ರಾಜ್ಯದ ನಕ್ಷೆಯಲ್ಲಿ ನಾಲ್ಕು ತಾಲೂಕುಗಳ ಚಿಕ್ಕ ಜಿಲ್ಲೆಯಾಗಿ ಗುರುತಿಸಿಕೊಂಡಿರುವ ರೇಷ್ಮೆನಾಡು ರಾಮನಗರ, ರಾಜಕೀಯ ಕ್ಷೇತ್ರದಲ್ಲಿ ಘಟಾನುಘಟಿ ನಾಯಕರನ್ನು ಹೊಂದಿದೆ. ಸ್ವಾತಂತ್ರ್ಯ ಪೂರ್ವದಿಂದ ಇಲ್ಲಿಯವರೆಗೂ ಜಿಲ್ಲೆ ಹಲವು ಮಹನೀಯ ನಾಯಕರನ್ನು ರಾಜಕಾರಣಕ್ಕೆ ಕೊಡುಗೆಯಾಗಿ ನೀಡಿದೆ. ರಾಜ್ಯದ ಮೊದಲ ವಿದ್ಯಾಮಂತ್ರಿಯಾದ ವಿ. ವೆಂಕಟಪ್ಪ, ವಿಧಾನಸೌಧದ ನಿರ್ವತೃ ಕೆಂಗಲ್ ಹನುಮಂತಯ್ಯ ಸೇರಿ ಇನ್ನೂ ಹಲವರು ಇದೇ ಜಿಲ್ಲೆಯವರು. ರಾಜ್ಯಕ್ಕೆ ಅತಿ ಹೆಚ್ಚು ಮುಖ್ಯಮಂತ್ರಿಗಳನ್ನು ಕೊಟ್ಟ ಹೆಗ್ಗಳಿಕೆಯೂ ಜಿಲ್ಲೆಗಿದೆ. ಕೆಂಗಲ್ ಹನುಮಂತಯ್ಯ ರಾಮನಗರದಿಂದ ಆಯ್ಕೆಯಾದರೆ, ಮುಖ್ಯಮಂತ್ರಿ ಆಗಿಯೇ ಕನಕಪುರ ಕ್ಷೇತ್ರದಿಂದ ಸ್ಪರ್ಧಿಸಿದ್ದ ರಾಮಕೃಷ್ಣ ಹೆಗಡೆ ಅವರನ್ನು ಇಲ್ಲಿನ ಮತದಾರರು ಗೆಲ್ಲಿಸಿದ್ದರು. ನಂತರ 1994ರಲ್ಲಿ ಎಚ್.ಡಿ. ದೇವೇಗೌಡರಿಗೆ ರಾಮನಗರ ಕ್ಷೇತ್ರ ರಾಜಕೀಯ ಪುನರ್ಜನ್ಮ ನೀಡಿದ್ದು ಮಾತ್ರವಲ್ಲದೆ, ಅವರನ್ನು ಸಿಎಂ ಗಾದಿ ಏರುವಂತೆ ಮಾಡಿತು. ನಂತರ ಅವರು ಪ್ರಧಾನಿಯೂ ಆದರು. ಇದಾದ ನಂತರ ರಾಮನಗರದಿಂದ ಒಮ್ಮೆ ಮತ್ತು ಚನ್ನಪಟ್ಟಣದಿಂದ ಒಮ್ಮೆ ಗೆಲುವು ಸಾಧಿಸಿದ ಎಚ್.ಡಿ. ಕುಮಾರಸ್ವಾಮಿ ಮುಖ್ಯಮಂತ್ರಿ ಆಗಿ ಕಾರ್ಯನಿರ್ವಹಿಸಿದ್ದಾರೆ. ಮುಂಬರುವ 2023ರ ಚುನಾವಣೆ ನಂತರ ಸಿಎಂ ರೇಸ್ನಲ್ಲಿರುವ ಪ್ರಮುಖರಲ್ಲಿ ಎಚ್.ಡಿ.ಕುಮಾರಸ್ವಾಮಿ ಮತ್ತು ಡಿ.ಕೆ. ಶಿವಕುಮಾರ್ ಇರುವುದು ಕದನ ಕಣ ರಂಗೇರುವಂತೆ ಮಾಡಿದೆ.
