ಬೆಂಗಳೂರು ದಕ್ಷಿಣ ಜಿಲ್ಲೆಯಲ್ಲಿ ಅ‘ಸಾಮಾನ್ಯ’ ಪೈಪೋಟಿಯ ಲಕ್ಷಣ ಗೋಚರಿಸಲಾರಂಭಿಸಿವೆ. ಈ ಜಿಲ್ಲೆಯ ಒಂಬತ್ತು ವಿಧಾನಸಭಾ ಕ್ಷೇತ್ರಗಳು ಸಾಮಾನ್ಯ ವರ್ಗಕ್ಕೆ ಸೇರಿವೆ. ಉದ್ಯಮ-ಮಧ್ಯಮ, ಬಡವ-ಬಲ್ಲಿದ ಸಹಿತ ಸಮಾಜದ ಎಲ್ಲರನ್ನು ಬೆರೆತ ‘ಹದವರಿತ’ ಪ್ರಾಂತವಿದು. ಇದರಿಂದಾಗಿ ಸ್ಪರ್ಧಾ ಕಲಿಗಳು ರಣವ್ಯೂಹದೊಳಗೆ ನುಗ್ಗಿ ಬಹುಸಂಖ್ಯಾತ, ಅಲ್ಪಸಂಖ್ಯಾತ, ದಲಿತ-ಬಲಿತ, ವರ್ಚಸ್ಸು-ತೇಜಸ್ಸು, ಆಂತರಿಕ ಹೊಂದಾಣಿಕೆ ಇತ್ಯಾದಿ ಅಸ್ತ್ರಗಳನ್ನು ಬಳಸಿ ಜಯಭೇರಿ ಬಾರಿಸುವ ಅವಕಾಶ ಮುಕ್ತ. ಈ ಪ್ರದೇಶ ನಿಸ್ಸಂಶಯವಾಗಿ ಬಿಜೆಪಿ ಭದ್ರಕೋಟೆ. ಆದರೆ, ಅದೇ ಬೀಗುವಿಕೆ ಮುಂದುವರಿಯಲಿದೆ ಎಂಬ ಖಾತರಿಯಿಲ್ಲ. ‘ಸ್ವಯಂಕೃತ ಅಪರಾಧ’ ತಿಳಿದುಕೊಂಡ ಕಾಂಗ್ರೆಸ್ ಭುಜಬಲದ ಪರಾಕ್ರಮಕ್ಕೆ ಸಜ್ಜಾಗುತ್ತಿದೆ. ಕಮಲ-ಕೈಗೆ ಆಕಾಂಕ್ಷಿಗಳ ದೊಡ್ಡದಂಡು ಬಿಸಿತುಪ್ಪವಾಗಲಿದೆ. ಚುನಾವಣೆಗೆ ದಿನಗಳು ಹತ್ತಿರವಾಗುತ್ತಿದ್ದಂತೆ ಅದಲು-ಬದಲು ಕಂಚಿ ಕದಲು ಎಂಬ ಆಟ, ಬಂಡಾಯದ ಕಾಟ, ಅಚ್ಚರಿ ಮೇಲಾಟಗಳು ಜೋರಾಗಲಿವೆ. ಜೆಡಿಎಸ್ ಕಿಂಗ್ವೆುೕಕರ್ ಅಲ್ಲ, ಕಿಂಗ್ ಆಗಬೇಕು ಎಂಬ ಸಂಕಲ್ಪ ಮಾಡಿರುವ ದಳಪತಿಗಳಿಗೆ ಅಸ್ತಿತ್ವದ ಪ್ರಶ್ನೆ ಎದುರಾಗಿದ್ದರೆ, ಸಂಘಟನೆ ಕಟ್ಟಿ ಬೆಳೆಸಲು ಶ್ರಮಿಸುತ್ತಿರುವ ಆಮ್ದಿ್ಮ ಪಾರ್ಟಿ (ಆಪ್)ಗೆ ಬೇರೂರುವ ಧಾವಂತ. ಈ ವ್ಯಾಪ್ತಿಯ ಬಿಬಿಎಂಪಿ, ಲೋಕಸಭೆ ಚುನಾವಣೆಯಲ್ಲಿ ಕಮಲ ಕಲಿಗಳಿಗೆ ಸುಲಭವಾಗಿ ಒಲಿಯುವ ವಿಜಯಲಕ್ಷ್ಮೀ, ವಿಧಾನಸಭೆ ಚುನಾವಣೆ ಬಂದಾಗ ಚಂಚಲೆಯಾಗಿ ಬಿಡುತ್ತಾಳೆ. ಇದು, ಬಿಜೆಪಿಗೆ ಇನ್ನೂ ಉತ್ತರ ಸಿಗದ ಪ್ರಶ್ನೆಯಾಗಿ ಕಾಡುತ್ತಿದೆ.
