇ ಕೊಳಚೆ ನೀರು ರಸ್ತೆಗೆ ಹರಿಯುತ್ತಿರುವುದು ಈ ಮಾರ್ಗದಲ್ಲಿ ಸಂಚರಿಸುವಾಗ ಗೋಚರಿಸುತ್ತದೆ. ಇದರಿಂದ ಇಲ್ಲಿನ ಪರಿಸರದಲ್ಲಿ ಗಬ್ಬುವಾಸನೆ ಹರಡಿರುತ್ತದೆ. ಪಾದಚಾರಿಗಳು ಮೂಗು ಮುಚ್ಚಿಕೊಂಡೇ ಸಾಗಬೇಕಿದೆ. ವಿದ್ಯಾರ್ಥಿಗಳು ಈ ರಸ್ತೆ ಮಾರ್ಗವಾಗಿ ಶಾಲೆಗೆ ಹೋಗಿ ಬರುವಾಗ ವಾಹನಗಳ ಟೈರ್​ಗಳಿಂದ ಹಾರುವ ಕೊಳಚೆ ನೀರು ಮೈಗೆ ಎರಚುತ್ತಿದೆ. ಇಲ್ಲಿಯ ಈ ಸಮಸ್ಯೆಯನ್ನು ಜನಪ್ರತಿನಿಧಿಗಳು, ಸಂಬಂಧಿತ ಅಧಿಕಾರಿಗಳ ಗಮನಕ್ಕೆ ತಂದರೂ ಸ್ಪಂದಿಸುತ್ತಿಲ್ಲ ಎಂದು ಸಾರ್ವಜನಿಕರು ದೂರಿದ್ದಾರೆ.