ಕಲಬುರಗಿ, ಬೀದರ, ರಾಯಚೂರ, ವಿಜಯಪುರ ಸೇರಿದಂತೆ ಕಲ್ಯಾಣ ಕರ್ನಾಟಕದ ಐದು ಜಿಲ್ಲೆಗಳಲ್ಲಿನ ತಾಂಡಾಗಳ 51,900 ಕುಟುಂಬಗಳಿಗೆ ಹಕ್ಕುಪತ್ರ ನೀಡಲು ರಾಜ್ಯ ಸರ್ಕಾರ ನಿರ್ಧಾರ ಕೈಗೊಂಡಿದ್ದು, ಕಲಬುರಗಿ ಜಿಲ್ಲೆಯ ಮಳಖೇಡದಲ್ಲಿ ತಾಂಡಾ ಗ್ರಾಮ ಘೋಷಣೆ ಜತೆಗೆ ಸಾಂಕೇತಿಕವಾಗಿ ಐವರು ಫಲಾನುಭವಿಗಳಿಗೆ ಹಕ್ಕುಪತ್ರವನ್ನು ಪ್ರಧಾನಿ ನರೇಂದ್ರ ಮೋದಿ ಇದೇ ಸಂದರ್ಭದಲ್ಲಿ ವಿತರಿಸಿದರು. ವಿಧಾನಸಭೆ ಚುನಾವಣೆ ಸಮೀಪಿಸುತ್ತಿರುವುದನ್ನು ಗಮನದಲ್ಲಿಟ್ಟು ಮತ ಸೆಳೆಯುವ ಉದ್ದೇಶದಿಂದ ಸರ್ಕಾರ ಇಂತಹ ಹೆಜ್ಜೆ ಇಟ್ಟಿದೆ ಎಂಬ ಟೀಕೆಗಳು ವ್ಯಕ್ತವಾದರೂ ಹಿಂದುಳಿದ ಲಂಬಾಣಿ ಸಮುದಾಯದ ಬಡಕುಟುಂಬಗಳ ಬದುಕಿಗೆ ಬಹುದೊಡ್ಡ ಆಸರೆಯನ್ನು ಈ ಕ್ರಮ ಒದಗಿಸಲಿದೆ. ತಾಂಡಾ, ಮಜರೆ, ದೊಡ್ಡಿ, ಪಾಳ್ಯ, ಕ್ಯಾಂಪ್ ಕಾಲನಿಗಳು ಕಂದಾಯ ಗ್ರಾಮದ ವ್ಯಾಪ್ತಿಗೆ ಬಾರದ ಕಾರಣ ಮೂಲಸೌಕರ್ಯ ಅಭಿವೃದ್ಧಿಯಿಂದ ವಂಚಿತವಾಗಿರುತ್ತವೆ. ಕಂದಾಯ ಗ್ರಾಮವಾಗಿ ಪರಿವರ್ತಿತವಾದರೆ ವಾಸದ ಹಕ್ಕುಪತ್ರ ದೊರೆತು ಜೀವನ ಭದ್ರತೆ ಲಭಿಸುತ್ತದೆ. ಜತೆಗೆ, ವಸತಿ ಯೋಜನೆ ಸೇರಿದಂತೆ ಅನೇಕ ಸರ್ಕಾರಿ ಸೌಲಭ್ಯಗಳು, ಮೂಲಸೌಕರ್ಯಗಳು ಅಲ್ಲಿನ ಜನರಿಗೆ ಲಭಿಸುತ್ತವೆ. ಅಭಿವೃದ್ಧಿಯ ಕಂಪು ಎಲ್ಲೆಡೆ ಪಸರಿಸುವಂತಾದರೆ, ಸಹಜವಾಗಿ ರಾಜ್ಯ ಮತ್ತು ಒಟ್ಟಾರೆಯಾಗಿ ದೇಶಕ್ಕೂ ಹಿತ. ಯಾವ ಸರ್ಕಾರವಿದ್ದರೂ ಪಕ್ಷಭೇದವಿಲ್ಲದೆ ಇಂಥ ಕಾರ್ಯಗಳು ನಿರಂತರವಾಗಿರಬೇಕು.
