ಇಂಧನ ದರ ಹೆಚ್ಚಳದಿಂದಾಗಿ ವಿಶೇಷವಾಗಿ ಮನೆ ಮತ್ತು ಕಟ್ಟಡ ನಿರ್ಮಾಣ ಕಾಮಗಾರಿಗಳ ಮೇಲೆ ಗಂಭೀರ ಪರಿಣಾಮ ಬೀರುತ್ತದೆ. ಜಲ್ಲಿಕಲ್ಲು, ಸೈಜ್ಗಲ್ಲು, ಗ್ರಾನೈಟ್ಸ್, ಮರಳು,ಎಂ.ಸ್ಯಾಂಡ್, ಬೋಲ್ಡರ್ಸ್, ದಿಂಡುಗಲ್ಲು ಸಿಮೆಂಟ್, ಸ್ಟೀಲ್, ಸಿಮೆಂಟ್ ಹಾಗೂ ಇಟ್ಟಿಗೆ ಬೆಲೆ ಇನ್ನಷ್ಟು ದುಬಾರಿಯಾಗಲಿದೆ. ಇದರಿಂದಾಗಿ ಹೊಸದಾಗಿ ಮನೆ ಕಟ್ಟುವವರಿಗೆ, ಸದ್ಯ ಮನೆ ನಿರ್ಮಾಣ ಮಾಡುತ್ತಿರುವವರಿಗೆ ತುಂಬ ತೊಂದರೆಯಾಗಲಿದೆ. ವರ್ಷದಿಂದ ವರ್ಷಕ್ಕೆ ಅಡುಗೆ ಎಣ್ಣೆ, ತೊಗರಿ ಬೇಳೆ, ತರಕಾರಿ, ಅಕ್ಕಿ, ಗೋಧಿ, ಹಿಟ್ಟು, ಖಾದ್ಯ ತೈಲಗಳು, ಸಕ್ಕರೆ, ಚಹ, ಕಾಫಿ ಸೇರಿ ದಿನಬಳಕೆ ವಸ್ತುಗಳ ಬೆಲೆ ನಾಗಾಲೋಟದಲ್ಲಿ ಏರುತ್ತಿವೆ. ಇದೀಗ ಇಂಧನ ಹೆಚ್ಚದಿಂದಾಗಿ ಮೇಲಿನ ವಸ್ತುಗಳ ಬೆಲೆ ಇನ್ನಷ್ಟು ದುಬಾರಿಯಾಗುತ್ತದೆ. ಬಡವರಿಗೆ, ಮಧ್ಯಮ ವರ್ಗದ ಜನರಿಗೆ, ಅವಿಭಕ್ತ ಕುಟುಂಬಗಳ ಅಡುಗೆ ಮನೆಗಳು ಇದರ ಬಿಸಿ ತಟ್ಟುತ್ತದೆ. ಮನೆ ಮನೆಗಳ ಒಡಕಿಗೆ ಕಾರಣವಾಗುವುದಲ್ಲದೆ, ಅಡುಗೆ ಮನೆಗಳು ಎರಡಾಗುತ್ತಿವೆ. ಗಂಡ ಕೊಟ್ಟ ಹಣದಲ್ಲಿ ಮನೆಯ ಖರ್ಚು,ವೆಚ್ಚ ತೂಗಿಸುವ ಗೃಹಣಿ ತಿಂಗಳ ಕೊನೆಯಲ್ಲಿ ಕೈಯಲ್ಲಿ ಕಾಸು ಉಳಿಯದೇ ಪರಿತಪಿಸುತ್ತಾಳೆ.ಈ ವಿಚಾರಕ್ಕೆ ಕೆಲವೊಮ್ಮೆ ಗಂಡ&ಹೆಂಡತಿ ನಡುವೆ ಜಗಳ ನಡೆಯುವ ಸಾಧ್ಯತೆಯೂ ಇರುತ್ತದೆ.
