ರಾಜ್ಯದಲ್ಲಿ ಸುಮಾರು 22 ಸಾವಿರ ಸರ್ಕಾರಿ ಬಸ್, 6 ಸಾವಿರದಷ್ಟು ಖಾಸಗಿ ಬಸ್ ಇವೆ. 17 ಜಿಲ್ಲೆಗಳಲ್ಲಿ ಖಾಸಗಿ ಬಸ್ ಸೇವೆ ಇದ್ದು, ಸರ್ಕಾರಿ ಸಾರಿಗೆಗಿಂತ ಉತ್ತಮ ಸರ್ವೀಸ್ ನೀಡುತ್ತಿದ್ದೇವೆ. ಸರ್ಕಾರಿ ಬಸ್ಗಳು ಕೆಟ್ಟು ನಿಂತು, ಪ್ರಯಾಣಿಕರು ಪರದಾಡುತ್ತಿರುತ್ತಾರೆ. ಆದರೆ, ಖಾಸಗಿಯ ಸೇವೆಯಲ್ಲಿ ಕೂಡಲೇ ಬದಲಿ ಬಸ್ ಒದಗಿಸಿ ಪ್ರಯಾಣಿಕರ ಹಿತ ಕಾಯುತ್ತೇವೆ. ಸಮಯಕ್ಕೆ ಸರಿಯಾಗಿ ನಿಗದಿತ ಸ್ಥಳಕ್ಕೂ ಮುಟ್ಟಿಸುತ್ತೇವೆ. ಆದರೂ ಖಾಸಗಿ ಬಸ್ ಸೇವೆ ಮುಗಿಸಲು ಸರ್ಕಾರ ಹುನ್ನಾರ ನಡೆಸಿದೆ. ರಾಜ್ಯಾದ್ಯಂತ ಮಹಿಳೆಯರಿಗೆ ಉಚಿತ ಪ್ರಯಾಣ ಸೌಲಭ್ಯ ಕೊಟ್ಟು ಖಾಸಗಿಯವರು ನಷ್ಟ ಅನುಭವಿಸುತ್ತಿದ್ದೇವೆ. ಈ ಹಿಂದೆ ಸರ್ಕಾರ ಪ್ರಯಾಣ ದರ ಏರಿಕೆ ಮಾಡುವಾಗ ಸುತ್ತೋಲೆ ಹೊರಡಿಸುತ್ತಿತ್ತು. ಆಗ ಖಾಸಗಿಯವರಿಗೂ ದರ ಏರಿಸಲು ಅವಕಾಶವಿತ್ತು. ಆದರೆ, ಈ ಬಾರಿ ಯಾವುದೇ ಸುತ್ತೋಲೆ ಇಲ್ಲದೆ ಸರ್ಕಾರ ತಮ್ಮ ಬಸ್ಗಳಿಗೆ ಮಾತ್ರ ಶೇ.15 ದರ ಏರಿಕೆ ಮಾಡಿಕೊಂಡು ನಮಗೆ ವಂಚಿಸಿದೆ ಎಂದು ಕರ್ನಾಟಕ ರಾಜ್ಯ ಖಾಸಗಿ ಬಸ್ ಮಾಲೀಕರ ಸಂಘಗಳ ಒಕ್ಕೂಟ ಅಸಮಾಧಾನ ವ್ಯಕ್ತಪಡಿಸಿದೆ.
