ನಗರದ ಕರ್ನಾಟಕ ಸಂಘದ ಕೆ.ವಿ.ಶಂಕರಗೌಡ ಶತಮಾನೋತ್ಸವ ಭವನದಲ್ಲಿ ಎಚ್.ಎಲ್.ಕೇಶವಮೂರ್ತಿ ಪ್ರತಿಷ್ಠಾನದ ವತಿಯಿಂದ ಹಮ್ಮಿಕೊಂಡಿದ್ದ ಏಳನೇ ವರ್ಷದ ಪ್ರೊ.ಎಚ್ಚೆಲ್ಕೆ ವೈಚಾರಿಕ ಪ್ರಶಸ್ತಿ ಸ್ವೀಕರಿಸಿ ಮಾತನಾಡಿದ ಅವರು, ಕೇಶವಮೂರ್ತಿ ಅವರು ಪ್ರತಿಭಾವಂತರು. ಈ ಭಾಗದಲ್ಲಿ ವೈಚಾರಿಕತೆ ಹುಟ್ಟುಹಾಕಿ ಹೊಸ ತಲೆಮಾರನ್ನು ಬೆಳೆಸಿದರು. ಯಾವುದೇ ವಿಚಾರ ವಿಚಾರವಷ್ಟೇ ಆಗಿದ್ದರೆ ಚಿಂತನೆ ಆಗುತ್ತದೆ. ಅದೇ ವಿಚಾರಗಳನ್ನು ಇಂದಿನ ತಲೆಮಾರಿಗೆ ಹಸ್ತಾಂತರವಾಗಿ ಬೆಳವಣಿಗೆ ಪ್ರೇರಣೆಯಾದರೆ ಅದು ಸಿದ್ಧಾಂತವಾಗುತ್ತದೆ. ಬುದ್ಧ, ಬಸವ, ಅಂಬೇಡ್ಕರ್, ಮಾರ್ಕ್ಸ್ವಾದದ ಚಿಂತನೆಗಳು ಅವರ ಕಾಲದಲ್ಲಿ ವಿಚಾರವಾಗಿದ್ದು, ಈಗ ಕಾಲಘಟ್ಟ ಮೀರಿ ನಮ್ಮ ಕಾಲಘಟ್ಟಕ್ಕೆ ಬರಬರುತ್ತಾ ಬದುಕಿನ ಪ್ರಶ್ನೆಗೆ ಉತ್ತರ ಕೊಡುವ ಸಿದ್ಧಾಂತಗಳಾಗಿವೆ. ಇಂದಿಗೂ ಅವರ ಚಿಂತನೆಗಳು ನೆಮ್ಮದಿಯ ಸಮಾಜ ನಿರ್ಮಾಣಕ್ಕೆ ಕಾರಣವಾಗಿವೆ ಎಂದು ಬಣ್ಣಿಸಿದರು.
