ಮುದ್ರಣ ಮಾಹಿತಿ ಪಡೆದ ವಿದ್ಯಾರ್ಥಿಗಳು

ಗಂಗಾವತಿ: ಪ್ರತಿನಿತ್ಯ ಬೆಳ್ಳಂಬೆಳಗ್ಗೆ ಮನೆಮನೆಗೆ ತಲುಪುವ ವಿಜಯವಾಣಿ ಪತ್ರಿಕೆ ತಯಾರಾಗುವ ರೀತಿ, ಪುಟ ವಿನ್ಯಾಸ, ಸಂಪಾದಕೀಯ ವಿಭಾಗದ ಕಾರ್ಯನಿರ್ವಹಣೆ, ಪತ್ರಿಕೆಗಳಿಗೆ ಸುದ್ದಿಯಂತೆಯೇ ಜಾಹೀರಾತುಗಳ ಪಾತ್ರ, ಪತ್ರಿಕೆ ಮುದ್ರಣದಿಂದ ಮನೆಯವರೆಗೆ ಸಾಗುವ ಒಟ್ಟು ದಾರಿಯ ಬಗ್ಗೆ ವಿದ್ಯಾರ್ಥಿಗಳಲ್ಲಿದ್ದ ಕುತೂಹಲ ತಣಿಸಿಕೊಳ್ಳಲು ಶುಕ್ರವಾರ ಸಂಜೆ ವಿಜಯವಾಣಿ ಗಂಗಾವತಿ ಆವೃತ್ತಿ ಕಚೇರಿಗೆ ಗಂಗಾವತಿ ತಾಲೂಕಿನ ವಡ್ಡರಹಟ್ಟಿಯ ಶ್ರೀ ವಿದ್ಯಾನಿಕೇತನ ಪದವಿ ಕಾಲೇಜಿನ ಬಿಕಾಂ-ಬಿಬಿಎ ವಿದ್ಯಾರ್ಥಿಗಳು ಭೇಟಿ ನೀಡಿ, ಪತ್ರಿಕೆ ವಿವಿಧ ವಿಭಾಗಗಳ ಮಾಹಿತಿ ಪಡೆದರು.

ಕನ್ನಡದ ನಂ.1 ದಿನಪತ್ರಿಕೆ ವಿಜಯವಾಣಿ ಗಂಗಾವತಿ ಆವೃತ್ತಿ ಕಚೇರಿಗೆ ಅತ್ಯುತ್ಸಾಹದಿಂದ ಪಾಲ್ಗೊಂಡಿದ್ದ ವಿದ್ಯಾರ್ಥಿಗಳಲ್ಲಿ ಪತ್ರಿಕಾ ಕಚೇರಿಗೆ ಭೇಟಿ ನೀಡಿರುವ ಖುಷಿ ಕಾಣುತ್ತಿತ್ತು. ಕಚೇರಿಗೆ ಆಗಮಿಸಿದ ವಿದ್ಯಾರ್ಥಿಗಳು ಮೊದಲು ಸಂಪಾದಕೀಯ ವಿಭಾಗಕ್ಕೆ ಭೇಟಿ ನೀಡಿದರು. ಪತ್ರಿಕಾ ಕಚೇರಿಯಲ್ಲಿನ ವಿವಿಧ ವಿಭಾಗಗಳು, ಅಲ್ಲಿನ ಸಿಬ್ಬಂದಿ ಕಾರ್ಯನಿರ್ವಹಣೆ ಅರಿತರು.

ಪತ್ರಿಕೆ ಓದು ಯಾವ ಕಾರಣಕ್ಕೆ ಮುಖ್ಯ ಮತ್ತು ಅದರಿಂದಾಗುವ ಪ್ರಯೋಜನಗಳು, ಪತ್ರಿಕೆಯ ವಿಶ್ವಾಸರ್ಹತೆ ಬಗ್ಗೆ ಸಿಬ್ಬಂದಿ ತಿಳಿಸಿಕೊಟ್ಟರು. ಸುದ್ದಿಯನ್ನು ಸಂಗ್ರಹಿಸುವ ಬಗೆ, ೆಟೋಗಳ ಕ್ಲಾರಿಟಿ, ಅದನ್ನು ಎಡಿಟ್ ಮಾಡುವ ಪರಿ, ಪುಟ ವಿನ್ಯಾಸ, ಎಲ್ಲ ಕ್ಷೇತ್ರಗಳ ಸುದ್ದಿಗೆ ನೀಡುವ ಪ್ರಾಮುಖ್ಯದ ಮಾಹಿತಿ ಹಂಚಿಕೊಳ್ಳ ಲಾಯಿತು.

ನಂತರ ಪತ್ರಿಕೆಯ ಮುದ್ರಣ ವಿಭಾಗಕ್ಕೆ ತೆರಳಿದರು. ಪುಟವು ಪಿಡಿಎಫ್ ರೂಪದಿಂದ ಸಿಟಿಪಿ ಮಷಿನ್‌ನಲ್ಲಿ ಪ್ಲೇಟ್ ಮೂಲಕ ಮುದ್ರಣಕ್ಕೆ ಸಜ್ಜುಗೊಳಿಸುವುದು, ಆನಂತರ ಪತ್ರಿಕೆ ಮುದ್ರಣಗೊಳ್ಳುವ ಒಟ್ಟು ಪ್ರಕ್ರಿಯೆಯನ್ನು ಕಣ್ತುಂಬಿಕೊಂಡು ಹರ್ಷ ವ್ಯಕ್ತಪಡಿಸಿದರು. ತಮ್ಮ ಮನೆಗೆ ನಿತ್ಯ ತಲುಪುವ ಪತ್ರಿಕೆ ತಯಾರಾಗುವ ರೀತಿ ಕಂಡು ನಿಬ್ಬೆರಗಾದರು.

ಇದೇ ವೇಳೆ ವಿಆರ್‌ಎಲ್ ಸಮೂಹ ಸಂಸ್ಥೆ ಬಗ್ಗೆಯೂ ಕೇಳಿ ಮಾಹಿತಿ ಪಡೆದರು. ಈ ಭೇಟಿಯಿಂದ ಸಾಕಷ್ಟು ವಿಚಾರಗಳನ್ನು ತಿಳಿಯಲು ಸಾಧ್ಯವಾಯಿತು, ಇದು ಉತ್ತಮ ಕಾರ್ಯವಾಗಿದ್ದು, ಅವಕಾಶ ಮಾಡಿಕೊಟ್ಟಿದ್ದಕ್ಕೆ ವಿಜಯವಾಣಿ ಬಳಗಕ್ಕೆ ವಿದ್ಯಾರ್ಥಿಗಳು ಹಾಗೂ ಸಂಚಾಲಕರು ಕೃತಜ್ಞತೆ ತಿಳಿಸಿದರು. ಕನ್ನಡದ ನಂ.1 ಪತ್ರಿಕೆ ವಿಜಯವಾಣಿ ಮಾಧ್ಯಮ ಕಚೇರಿ ವೀಕ್ಷಣೆಗೆ ವಿದ್ಯಾನಿಕೇತನ ಪದವಿ ವಿದ್ಯಾರ್ಥಿಗಳು ಉತ್ಸುಕತೆ ತೋರಿದ ಹಿನ್ನೆಲೆಯಲ್ಲಿ ಭೇಟಿ ಆಯೋಜಿಸಲಾಗಿತ್ತು.