ಪತ್ರಿಕಾ ಸ್ವಾತಂತ್ರ್ಯದಿಂದ ಪ್ರಜಾಪ್ರಭುತ್ವಕ್ಕೆ ಬಲ...

ಅಪರ ಜಿಲ್ಲಾಧಿಕಾರಿ ಅಬೀದ್​ ಗದ್ಯಾಳ ಅಭಿಮತ

ಉಡುಪಿಯಲ್ಲಿ ಪತ್ರಿಕಾ ದಿನಾಚರಣೆ ಉದ್ಘಾಟನೆ

ವಿಜಯವಾಣಿ ಸುದ್ದಿಜಾಲ ಉಡುಪಿ

ಹದಿನೇಳನೇ ಶತಮಾನದಲ್ಲಿ ಜರ್ಮನ್​ನ ಮತಪ್ರಚಾರಕ ರೆವರೆಂಡ್​ ಹರ್ಮನ್​ ಮೋಗ್ಲಿಂಗ್​ ಅವರು ಪ್ರಥಮ ಬಾರಿಗೆ ಕನ್ನಡದಲ್ಲಿ ಮಂಗಳೂರು ಸಮಾಚಾರ ಎಂಬ ಪತ್ರಿಕೆ ಪ್ರಾರಂಭಿಸಿದರು. ಆ ಕಾಲಕ್ಕೂ ಈಗಿನ ಕಾಲದ ಮಾಧ್ಯಮಕ್ಕೂ ತಾಂತ್ರಿಕವಾಗಿ ಬಹಳ ಬದಲಾವಣೆ ಆಗಿದೆ. ಆದರೆ, ಪತ್ರಿಕಾ ಸ್ವಾತಂತ್ರ್ಯದಿಂದ ಮಾತ್ರ ದೇಶದ ಪ್ರಜಾಪ್ರಭುತ್ವ ವ್ಯವಸ್ಥೆ ಇನ್ನಷ್ಟು ಬಲಗೊಳ್ಳಲು ಸಾಧ್ಯ ಎಂದು ಅಪರ ಜಿಲ್ಲಾಧಿಕಾರಿ ಅಬೀದ್​ ಗದ್ಯಾಳ ಅಭಿಮತ ವ್ಯಕ್ತಪಡಿಸಿದರು.

ಗೌರವಾರ್ಥ ಸನ್ಮಾನ

ಹಿರಿಯ ಪತ್ರಕರ್ತ ಕುಂಜೂರು ಲಕ್ಷ್ಮೀನಾರಾಯಣ ಕುಂಡಂತಾಯ ಅವರನ್ನು ಪತ್ರಿಕಾ ದಿನಾಚರಣೆಯ ಗೌರವಾರ್ಥವಾಗಿ ಸನ್ಮಾನಿಸಲಾಯಿತು. ವಿಜಯ ಆಚಾರ್ಯ ಉಚ್ಚಿಲ ಪರಿಚಯಿಸಿದರು.

ಮಾಧ್ಯಮ ಕುರಿತು ಉಪನ್ಯಾಸ

ಹಿರಿಯ ಪತ್ರಕರ್ತ ರಾಜಾರಾಂ ತಲ್ಲೂರು ಮಾಧ್ಯಮ: ಮುಂದಿನ 10 ವರ್ಷಗಳು-ಮೀಡಿಯಾ ಕನ್ವರ್ಜೆನ್ಸ್​, ಎಲ್​ಎಲ್​ಎಂ ಇತ್ಯಾದಿ ವಿಷಯ ಕುರಿತು ಉಪನ್ಯಾಸ ನೀಡಿದರು. ಕೃತಕ ಬುದ್ಧಿಮತ್ತೆ (ಎಐ) ಮತ್ತು ಎಲ್​ಎಲ್​ಎಂಗಳು ಮಾಧ್ಯಮ ಲೋಕದ ಉದ್ಯೋಗಾವಕಾಶವನ್ನು ಶೇ.50 ಕಡಿತ ಮಾಡುವ ಸಾಧ್ಯತೆ ಇದೆ ಎಂದರು. ರಹೀಂ ಉಜರೆ ಪರಿಚಯಿಸಿದರು.

ಪ್ರತಿಭಾ ಪುರಸ್ಕಾರ

ಮಣಿಪಾಲದ ಎಚ್​ಪಿಆರ್​ ಸಂಸ್ಥೆ ಮುಖ್ಯಸ್ಥ ಹರಿಪ್ರಸಾದ ರೈ ಅವರು ಪತ್ರಕರ್ತರ ಸಂಘದ ಸದಸ್ಯರ ಮಕ್ಕಳಿಗೆ ಪ್ರತಿಭಾ ಪುರಸ್ಕಾರ ವಿತರಿಸಿದರು. ಸಂಘದ ಸದಸ್ಯ ಮೈಕಲ್​ ರೋಡ್ರಿಗಸ್​ ಪುರಸ್ಕೃತರ ಪಟ್ಟಿ ವಾಚಿಸಿದರು.

ಅವನಿಶ್ರೀ ಪ್ರಾರ್ಥಿಸಿದರು. ಸಂಘದ ಪ್ರಧಾನ ಕಾರ್ಯದರ್ಶಿ ನಝೀರ್​ ಪೊಲ್ಯ ಸ್ವಾಗತಿಸಿದರು. ಪತ್ರಕರ್ತೆ ರಾಧಿಕಾ ಕಾರ್ಯಕ್ರಮ ನಿರೂಪಿಸಿದರು. ಉಡುಪಿ ಸಂಘದ ಕೋಶಾಧಿಕಾರಿ ಉಮೇಶ ಮಾರ್ಪಳ್ಳಿ ವಂದಿಸಿದರು.