ಬೆಳಗಾವಿ ಜಿಲ್ಲೆಯ ಸಂಪೂರ್ಣ ರಾಜಕಾರಣ ‘ಸಕ್ಕರೆ’ ಲಾಬಿಯ ಕುಳಗಳ ಕೈಯಲ್ಲಿದೆ. ‘ನಿಮ್ಮ ಕ್ಷೇತ್ರಕ್ಕೆ ನಾವು ಬರುವುದಿಲ್ಲ. ನಮ್ಮ ಕ್ಷೇತ್ರಕ್ಕೆ ನೀವು ಬರಬೇಡಿ’ಎಂಬ ಅಘೋಷಿತ ಹೊಂದಾಣಿಕೆ ರಾಜಕಾರಣ ರಾಷ್ಟ್ರೀಯ ಪಕ್ಷಗಳಿಗಿಂತ ವೈಯಕ್ತಿಕ ಪ್ರತಿಷ್ಠೆ ಮೇಲೆ ನಿಂತಿದೆ. ‘ಒಳಒಪ್ಪಂದ’ ರಾಜಕಾರಣ ಸಕ್ಕರೆ ಜಿಲ್ಲೆಗೆ ಅಂಟಿರುವ ‘ಡಯಾಬಿಟಿಸ್’(ಮಧುಮೇಹ) ಎಂದೇ ಬಣ್ಣಿಸಲಾಗುತ್ತಿದೆ. ಕತ್ತಿ ಸಹೋದರರಾಗಲಿ, ಜಾರಕಿಹೊಳಿ ಸಹೋದರರಾಗಲಿ, ಎಲ್ಲರೂ ತಮ್ಮ ಕ್ಷೇತ್ರಗಳನ್ನು ಗಟ್ಟಿಯಾಗಿಟ್ಟುಕೊಂಡು ಅಧಿಕಾರ ಚಲಾಯಿಸುತ್ತಿದ್ದಾರೆ. ಕಳೆದೆರಡು ಎಂಎಲ್ಸಿ ಚುನಾವಣೆಯಲ್ಲಿ ನಿರಂತರವಾಗಿ ಇಬ್ಬರು ಬಿಜೆಪಿ ಅಭ್ಯರ್ಥಿಗಳನ್ನು ಸೋಲಿಸುವ ಮೂಲಕ ಪಕ್ಷಕ್ಕಿಂತ ನಾವೇ ಬಲಿಷ್ಠರು ಎಂಬುದನ್ನು ಪರೋಕ್ಷವಾಗಿ ಇಲ್ಲಿನ ರಾಜಕಾರಣಿಗಳು ಕಮಲಪಡೆ ಹೈಕಮಾಂಡ್ಗೆ ಸಾಬೀತು ಪಡಿಸಿದ್ದಾರೆ. ಜಿಲ್ಲೆಯಲ್ಲಿ ಜೆಡಿಎಸ್ಗೆ ನೆಲೆ ಇಲ್ಲ. ದಿ.ಬಿ.ಶಂಕರಾನಂದ ಅವರ ಕಾಲದಲ್ಲಿ ಕಾಂಗ್ರೆಸ್ ಭದ್ರಕೋಟೆಯಾಗಿದ್ದ ಚಿಕ್ಕೋಡಿ ಲೋಕಸಭಾ ಕ್ಷೇತ್ರದಲ್ಲಿ ಈಗ ಬೆರಳೆಣಿಕೆಯಷ್ಟು ಕಾಂಗ್ರೆಸ್ ಶಾಸಕರಿದ್ದಾರೆ. ಹಾಗಾಗಿ ಕೈ ಕೋಟೆ ಛಿದ್ರವಾಗಿದೆ. ಕ್ಷೇತ್ರದ ವ್ಯಾಪ್ತಿಯಲ್ಲಿರುವ ಎಂಟು ವಿಧಾನಸಭಾ ಕ್ಷೇತ್ರಗಳ ಪೈಕಿ 6ರಲ್ಲಿ (ನಿಪ್ಪಾಣಿ, ರಾಯಬಾಗ, ಹುಕ್ಕೇರಿ,ಅಥಣಿ, ಕಾಗವಾಡ ಮತ್ತು ಕುಡಚಿ) ಬಿಜೆಪಿ ಅಧಿಕಾರ ಹಿಡಿದಿದ್ದು, 2 ಕ್ಷೇತ್ರಗಳು (ಚಿಕ್ಕೋಡಿ-ಯಮಕನಮರಡಿ)ಮಾತ್ರ ಕಾಂಗ್ರೆಸ್ ವಶದಲ್ಲಿವೆ.
