ತುರುಸಿನ ಪೈಪೋಟಿ ಚುನಾವಣೆಗೆ ಹೆಸರಾದ ವಿಧಾನಸಭಾ ಕ್ಷೇತ್ರ ಕುಮಟಾ-ಹೊನ್ನಾವರ. ಹಾಲಿ ಬಿಜೆಪಿ ಶಾಸಕ ದಿನಕರ ಶೆಟ್ಟಿ ಮತ್ತೊಮ್ಮೆ ಟಿಕೆಟ್ ಪಡೆಯುವ ವಿಶ್ವಾಸದಲ್ಲಿದ್ದಾರೆ. ಅದೇ ಪಕ್ಷದಿಂದ 10ಕ್ಕೂ ಅಧಿಕ ಟಿಕೆಟ್ ಆಕಾಂಕ್ಷಿಗಳಿದ್ದಾರೆ. ಆದರೆ, ಎಲ್ಲೂ ಬಹಿರಂಗವಾಗಿ ಹೇಳಿಕೊಳ್ಳುತ್ತಿಲ್ಲ. ಕಾಂಗ್ರೆಸ್ನಲ್ಲೂ ಟಿಕೆಟ್ ಪೈಪೋಟಿ ಜೋರಾಗಿಯೇ ಇದೆ. ಮಾಜಿ ಶಾಸಕಿ ಶಾರದಾ ಶೆಟ್ಟಿ, ಅವರ ಪುತ್ರ ರವಿಕುಮಾರ ಶೆಟ್ಟಿ, ಜಿಪಂ ಮಾಜಿ ಸದಸ್ಯ ರತ್ನಾಕರ ನಾಯ್ಕ, ಆರ್.ಎಚ್.ನಾಯ್ಕ, ಧೀರೂ ಶಾನಭಾಗ, ಭಾಸ್ಕರ ಪಟಗಾರ, ಮಂಜುನಾಥ ನಾಯ್ಕ, ಹೀಗೆ ಆಕಾಂಕ್ಷಿಗಳ ದೊಡ್ಡ ಸರಣಿಯೇ ಇದೆ. ಇದೇ ಕೈ ಪಕ್ಷದ ಸಂಘಟನೆಗೆ ಸವಾಲಾಗಿದೆ. ಜೆಡಿಎಸ್ನಿಂದ ಸೂರಜ್ ನಾಯ್ಕ ಸೋನಿ ಮಾತ್ರ ಆಕಾಂಕ್ಷಿ. ಅವರೇ ಅಭ್ಯರ್ಥಿಯಾಗುವ ಸಾಧ್ಯತೆ ಹೆಚ್ಚಿದೆ.
