ಕ್ರೀಡಾ ವಸತಿನಿಲಯ ಆರಂಭಕ್ಕೆ ಒತ್ತಡ, ಸರ್ಕಾರಿ ಆಸ್ತಿ ಪಾಳು ಬೀಳಿಸದಂತೆ ಜನಪ್ರತಿನಿಧಿಗಳ ಒತ್ತಾಯ

ಶಿವರಾಜ ಎಂ. ಬೆಂಗಳೂರು ಗ್ರಾಮಾಂತರ

ದೇವನಹಳ್ಳಿ ತಾಲೂಕು ವಿಶ್ವನಾಥಪುರ ಸರ್ಕಾರಿ ಹಿರಿಯ ಪ್ರಾಥಮಿಕ ಪಾಠ ಶಾಲಾ ಕಟ್ಟಡದಲ್ಲಿ ಜಿಲ್ಲಾ ಕ್ರೀಡಾ ವಸತಿ ನಿಲಯ ಅರಂಭಿಸಬೇಕೆಂಬ ಕೂಗೆದ್ದಿದೆ. ಜಿಪಂ ಜನಪ್ರತಿನಿಧಿಗಳು ಈ ಬಗ್ಗೆ ಪ್ರಸ್ತಾವನೆ ಸಲ್ಲಿಸಿದ್ದು, ಸರ್ಕಾರದ ಅನುಮೋದನೆಗೆ ಎದುರು ನೋಡುತ್ತಿದ್ದಾರೆ.

ಪ್ರಸ್ತುತ ವಿಶ್ವನಾಥಪುರ ಸರ್ಕಾರಿ ಶಾಲೆ ಮಕ್ಕಳನ್ನು ಗ್ರಾಮದ ಹೊರವಲಯದಲ್ಲಿರುವ ಕರ್ನಾಟಕ ಪಬ್ಲಿಕ್ ಶಾಲಾ ಕಟ್ಟಡಕ್ಕೆ ಸ್ಥಳಾಂತರಿಸಿರುವುದರಿಂದ ಶಾಲಾ ಕಟ್ಟಡ ಖಾಲಿಯಾಗಿದ್ದು, ಅಲ್ಲಿ ಕ್ರೀಡಾ ವಸತಿನಿಲಯ ಆರಂಭಿಸಬೇಕು ಎಂಬುದು ಜನಪ್ರತಿನಿಧಿಗಳ ಒತ್ತಾಯವಾಗಿದೆ.

ಇಲಾಖೆಗೆ ಹೊಸ ಕ್ರೀಡಾ ವಸತಿ ನಿಲಯ ಮಂಜೂರಾಗುವವರೆಗೆ ಈ ಕಟ್ಟಡ ಬಳಸಬಹುದಾಗಿದೆ ಎಂಬ ಒತ್ತಾಯ ಕೇಳಿಬಂದಿದೆ.

ಪಾಳು ಬಿದ್ದಿದೆ ಕಟ್ಟಡ: ವಿಶ್ವನಾಥಪುರ ಶಾಲೆ ಕಟ್ಟಡವನ್ನು ಗ್ರಾಮಸ್ಥರು ಕೊಟ್ಟಿಗೆಯನ್ನಾಗಿ, ಜಲ್ಲಿ, ಮರಳು, ಇಟ್ಟಿಗೆಗಳ ಗೋದಾಮಾಗಿ ಬಳಸಿಕೊಳ್ಳುತ್ತಿದ್ದಾರೆ. ಮಳೆಯಿಂದ ಕಟ್ಟಡದ ಒಳಭಾಗದಲ್ಲಿ ನೀರು ಸೋರುತ್ತಿದೆ. ಕಟ್ಟಡದ ನಿರ್ವಹಣೆ ಮಾಡಿ ಕ್ರೀಡಾ ವಸತಿ ನಿಲಯಕ್ಕೆ ಬಳಸುವುದರಿಂದ ಕಟ್ಟಡದ ರಕ್ಷಣೆ ಜತೆಗೆ ಜಿಲ್ಲೆಯ ಪ್ರತಿಭೆಗಳಿಗೆ ವೇದಿಕೆ ಕಲ್ಪಿಸಿದಂತಾಗುತ್ತದೆ ಎಂಬುದು ಜನಪ್ರತಿನಿಧಿಗಳ ವಾದ.

ಅಕ್ರಮ ಚಟುವಟಿಕೆ ತಾಣ: ಶಾಲಾ ಮಕ್ಕಳ ವರ್ಗಾವಣೆ ಬಳಿಕ ಇತ್ತ ಕಡೆ ಸಾರ್ವಜನಿಕರು ಬರುವುದು ಕಡಿಮೆಯಾಗಿದೆ. ರಾತ್ರಿ ವೇಳೆ ಅಕ್ರಮ ಚಟುವಟಿಕೆ ತಾಣವಾಗಿ ಬಳಕೆಯಾಗುತ್ತಿದೆ ಎಂಬ ಆರೋಪ ಕೇಳಿಬಂದಿದೆ. ಮದ್ಯದಂಗಡಿಗಳಲ್ಲಿ ಪಾರ್ಸಲ್‌ಗಷ್ಟೆ ಅವಕಾಶವಿರುವುದರಿಂದ ಕಿಡಿಗೇಡಿಗಳು ಮದ್ಯದಂಗಡಿಗಳಿಂದ ಮದ್ಯ ಖರೀದಿಸಿ ಶಾಲಾ ಆವರಣವನ್ನೆ ಕುಡಿತದ ಅಡ್ಡೆಯನ್ನಾಗಿ ಬಳಸುತ್ತಿದ್ದಾರೆ ಎಂಬುದು ಸ್ಥಳೀಯರ ಆರೋಪ.