ಲಕ್ಷ್ಮೇಶ್ವರದಿಂದ ಗದಗ, ಹುಬ್ಬಳ್ಳಿ, ಗುತ್ತಲ, ಹುಲಗೂರ, ಸವಣೂರ, ಶಿಗ್ಲಿ, ಸೂರಣಗಿ, ಬಾಲೆಹೊಸೂರ ಮಾರ್ಗಗಳಿಗೆ ಖಾಸಗಿ ವಾಹನಗಳು ಸಂಚಾರ ಮಾಡುತ್ತಿದ್ದವು. ತಾಲೂಕಿನಲ್ಲಿ 50ಕ್ಕೂ ಹೆಚ್ಚು ಖಾಸಗಿ ವಾಹನಗಳಿವೆ. ಹಿಂದಿನಿಂದಲೂ ಸಾರಿಗೆ ಸಂಸ್ಥೆಗೆ ಪೂರಕವಾಗಿಯೇ ಖಾಸಗಿ ವಾಹನದವರು ಕಾರ್ಯನಿರ್ವಹಿಸಿ ಬದುಕು ಕಟ್ಟಿಕೊಂಡಿದ್ದಾರೆ. ಆದರೆ, ಸರ್ಕಾರಿ ಬಸ್ನಲ್ಲಿ ಮಹಿಳೆಯರಿಗೆ ಉಚಿತ ಪ್ರಯಾಣ ಆರಂಭಿಸಿರುವುದು ಖಾಸಗಿ ಸಾರಿಗೆಗೆ ದೊಡ್ಡ ಪೆಟ್ಟು ನೀಡಿದೆ. ಖಾಸಗಿ ವಾಹನಗಳತ್ತ ಯಾರೂ ಮುಖ ಮಾಡುತ್ತಿಲ್ಲ. ಗಂಟೆಗಟ್ಟಲೇ ಕಾಯ್ದು ಬಸ್ಗಳಲ್ಲಿಯೇ ಪ್ರಯಾಣಿಸುತ್ತಿದ್ದಾರೆ. ಅನಿವಾರ್ಯ ಸಂದರ್ಭದಲ್ಲಿ ಬರುವ ಮೂರ್ನಾಲ್ಕು ಪ್ರಯಾಣಿಕರಿಗಾಗಿ ವಾಹನ ಓಡಿಸುವುದು ನಷ್ಟವಾಗುತ್ತದೆ.
